ಇಂದು ಬುಕ್ಕಾಂಬುಧಿಯಲ್ಲಿ ಉಜ್ಜಯಿನಿ ಸಿದ್ಧಲಿಂಗ ಜಗದ್ಗುರು ಪುಣ್ಯ ಸ್ಮರಣೋತ್ಸವ

ಕನ್ನಡಪ್ರಭ ವಾರ್ತೆ ಬಾಳೆಹೊನ್ನೂರು

ಪತ್ರಿಕಾ ಪ್ರಕಟಣೆ ನೀಡಿರುವ ಜಗದ್ಗುರು, ಸದ್ದುಗದ್ದಲವಿಲ್ಲದ ಸಾಧನೆಗೈದ ಸಿದ್ಧಿ ಪುರುಷ ಲಿಂ. ಶ್ರೀ ಉಜ್ಜಯಿನಿ ಸಿದ್ಧಲಿಂಗ ಜಗದ್ಗುರುಗಳಾಗಿದ್ದು, ಜಗವನುದ್ಧರಿಸಲು ಅವತರಿಸಿ ಬಂದ ಯುಗ ಪುರುಷರು ಇವರು. ಕಿರಿ ವಯಸ್ಸಿನಲ್ಲಿ ಹಿರಿದಾದ ಜವಾಬ್ದಾರಿ ಹೊತ್ತು ಸದ್ಧರ್ಮ ಪೀಠ ಬೆಳಗಿದ ಭಗೀರಥ. ಜ್ಞಾನ ಧ್ಯಾನ ತಪಸ್ಸುಗಳ ಮೂಲಕ ಭಕ್ತ ಸಂಕುಲದ ಬಾಳಿಗೆ ಬೆಳಕು ತೋರಿದ ದಿವ್ಯ ಚೇತನ. ಜಗಳೂರು ತಾಲೂಕಿನ ಬಂಗಾರಕ್ಕನಹಳ್ಳಿ ಶ್ರೀ ಚನ್ನಬಸವಾರ್ಯ-ಗುರುಸಿದ್ಧಮಾಂಬೆಯರ ಒಡಲ ಕುಡಿಯಾಗಿ ಧರ್ಮ ಸೂರ್ಯನಾದವರು ಲಿಂ. ಸಿದ್ಧಲಿಂಗ ಜಗದ್ಗುರುಗಳು.

ನೊಂದವರ ಬೆಂದವರ ಬಾಳಿಗೆ ಶಿವಯೋಗ ಶಕ್ತಿ ಸಾಧನೆ ಮೂಲಕ ಬದುಕಿಗೆ ಶ್ರೇಯಸ್ಸು ತಂದಿತ್ತ ಪರಮಾಚಾರ್ಯರು ಬಡತನ ತೊಲಗಿಸಿ ಸಿರಿತನ ಬೆಳೆಸಲು ಗುಣಾತ್ಮಕ ಮತ್ತು ರಚನಾತ್ಮಕ ಕಾರ್ಯಗಳ ಮೂಲಕ ಜೀವ ತುಂಬಿದ ದೂರ ದೃಷ್ಠಿಯ ಚಿಂತಕರು.

ಪಂಚಾಚಾರ್ಯ ಪ್ರಭಾ ವಾರ ಪತ್ರಿಕೆ ಮೂಲಕ ನಿಜ ತತ್ವದ ಅರಿವು ಮೂಡಿಸಲು ಗುರುಸ್ಥಲದ ಹಿರಿಮೆ ಬೆಳೆಸಲು ಸದಾ ಶ್ರಮಿಸಿ ಧರ್ಮ ಧ್ವಜವನ್ನು ಬಾನೆತ್ತರಕ್ಕೆ ಹಾರಿಸಿದ ದಿವ್ಯ ಚೇತನ. ಅವರು ಅಗಲಿ ೮೮ ಸಂವತ್ಸರಗಳು ಸಂದರೂ ಅವರ ನೆನಹು ನಮ್ಮೆಲ್ಲರ ಬಾಳಿಗೆ ಸದಾ ಹಸಿರು ಹಸಿರಾಗಿದೆ. ಅಜ್ಞಾನದ ಕವಲು ದಾರಿಯಲ್ಲಿ ಮುಗ್ಗರಿಸುತ್ತಿರುವ ಜನ ಸಮುದಾಯಕ್ಕೆ ಅವರು ತೋರಿದ ದಾರಿ ಮಾಡಿದ ತಪಸ್ಸು ಸರ್ವರನ್ನು ಸನ್ಮಾರ್ಗದ ಕಡೆಗೆ ಕರೆ ತರಲೆಂದು ಸದಾ ಸ್ಮರಿಸುತ್ತೇವೆ ಎಂದು ಶ್ರೀ ಹೇಳಿದರು.