ಸಾಮಾಜಿಕ ಬದುಕಿನಲ್ಲಿ ಕಟು ಅನುಭವಗಳು ಸಹಜ: ತರಳಬಾಳು ಶ್ರೀ

ಪಟ್ಟಣದ ಕೆ.ವಿ.ಕಾಲೊನಿಯಲ್ಲಿ ಶಿವ ಪತ್ತಿನ ಸಹಕಾರ ಸಂಘದ ನೂತನ ಕಟ್ಟಡ ಉದ್ಘಾಟನೆ

ಸಾಮಾಜಿಕ ಬದುಕಿನಲ್ಲಿ ತೊಡಗಿಸಿಕೊಳ್ಳುವವರಿಗೆ ಕಟು ಅನುಭವಗಳು ಸಹಜ. ಟೀಕೆ-ಟಿಪ್ಪಣಿಗಳಿಗೆ ತಲೆ ಕೆಡಿಸಿಕೊಳ್ಳದೆ ಪ್ರಾಮಾಣಿಕತೆ ಮತ್ತು ಆತ್ಮ ತೃಪ್ತಿ ಪಡುವಂತೆ ಕೆಲಸ ಮಾಡಿದರೆ ಯಶಸ್ಸು ಸಾಧ್ಯ ಎಂದು ಸಿರಿಗೆರೆ ಶ್ರೀ ತರಳಬಾಳು ಬೃಹನ್ಮಠದ ಡಾ.ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.ಪಟ್ಟಣದ ಕೆ.ವಿ.ಕಾಲೊನಿಯಲ್ಲಿ ಶನಿವಾರ ಶಿವ ಪತ್ತಿನ ಸಹಕಾರ ಸಂಘದ ನೂತನ ಕಟ್ಟಡ ಉದ್ಘಾಟಿಸಿ, ವೇದಾವತಿ ಬಾಲಿಕಾ ಪ್ರೌಢಶಾಲೆ ಆವರಣದ ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿ ಮಾತನಾಡಿ ಪರಸ್ಪರ ಸಹಕಾರವೇ ಜನರಿಗೆ ಹತ್ತಿರದ ಮಾರ್ಗ. ಎಲ್ಲಿ ಸಹಕಾರವಿದೆಯೋ ಅಲ್ಲಿ ಅಭಿವೃದ್ಧಿಯೂ ಇದೆ. ಶಿವ ಪತ್ತಿನ ಸಹಕಾರ ಸಂಘ ಕಡೂರಿನಂತಹ ತಾಲೂಕಿನಲ್ಲಿ ಜನರ ಬದುಕಿಗೆ ಭರವಸೆ ತುಂಬುವ ಕೆಲಸ ಮಾಡುತ್ತಿರುವುದು ಶ್ಲಾಘನೀಯ. ಬಸವಣ್ಣ ಹೇಳಿದಂತೆ ಆಚಾರವೇ ಸ್ವರ್ಗ ಎಂಬ ನಾಣ್ಣುಡಿಯಂತೆ ಷೇರುದಾರರು ಮತ್ತು ಠೇವಣಿದಾರರ ನಂಬಿಕೆಗೆ ಭಂಗ ಬಾರದಂತೆ ನೀವು ಮುಂದೆ ಕೆಲಸ ಮಾಡಬೇಕು ಎಂದು ಸಲಹೆ ನೀಡಿದರು.

ಸಮಾಜಕ್ಕೆ ಮಾರ್ಗದರ್ಶಕರಾಗಿ: ಸ್ವಾಮೀಜಿನಮ್ಮ ಹಿರಿಯ ಗುರುಗಳು ಬಸವಣ್ಣನವರ ಹಾದಿ ಅನುಸರಿಸಿ ಸಮಾಜಕ್ಕೆ ಮಾರ್ಗದರ್ಶಕರಾಗಿ, ಶಿಕ್ಷಣವೇ ಬಡವರ ಉದ್ಧಾರದ ಅಸ್ತ್ರ ಎಂದು ಅರಿತು ಹಳ್ಳಿ-ಹಳ್ಳಿಗಳಲ್ಲಿ ಶಾಲೆಗಳ ಸ್ಥಾಪನೆ ಮೂಲಕ ಸಮಾಜ ಸಂಘಟಿಸಿ ಸರಿದಾರಿಗೆ ತರಲು ಶ್ರಮಿಸಿದರು. ಅವರ ರನ್ನು ನಾವೂ ಹಿಂಬಾಲಿಸಿದ್ದೇವೆ. ಹಣ ಮುಖ್ಯವಾದರೂ ಮನುಷ್ಯನ ಮನಸ್ಸನ್ನು ವಿಕೃತಗೊಳಿಸುವ ಗುಣ ಹೊಂದಿದೆ. ದುರಾಸೆ, ದುರ್ವ್ಯಸನ, ಹಿಂಸೆ ಮನುಷ್ಯನನ್ನು ಬಂಧಿಸುವ ಸಂಕೋಲೆಗಳಾಗಿವೆ ಎಂಬುದನ್ನು ಅರಿತು ಸಮಾಜ ಕೊಟ್ಟದ್ದನ್ನು ಅಲ್ಲಿಗೇ ಹಿಂದಿರುಗಿಸುವ ಮೂಲಕ ಅಭಿವೃದ್ಧಿ ಕಾರ್ಯದಲ್ಲಿ ಕೈ ಜೋಡಿಸಬೇಕಿದೆ.- ಡಾ,ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ, ತರಳಬಾಳು ಬೃಹನ್ಮಠ ಸಿರಿಗೆರೆ.ಫೋಟೋ