ಯುನೆಸ್ಕೋ ತಂಡ ಹಂಪಿಗೆ ಆಗಮನ, ಸ್ಮಾರಕಗಳ ವೀಕ್ಷಣೆ

ಹೊಸಪೇಟೆ: ಯುನೆಸ್ಕೋ ವಿಶ್ವ ಪಾರಂಪರಿಕ ಕೇಂದ್ರ ಮತ್ತು ಸ್ಮಾರಕ ಮತ್ತು ತಾಣಗಳ ಮೇಲಿನ ಅಂತಾರಾಷ್ಟ್ರೀಯ ಮಂಡಳಿಯ (ಐಸಿಒಎಂಒಎಸ್‌) ತಜ್ಞರ ನಿಯೋಗ ಸ್ಮಾರಕಗಳ ಪರಿಶೀಲನೆಗಾಗಿ ಶನಿವಾರ ಮಧ್ಯಾಹ್ನ 2 ಗಂಟೆಗೆ ಹಂಪಿಗೆ ಆಗಮಿಸಿದ್ದರಿಂದ ಹಂಪಿ ಮತ್ತೊಮ್ಮೆ ಜಾಗತಿಕ ಗಮನ ಸೆಳೆದಿದೆ.

ಯುನೆಸ್ಕೋ ತಂಡದಲ್ಲಿ ಅಂತಾರಾಷ್ಟ್ರೀಯ ಪಾರಂಪರಿಕ ಪರಿಣಿತ ಕಿನ್ಯಾದ ಜಾರ್ಜ್ ಅಬುಂಗ್ ನೇತೃತ್ವದ ಯುನೆಸ್ಕೋ ತಂಡದಲ್ಲಿ ಜಪಾನ್‌ ದೇಶದ ಇಚಿಡಾ ಶಿಮೋಡಾ ಇದ್ದು, ಅವರು ಹಂಪಿಯ ಸ್ಮಾರಕಗಳ ಪರಂಪರೆ ಪರಿಶೀಲಿಸಿ ಹಂಪಿಯಿಂದ ತೆರಳಿ ವರದಿ ಸಲ್ಲಿಸಲಿದ್ದಾರೆ. ಹಂಪಿ ಸ್ಮಾರಕಗಳ ಗುಚ್ಚವನ್ನು ಯುನೆಸ್ಕೊ 1986ರಲ್ಲಿ ವಿಶ್ವ ಪಾರಂಪರಿಕ ಪಟ್ಟಿಗೆ ಸೇರಿಸಿದ ಬಳಿಕ ಹಂಪಿಗೆ ವಿಶ್ವಮನ್ನಣೆ ದೊರೆತಿತ್ತು. 1999ರಲ್ಲಿ ವಿಶ್ವ ಪರಂಪರೆ ಪಟ್ಟಿಯಿಂದಲೇ ತೆಗೆದು ಅಪಾಯ ಪಟ್ಟಿಗೆ ಸೇರಿಸಲಾಗಿತ್ತು. ಆಗ ಹಂಪಿಯ ಅಭಿವೃದ್ಧಿಗೆ ಯುನೆಸ್ಕೋ ಹಲವು ಕ್ರಮ ಸೂಚಿಸಿತ್ತು. ಯಾವುದೇ ಕ್ರಮ ಕೈಗೊಳ್ಳದೇ ಇದ್ದಲ್ಲಿ ಯುನೆಸ್ಕೋ ಪಟ್ಟಿಯಿಂದ ಹಂಪಿಯನ್ನು ಕೈ ಬಿಡುವ ಬೆದರಿಕೆ ಯುನೆಸ್ಕೋ ಹಾಕಿತ್ತು. ನಂತರ ಯುನೆಸ್ಕೋ ಮಾರ್ಗದರ್ಶನದಂತೆ ಹಂಪಿಯಲ್ಲಿ ಪ್ರಗತಿ ಕಾರ್ಯ ನಡೆಸಿದಾಗ ಮತ್ತೆ ಹಂಪಿಯನ್ನು ಯುನೆಸ್ಕೋ ಪಟ್ಟಿಗೆ ಸೇರಿಸಲಾಯಿತು.

ಬೆಂಗಳೂರಿನಿಂದ ಹಂಪಿಗೆ ಯುಸೆಸ್ಕೋ ತಂಡ ಆಗಮಿಸಿದ್ದು, ತಂಡದ ಜತೆಗೆ ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯ (ಎಎಸ್‌ಐ) ಹೆಚ್ಚುವರಿ ಮಹಾನಿರ್ದೇಶಕ ಜಾನ್ವಿಜ್‌ ಶರ್ಮಾ ಸೇರಿದಂತೆ ಒಟ್ಟು ಆರು ಜನ ಅಧಿಕಾರಿಗಳು ಹಂಪಿ ವೀಕ್ಷಣೆಗೆ ಆಗಮಿಸಿದ್ದಾರೆ. ಹಂಪಿ ಸಮೀಪದ ಕಮಲಾಪುರದ ಇವಾಲ್ವ್‌ ಬ್ಯಾಕ್‌ ರೆಸಾರ್ಟ್‌ನಲ್ಲಿ ಯುನೆಸ್ಕೋ ತಂಡ ಉಳಿದುಕೊಂಡಿದೆ.

ಅ. 25ರ ಭಾನುವಾರ ಬೆಳಗ್ಗೆ ಯುನೆಸ್ಕೊ ತಜ್ಞರ ತಂಡ ಕಮಲಾಪುರದ ಎಎಸ್‌ಐ ಮ್ಯೂಸಿಯಂ, ಹಂಪಿಯ ಮಾಲ್ಯವಂತ ರಘುನಾಥ ದೇವಸ್ಥಾನ, ವಿಜಯ ವಿಠ್ಠಲ ದೇವಸ್ಥಾನಗಳಿಗೆ ಭೇಟಿ ನೀಡಿ ಮಧ್ಯಾಹ್ನ ಕೊಪ್ಪಳ ಜಿಲ್ಲೆ ಗಂಗಾವತಿ ತಾಲೂಕಿನ ಅಂಜನಾದ್ರಿ ಬೆಟ್ಟಕ್ಕೆ ತೆರಳಲಿದೆ. ನಂತರ ಆನೆಗುಂದಿಯ ಗಗನ ಮಹಲ್‌ಗಳಿಗೆ ಭೇಟಿ ನೀಡಲಿದೆ. ಸಂಜೆ 5.30ಕ್ಕೆ ಹೊಸಪೇಟೆಯ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಹಂಪಿಗೆ ಸಂಬಂಧಿಸಿದಂತೆ ವಿವಿಧ ಇಲಾಖೆಯ ಅಧಿಕಾರಿಗಳೊಂದಿಗೆ ಸಭೆ ನಡೆಸಲಿದೆ.

ಆ. 27ರಂದು ಬೆಳಗ್ಗೆ ಮತ್ತೆ ಅಧಿಕಾರಿಗಳೊಂದಿಗೆ ಸಭೆ ನಡೆಸಲಿದ್ದಾರೆ. ಅಂದು ಮಧ್ಯಾಹ್ನ 2.30ಕ್ಕೆ ರಸ್ತೆ ಮೂಲಕ ಬೆಂಗಳೂರಿಗೆ ತೆರಳಿ ಅ.28ರಂದು ಬೆಂಗಳೂರಿನಲ್ಲಿ ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿ, ಎಎಸ್‌ಐ ಮತ್ತು ಯುನೆಸ್ಕೊ ತಂಡಗಳ ಜತೆಗೆ ಸಭೆ ನಡೆಯಲಿದೆ. ನಂತರ ಯುನೆಸ್ಕೋಗೆ ವರದಿ ಸಲ್ಲಿಸಲಿದ್ದಾರೆ. ಬಳಿಕ ಯುನೆಸ್ಕೊ ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಯಲ್ಲಿ ಹಂಪಿ ಭದ್ರವಾಗಿರುತ್ತದೆಯೋ ಅಪಾಯಕಾರಿ ತಾಣಗಳ ಪಟ್ಟಿಯಲ್ಲಿ ಸೇರುತ್ತದೆಯೋ ಎಂಬುದು ಕಾದು ನೋಡಬೇಕಾಗಿದೆ.