ಟ್ರಾಮಾ ಸೆಂಟರ್ ಸೇವೆ ಶೀಘ್ರ: ಶಾಸಕ ದಿನಕರ ಶೆಟ್ಟಿ

ಕುಮಟಾ: ಕ್ಷೇತ್ರದಲ್ಲಿ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆ ಸ್ಥಾಪಿಸಬೇಕೆಂಬ ನಮ್ಮ ಪ್ರಯತ್ನಕ್ಕೆ ಪ್ರಸ್ತುತ ಸರ್ಕಾರದ ಧೋರಣೆಯಿಂದ ಹಿನ್ನಡೆಯಾಗಿದ್ದರೂ ಜಿಲ್ಲೆಯ ಮೊಟ್ಟ ಮೊದಲ ಟ್ರಾಮಾ ಸೆಂಟರ್ ನಿರ್ಮಾಣದ ಹೋರಾಟ ಸಾಕಷ್ಟು ಅಡೆತಡೆಗಳ ನಡುವೆಯೂ ಯಶಸ್ವಿಯಾಗಿದ್ದು ಶೀಘ್ರ ಪೂರ್ಣಗೊಳ್ಳಲಿದೆ ಎಂದು ಶಾಸಕ ದಿನಕರ ಶೆಟ್ಟಿ ತಿಳಿಸಿದರು.

ಉಳಿದಂತೆ ಸರ್ಕಾರದ ಮುಂದೆ ಟ್ರಾಮಾ ಸೆಂಟರ್‌ಗೆ ಅಗತ್ಯ ವೈದ್ಯರು ಸಿಬ್ಬಂದಿ ನೇಮಕಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗಿತ್ತು. ನಮ್ಮ ಬೇಡಿಕೆಯಲ್ಲಿ ಅತಿ ಅಗತ್ಯವಿರುವ ಎಲುಬು, ಕೀಲುತಜ್ಞರು, ಅರವಳಿಕೆ ತಜ್ಞ, ಶುಷ್ರೂಷಕರು, ಪ್ರಯೋಗಾಲಯ ತಂತ್ರಜ್ಞರ ತಲಾ ಒಂದು ಹುದ್ದೆ ನೇಮಕಕ್ಕೆ ಸರ್ಕಾರ ಹಣಕಾಸು ಇಲಾಖೆ ಅನುಮತಿಸಿದೆ. ಅದರಂತೆ ಮೂಲತಃ ಕೋಡ್ಕಣಿಯ ಅನುಭವಿ ಎಲುಬು ಕೀಲು ತಜ್ಞ ಡಾ. ದೀಪಕ ನಾಯ್ಕ ಟ್ರಾಮಾ ಸೆಂಟರ್ ಗೆ ಸೇವೆ ನೀಡಲು ಒಪ್ಪಿದ್ದು ಅರವಳಿಕೆ ತಜ್ಞರ ನಿಯುಕ್ತಿ ಸದ್ಯವೇ ಮಾಡಲಾಗುವುದು. ಯಾವುದೇ ಆವಘಡ-ಅಪಘಾತ ಸಂದರ್ಭದಲ್ಲಿ ಜೀವವುಳಿಸುವ ನಿಟ್ಟಿನಲ್ಲಿ ಟ್ರಾಮಾ ಸೆಂಟರ್ ಕಾರ್ಯ ಮಹತ್ವದ್ದಾಗಿದೆ. ಈ ಹಿನ್ನೆಲೆಯಲ್ಲಿ ಜಿಲ್ಲೆಯ ಏಕೈಕ ಟ್ರಾಮಾ ಸೆಂಟರ್ ಕುಮಟಾದಲ್ಲಿ ತೆರೆಯುವ ನಮ್ಮ ಸತತ ಹೋರಾಟದಿಂದ ಒಂದೆರಡು ತಿಂಗಳಲ್ಲಿ ಜನಸೇವೆಗೆ ಸಜ್ಜಾಗುತ್ತಿದೆ ಎಂದರು.

ವೈದ್ಯಾಧಿಕಾರಿ ಡಾ. ಗಣೇಶ ನಾಯ್ಕ ಮಾತನಾಡಿ, ಶಾಸಕರ ನಿರಂತರ ಪ್ರಯತ್ನ ಮಾತ್ರದಿಂದಲೇ ಸಾಧ್ಯವಾಗಿರುವ ಟ್ರಾಮಾ ಸೆಂಟರ್‌ನ ಕೆಳಮಹಡಿಯಲ್ಲಿ ೭ ಹಾಸಿಗೆಯ ತುರ್ತು ಚಿಕಿತ್ಸಾ ಘಟಕ, ಮೇಲಂತಸ್ತಿನಲ್ಲಿ ಶಸ್ತ್ರಚಿಕಿತ್ಸಾ ವ್ಯವಸ್ಥೆ ಇರಲಿದೆ. ಲಿಫ್ಟ ಅಳವಡಿಕೆಯ ಬಳಿಕ ಪ್ರಯೋಗಾಲಯ ಹಾಗೂ ಶಸ್ತ್ರಚಿಕಿತ್ಸೆ ಸಂಬಂಧಿತ ಯಂತ್ರೋಪಕರಣಗಳನ್ನು ಅಳವಡಿಸಲಾಗುವುದು. ಶಾಸಕ ದಿನಕರ ಶೆಟ್ಟಿ ಅವರ ನಿರಂತರ ಪ್ರಯತ್ನದ ಫಲವಾಗಿ ಟ್ರಾಮಾ ಸೆಂಟರ್ ಅಂತೂ ಲೋಕಾರ್ಪಣೆಗೆ ಸಿದ್ಧವಾಗುತ್ತಿರುವುದು ಸಂತೋಷದ ಸಂಗತಿ ಎಂದರು.