ಉಜ್ವಲ, ಸ್ವಾಧಾರಗೃಹಗಳಲ್ಲಿದ್ದ ನಿರಾಶ್ರಿತರು ಬೀದಿಪಾಲು..!

ಮಂಡ್ಯ ಮಂಜುನಾಥ

ಸ್ವಾಧಾರ ಗೃಹ ಮತ್ತು ಉಜ್ವಲ ಕೇಂದ್ರಗಳನ್ನು ಸ್ವಯಂ ಸೇವಾ ಸಂಸ್ಥೆಗಳ ನಿರ್ವಹಣೆಯಿಂದ ಮುಕ್ತಿಗೊಳಿಸಿ ಮೂರು ತಿಂಗಳಾದರೂ ಪರ್ಯಾಯ ವ್ಯವಸ್ಥೆ ಕಲ್ಪಿಸದಿರುವ ಹಿನ್ನೆಲೆಯಲ್ಲಿ ಲೈಂಗಿಕ ದೌರ್ಜನ್ಯ, ಕೌಟುಂಬಿಕ ಕಲಹ, ವರದಕ್ಷಿಣೆ ಕಿರುಕುಳ, ಇನ್ನಿತರೆ ಸಮಸ್ಯೆಗಳಿಂದ ಬೇಸತ್ತು ಉಜ್ವಲ ಹಾಗೂ ಸ್ವಾಧಾರ ಕೇಂದ್ರಗಳಲ್ಲಿ ಆಶ್ರಯ ಪಡೆದಿದ್ದ ನಿರಾಶ್ರಿತರು ಇದೀಗ ಬೀದಿಪಾಲಾಗಿದ್ದಾರೆ.

೨೦೨೩-೨೪ನೇ ಸಾಲಿನ ಮಾರ್ಚ್ ೨೦೨೨೪ರ ವರೆಗೆ ಸ್ವಾಧಾರಗೃಹ ಹಾಗೂ ಉಜ್ವಲ ಕೇಂದ್ರಗಳಲ್ಲಿ ದಾಖಲಾಗಿರುವ ನಿವಾಸಿಗಳಲ್ಲಿ ಪುನರ್ವಸತಿ ಹೊಂದಬಹುದಾದ ನಿವಾಸಿಗಳು ಆಶ್ರಯದ ಅಗತ್ಯತೆ ಇರುವ ನಿವಾಸಿಗಳು ಹಾಗೂ ರಾಜ್ಯ ಮಹಿಳಾ ನಿಲಯ, ಸ್ವೀಕಾರ ಕೇಂದ್ರಗಳಲ್ಲಿ ಮುಂದಿನ ಪುನರ್ವಸತಿಗೆ ವರ್ಗಾಯಿಸಬಹುದಾದ ನಿವಾಸಿಗಳ ವಿವರವನ್ನು ನೀಡುವಂತೆ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಉಪ ನಿರ್ದೇಶಕರು ನೀಡಿದ ಸೂಚನೆಯಂತೆ ಸ್ವಯಂಸೇವಾ ಸಂಸ್ಥೆಗಳು ವಿವರವನ್ನು ನೀಡಿದ್ದವು. ಉಜ್ವಲ ಮತ್ತು ಸ್ವಾಧಾರ ಕೇಂದ್ರಗಳ ವರದಿಯನ್ನು ಪಡೆದುಕೊಂಡು ಮೂರು ತಿಂಗಳಾದರೂ ರಾಜ್ಯ ಸರ್ಕಾರ ಶಕ್ತಿ ಸದನ ತೆರೆಯುವ ಕುರಿತಂತೆ ಇದುವರೆಗೆ ಯಾವುದೇ ಕ್ರಮವನ್ನು ಕೈಗೊಂಡಿಲ್ಲ. ನಿರಾಶ್ರಿತರಿಗೆ ಪುನರ್ವಸತಿ ಕಲ್ಪಿಸುವ ಬಗ್ಗೆಯೂ ಸಲಹೆ-ಸೂಚನೆ ಎತ್ತಿಲ್ಲ. ಸರ್ಕಾರದ ನಿಲುವಿನಿಂದ ಈ ಕೇಂದ್ರಗಳಲ್ಲಿದ್ದ ನಿರಾಶ್ರಿತರು ಎಲ್ಲಿಗೆ ಹೋಗಬೇಕೆಂದು ತಿಳಿಯದೆ ಬೀದಿಗೆ ಬಿದ್ದಿದ್ದಾರೆ.

ಹೀಗಾಗಿ ಸ್ವಯಂ ಸೇವಾ ಸಂಸ್ಥೆಯವರು ಕೇಂದ್ರಗಳಲ್ಲಿದ್ದವರ ಮನೆಯವರಿಗೆ ಕರೆ ಮಾಡಿ ವಿಷಯ ತಿಳಿಸಿದರೂ ಅವರನ್ನು ಕರೆದುಕೊಂಡು ಹೋಗುವುದಕ್ಕೆ ಯಾರೂ ಬರುತ್ತಿಲ್ಲ. ಕೆಲವರನ್ನು ಬಲವಂತವಾಗಿ ಮನೆಗಳಿಗೆ ಕಳುಹಿಸಲಾಗುತ್ತಿದೆ. ಕೆಲವರು ಒಲ್ಲದ ಮನಸ್ಸಿನಿಂದ ಮನೆಗಳನ್ನು ಸೇರುವಂತಹ ಪರಿಸ್ಥಿತಿ ಸೃಷ್ಟಿಯಾಗಿದೆ. ಕೆಲವರು ನೆಲೆಯನ್ನೇ ಕಾಣದೆ ಬೀದಿಪಾಲಾಗಿದ್ದಾರೆ. ರಾಜ್ಯ ಸರ್ಕಾರದ ತಟಸ್ಥ ಧೋರಣೆಯಿಂದ ಕೇಂದ್ರಗಳಲ್ಲಿ ನೆಲೆಸಿದ್ದ ನಿರಾಶ್ರಿತರಿಗೆ ಎಲ್ಲಿ ಪುನರ್ವಸತಿ ಕಲ್ಪಿಸಬೇಕೆಂಬುದು ತಿಳಿಯದೆ ಜಿಲ್ಲಾಡಳಿತ ಅಸಹಾಯಕತೆ ಪ್ರದರ್ಶಿಸುತ್ತಿದೆ.ಕೇಂದ್ರ-ರಾಜ್ಯ ಸರ್ಕಾರದ ಪಾಲುದಾರಿಕೆ

ಸ್ವಾಧಾರ ಗೃಹ ಯೋಜನೆಯು ಕಷ್ಟಕರ ಪರಿಸ್ಥಿತಿಯಲ್ಲಿರುವ ಮಹಿಳೆಯರಿಗೆ ಆಶ್ರಯ, ತರಬೇತಿ ಹಾಗೂ ಶಿಕ್ಷಣ ನೀಡುವುದರ ಮೂಲಕ ಆರ್ಥಿಕ ಮತ್ತು ಸಾಮಾಜಿಕವಾಗಿ ಸಶಕ್ತರನ್ನಾಗಿ ಮಾಡುವುದಾಗಿದ್ದರೆ, ಉಜ್ವಲ ಯೋಜನೆಯು ಮಹಿಳೆಯರ ಮತ್ತು ಮಕ್ಕಳ ಸಾಗಾಣಿಕೆ ತಡೆಗಟ್ಟಲು ಹಾಗೂ ಸಾಗಾಣಿಕೆ, ವಾಣಿಜ್ಯ ಲೈಂಗಿಕ ದುರುಪಯೋಗಕ್ಕೆ ಒಳಪಟ್ಟವರನ್ನು ರಕ್ಷಿಸಲು, ಪುನರ್ವಸತಿ ಕಲ್ಪಿಸಲು ಹಾಗೂ ಇವರುಗಳ ಕುಟುಂಬದೊಂದಿಗೆ ಪುನರ್‌ವಿಲೀನಗೊಳಿಸುವ ಉದ್ದೇಶವನ್ನು ಹೊಂದಿತ್ತು.

ಸ್ವಯಂ ಸೇವಾ ಸಂಸ್ಥೆಗಳಿಂದ ಸ್ವಾಧಾರ ಗೃಹ, ಉಜ್ವಲ ಕೇಂದ್ರಗಳ ನಿರ್ವಹಣೆಯನ್ನು ಮಾ.೩೧ಕ್ಕೆ ಸರ್ಕಾರ ಅಂತಿಮಗೊಳಿಸಿದೆ. ಕೇಂದ್ರದಲ್ಲಿರುವ ನಿರಾಶ್ರಿತರಿಗೆ ಶಕ್ತಿ ಸದನಗಳನ್ನು ತೆರೆದು ಸರ್ಕಾರ ಪುನರ್ವಸತಿ ಕಲ್ಪಿಸಬಹುದೆಂಬ ಆಶಯದೊಂದಿಗೆ ಅವರಿಗೆ ಇಲ್ಲಿಯವರೆಗೆ ೨೩ ಮಂದಿಗೆ ಆಶ್ರಯ ನೀಡಿದ್ದೆವು. ಆದರೆ, ಸರ್ಕಾರದಿಂದ ಯಾವ ಕ್ರಮವೂ ಆಗಿಲ್ಲ. ನಮಗೆ ನಿರಾಶ್ರಿತರನ್ನಿರಿಸಿಕೊಂಡು ನಿರ್ವಹಣೆ ಮಾಡಲಾಗುತ್ತಿಲ್ಲ. ಅವರನ್ನು ಹೊರಗೆ ಕಳುಹಿಸದೆ ವಿಧಿಯಿಲ್ಲ. ಹಾಗಾಗಿ ಎಲ್ಲರನ್ನೂ ಬೀಳ್ಕೊಟ್ಟಿದ್ದೇವೆ.

ಗಂಡನ ಕಿರುಕುಳ ತಾಳಲಾರದೆ ಕಷ್ಟವಾದರೂ ಮಗುವಿನೊಂದಿಗೆ ಇಲ್ಲಿಗೆ ಬಂದು ಆಶ್ರಯ ಪಡೆದಿದ್ದೆ. ಈಗ ಕೇಂದ್ರದ ಬಾಗಿಲು ಮುಚ್ಚುತ್ತಿದೆ. ನಾನಿಲ್ಲಿ ಸಮಾಧಾನದಿಂದ ಇದ್ದೆ. ಈಗ ಮಗುವನ್ನು ಕರೆದುಕೊಂಡು ಎಲ್ಲಿಗೆ ಹೋಗಬೇಕೆಂದು ನನಗೆ ತಿಳಿಯುತ್ತಿಲ್ಲ. ದಯವಿಟ್ಟು ಒಂದು ಕೇಂದ್ರವನ್ನಾದರೂ ಜಿಲ್ಲೆಯಲ್ಲಿ ಉಳಿಸಿಕೊಡಿ. ನಮ್ಮನ್ನು ಬೀದಿಗೆ ತಳ್ಳಬೇಡಿ.