ಸನಾತನ ಧರ್ಮದ ಎಳೆಗಳು ಇಂದು ವಿಶ್ವವ್ಯಾಪಿ: ಚಿಂತಕಿ ವೀಣಾ ಬನ್ನಂಜೆ

117ನೇ ಹುಣ್ಣಿಮೆ ಕಾರ್ಯಕ್ರಮ । ಸನಾತನ ಧರ್ಮದಲ್ಲಿ ಮಹಿಳೆಯರ ಪಾತ್ರ ಉಪನ್ಯಾಸ

ಸನಾತನ ಧರ್ಮದ ಎಳೆಗಳು ಇಂದು ವಿಶ್ವವ್ಯಾಪಿಯಾಗಿ ಹಬ್ಬುತ್ತಿವೆ ಎಂದು ಖ್ಯಾತ ವಾಗ್ಮಿ, ಆಧ್ಯಾತ್ಮಕ ಚಿಂತಕಿ ವೀಣಾ ಬನ್ನಂಜೆ ಅಭಿಪ್ರಾಯಪಟ್ಟರು.

ಸನಾತನ ಧರ್ಮ ಎಲ್ಲವನ್ನು ಒಳಗೊಂಡಿದ್ದು, ಅದಕ್ಕೆ ಉಪ ಶೀರ್ಷಿಕೆಯನ್ನು ಕೊಟ್ಟರೆ ಅದು ಅಪೂರ್ಣವಾಗಲಿದೆ. ಸನಾತನ ಧರ್ಮ ಒಬ್ಬ ವ್ಯಕ್ತಿಯ ಜನನದಿಂದ ಮರಣದವರೆಗಿನ ಜೀವನ ಕ್ರಮ, ತತ್ವಗಳ ಬಗೆಗೆ ಪರಿಪೂರ್ಣ ಬೆಳಕು ಚೆಲ್ಲಿ ಸನ್ಮಾರ್ಗದ ದಾರಿ ತೋರುತ್ತದೆ. ಹಾಗಾಗಿ ಸನಾತನ ಧರ್ಮ ಇಡೀ ವಿಶ್ವಕ್ಕೆ ಅಗತ್ಯವಾಗಿದೆ ಎಂದು ಹೇಳಿದರು.

ಭಾರತ ದೇಶದಲ್ಲಿ ಮಾತ್ರ ಲಿಂಗ ಭೇದವಿಲ್ಲದೆ ಚಿಂತನೆ ನಡೆಸಲು ಸಾಧ್ಯ. ಸನಾತನ ಧರ್ಮದಲ್ಲೂ ಕೂಡ ಹೆಣ್ಣಿಗೆ ಗೌರವಾನ್ವಿತ ಸ್ಥಾನಮಾನವಿದ್ದದ್ದನ್ನು ಸ್ಪಷ್ಟೀಕರಿಸುತ್ತದೆ. ಹೆಣ್ಣು ಪುರುಷನಷ್ಟೇ ಸರ್ವ ಸಮಾನಳು. ಸನಾತನ ಧರ್ಮ ಮಹಿಳೆಯನ್ನು ದೇವತೆ, ಶಕ್ತಿಯ ಸಂಕೇತವೆಂದು ಪರಿಗಣಿಸುತ್ತದೆ. ಅದನ್ನು ಇಂದಿನ ಸಮಾಜ ಅರಿತು ನಡೆದರೆ ಸಾಕು ಎಂದು ತಿಳಿಸಿದರು.

ಶ್ರೀ ಆದಿಚುಂಚನಗಿರಿ ಮಹಾಸಂಸ್ಥಾನ ಹಾಸನ ಮಠದ ಶಂಭುನಾಥ ಸ್ವಾಮೀಜಿ ಆಶೀರ್ವಚನ ನೀಡಿ, ಗುರು-ಹಿರಿಯರ ಮಾರ್ಗದರ್ಶನ ಬದುಕಿಗೆ ದಾರಿ ದೀಪವಾಗಬೇಕು. ಮಹನೀಯರು ನಮ್ಮ ಸಂಸ್ಕೃತಿಗೆ ಸಾಕಷ್ಟು ಕೊಡುಗೆ ನೀಡಿದ್ದು, ಅದನ್ನು ಅರಿತು ಸಮಾಜದಲ್ಲಿ ಸಂಸ್ಕಾರವಂತರಾಗಿ ಬಾಳುವ ಕೆಲಸ ನಮ್ಮಿಂದಾಗಬೇಕಿದೆ ಎಂದರು.

ಶ್ರೀ ಮಠದ ಹುಣ್ಣಿಮೆ ಕಾರ್ಯಕ್ರಮ ಒಂದು ಯಾಗದಂತೆ ನಡೆದುಕೊಂಡು ಬರುತ್ತಿದೆ. ಇದೊಂದು ವಿಶೇಷವಾದ ಕಾರ್ಯಕ್ರಮವಾಗಿದ್ದು, ಗುರು ಪರಂಪರೆಯ ಬಗೆಗೆ ಬೆಳಕು ಚೆಲ್ಲುವ ಪ್ರಯತ್ನ ನಿರಂತರವಾಗಿ ಸಾಗುತ್ತಿದೆ. ಈ ಪವಿತ್ರ ಕಾರ್ಯಕ್ರಮದಲ್ಲಿನ ವಿಚಾರಧಾರೆಗಳನ್ನು ಎಲ್ಲರೂ ಬದುಕಿನಲ್ಲಿ ಅಳವಡಿಸಿಕೊಳ್ಳಬೇಕಿದೆ ಎಂದು ಸಲಹೆ ನೀಡಿದರು.

ಭಾಗ್ಯಲಕ್ಷ್ಮೀ ಕಾರ್ಯಕ್ರಮದ ಪ್ರಾರ್ಥನೆ ನೆರವೇರಿದರು. ಉಪನ್ಯಾಸಕ ಎಚ್.ಕೆ ಲಕ್ಷ್ಮೀನಾರಾಯಣ ನಿರೂಪಣೆ ಮಾಡಿದರು.