ಈದ್ಗಾ ಕಾಂಪೌಂಡ್ ಹೊಡೆದು ಹಾಕಿ ಅತಿಕ್ರಮ ಪ್ರವೇಶ

ಕನ್ನಡಪ್ರಭ ವಾರ್ತೆ ವಿಜಯಪುರ

ಈ ಕುರಿತು ಮಾತನಾಡಿದ ಜಾಮೀಯಾ ಮಸೀದಿಯ ಮಾಜಿ ಅಧ್ಯಕ್ಷ ಎ.ಆರ್.ಹನೀಪುಲ್ಲಾ ಅವರು, ವಿಜಯಪುರ ಹೋಬಳಿ ಚಿಕ್ಕತತ್ತಮಂಗಲ ಗ್ರಾಮದ ಸರ್ವೆ ನಂಬರ್ 39ರಲ್ಲಿ ಉಪವಿಭಾಗಾದಿಕಾರಿ ಹಾಗೂ ಜಿಲ್ಲಾಧಿಕಾರಿಯವರು ಈದ್ಗಾ ಮತ್ತು ಸ್ಮಶಾನಗಳಿಗೆ ಮಂಜೂರು ಮಾಡಿರುವ 6 ಎಕರೆ 19 ಗುಂಟೆ ಜಮೀನಿಗೆ ನಾವು ಕಾಂಪೌಂಡ್ ನಿರ್ಮಾಣ ಮಾಡಿಕೊಂಡಿದ್ದೇವೆ. ಆದರೆ, ರಿಯಲ್ ಎಸ್ಟೇಟ್ ಉಧ್ಯಮಿ ಕೆಂಪಣ್ಣ ಎಂಬುವವರು ಅವರ ಭೂಮಿ ಅಳತೆ ಮಾಡಿಸಿಕೊಂಡು, ನಮ್ಮ ಈದ್ಗಾ ಮೈದಾನಕ್ಕೆ ಅಳವಡಿಸಿದ್ದ ಕಾಂಪೌಂಡ್ ಕಲ್ಲುಗಳು ಹೊಡೆದು ಹಾಕಿ, ಸುಮಾರು 10 ಅಡಿಗಳಿಗೂ ಹೆಚ್ಚು ಭೂಮಿ ಒತ್ತುವರಿ ಮಾಡಿಕೊಂಡು ಅವರು ಕಲ್ಲುಗಳು ನೆಟ್ಟಿದ್ದಾರೆ. ಅವರು ಭೂಮಿ ಅಳತೆ ಮಾಡುವಾಗ ನಮಗೆ ನೊಟೀಸ್ ಜಾರಿಗೊಳಿಸಿಲ್ಲ. ನಾವು ಭೂಮಾಪಕರನ್ನು ಕೇಳಿದರೆ, ನಾವು ಅಳತೆ ಮಾಡಿಲ್ಲವೆಂದು ಹೇಳಿದ್ದಾರೆ.

ಜಿಲ್ಲಾ ಕಾಂಗ್ರೆಸ್ ಅಲ್ಪಸಂಖ್ಯಾತ ಘಟಕದ ಅಧ್ಯಕ್ಷ ಗೌಸ್ ಖಾನ್ ಮಾತನಾಡಿ, ಈ ಹಿಂದೆ ಜಾಫರ್ ಷರೀಫ್ ಅವರು ಹಾಗೂ ಆಗಿನ ಶಾಸಕರಾಗಿದ್ದ ಮುನಿನರಸಿಂಹಯ್ಯ ಅವರ ಕಾಲದಲ್ಲಿ ಮಂಜೂರಾಗಿರುವ ಈ ಭೂಮಿಯೊಳಗೆ ಮರವೇ ಕೆಂಪಣ್ಣ ಹಾಗೂ ಅವರ ಸಹೋದರರು ಅತಿಕ್ರಮ ಪ್ರವೇಶ ಮಾಡಿದ್ದಾರೆ. ಈ ರೀತಿಯಾಗಿ ದೌರ್ಜನ್ಯದಿಂದ ನಡೆದುಕೊಳ್ಳುವುದು ಸರಿಯಲ್ಲ. ಸಂಬಂಧಪಟ್ಟ ತಹಶೀಲ್ದಾರರು ಸ್ಥಳಕ್ಕೆ ಬಂದು ಪರಿಶೀಲನೆ ನಡೆಸಬೇಕು. ತಪ್ಪು ಮಾಡಿರುವವರ ಮೇಲೆ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು.

ಪೊಲೀಸ್ ಠಾಣೆಯಲ್ಲಿ ಘಟನೆಯ ಕುರಿತು, ದೂರು ನೀಡಲು ಬಂದಿದ್ದ ಜಾಮೀಯಾ ಮಸೀದಿಯ ಆಡಳಿತಾಧಿಕಾರಿ ಅಜ್ಮತ್ ಉಲ್ಲಾ ಅವರ ಜೊತೆಯಲ್ಲಿ ನೂರಾರು ಮಂದಿ ಮುಸ್ಲಿಂ ಸಮುದಾಯದವರು ಜಮಾವಣೆಗೊಂಡಿದ್ದರು. ಕೆಲ ಕಾಲ ಪೊಲೀಸ್ ಠಾಣೆಯ ಆವರಣದಲ್ಲಿ ಉಧ್ವಿಗ್ನ ವಾತಾವರಣ ನಿರ್ಮಾಣವಾಗಿತ್ತು. ನಂತರ ಪೊಲೀಸರು, ಜಮಾವಣೆಗೊಂಡಿದ್ದವರನ್ನು ಹೊರಗೆ ಕಳುಹಿಸಿದರು.