ಪೊಲೀಸ್‌ ಬಂದೋಬಸ್ತ್‌ನಲ್ಲಿ ಯೂರಿಯಾ ವಿತರಣೆ..!

ಮುಳಗುಂದ: ಜಿಲ್ಲೆಯಾದ್ಯಂತ ಯೂರಿಯಾ ಗೊಬ್ಬರದ ಅಭಾವ ಮುಂದುವರೆದಿದ್ದು, ಪಟ್ಟಣದ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದಲ್ಲಿ ಒಂದು ಲಾರಿ (550 ಪಾಕೇಟ್) ಗೊಬ್ಬರ ಬಂದಿದ್ದರಿಂದ ಪಟ್ಟಣ ಸೇರಿದಂತೆ ಸುತ್ತಮುತ್ತಲ ಗ್ರಾಮಗಳ ರೈತರು ಒಮ್ಮೇಲೆ ಮುಗಿ ಬಿದ್ದ ಹಿನ್ನೆಲೆ ಪರಿಸ್ಥಿತಿ ನಿಯಂತ್ರಣಕ್ಕೆ ಡಿವೈಎಸ್‌ಪಿ ಮುರ್ತುಜಾ ಖಾದ್ರಿ, ಗದಗ ಗ್ರಾಮೀಣ ಸಿಪಿಐ ಸಿದ್ದರಾಮೇಶ ಗಡೇದ ಸಿಬ್ಬಂದಿಯೊಂದಿಗೆ ಬಂದು ಗೊಬ್ಬರ ವಿತರಿಸಲಾದ ಘಟನೆದಲ್ಲಿ ನಡೆಯಿತು.

ಸರದಿಯಲ್ಲಿ ಮಹಿಳೆಯರು, ವಯೋವೃದ್ಧರು, ಯುವಕರು, ಮಕ್ಕಳು ಹೀಗೆ ಮನೆ ಮಂದಿಯಲ್ಲ ಆಧಾರ ಕಾರ್ಡ್ ಹಿಡಿದು ನೂರಾರು ಜನ ಗೊಬ್ಬರಕ್ಕಾಗಿ ಸರದಿಗೆ ಇಳಿದರು.

ಎರಡು ಚೀಲ ಗೊಬ್ಬರ ಸಾಕಾಗುತ್ತಿಲ್ಲ:ಒಬ್ಬ ರೈತರಿಗೆ ಎರಡು ಚೀಲ ಗೊಬ್ಬರ ಸಾಕಾಗುತ್ತಿಲ್ಲ. ಇದನ್ನು ಒಯ್ದು ಯಾವ ಮೂಲೆಗೆ ಹಾಕಬೇಕು ಎಂದು ಕೆಲ ರೈತರು ಗೊಣಗಿದರೆ ಇನ್ನು ಕೆಲ ರೈತರು ತಾಸುಗಟ್ಟಲೆ ಕಾಯ್ದು ಸರ್ಕಾರ, ಸಚಿವರಿಗೆ ಹಾಗೂ ಅಧಿಕಾರಿಗಳಿಗೆ ಹಿಡಿಶಾಪ ಹಾಕುತ್ತಾ ಗೊಬ್ಬರ ಸಿಗದೆ ಬರಿಗೈಯಲ್ಲಿ ಮನೆ ಸೇರಿಕೊಳ್ಳುವಂತಾಯಿತು.

ಆಧಾರ ಕಾರ್ಡ್‌ ತೆಗೆದುಕೊಂಡು ರಾತ್ರಿ 3 ಕ್ಕೆ ಸರದಿಗೆ ಬಂದು ನಿಂತರೆ ಗೊಬ್ಬರ ಸಿಗಲಿಲ್ಲ. ಸರಿಯಾಗಿ ಗೊಬ್ಬರ ಪೂರೈಕೆಯಾಗುತ್ತಿಲ್ಲ. ಇದರಿಂದ ಬೆಳೆಗಳು ಕುಂಠಿತವಾಗುತ್ತಿವೆ. ರೈತರು ಕಂಗಾಲಾಗುತ್ತಿದ್ದಾರೆ. ಸಮರ್ಪಕ ಗೊಬ್ಬರ ಪೂರೈಸದಿದ್ದಲ್ಲಿ ಹೋರಾಟಕ್ಕಿಳಿಯಬೇಕಾಗುತ್ತದೆ ಎಂದು ಸ್ಥಳೀಯ ರೈತರು ತಿಳಿಸಿದ್ದಾರೆ.