ಲಕ್ಷ್ಮೀ ಬೆಳ್ಳಿ ಮುಖವಾಡವನ್ನು ಕಳಸದ ಮೇಲೆ ಕೂರಿಸಿ ಸೀರೆ ಉಡಿಸಿ ಲಕ್ಷ್ಮೀ ಅಲಂಕಾರ ಮಾಡಿ ನಮ್ಮ ಮನೆಯಲ್ಲಿ ಸದಾ ಲಕ್ಷ್ಮೀ ನೆಲಸಲೆಂದು ಶ್ರದ್ಧಾ ಭಕ್ತಿಯಿಂದ ಪೂಜೆ ಪುನಸ್ಕಾರಗಳನ್ನು ನೆರವೇರಿಸಿದರು.
ಮಧುಗಿರಿ: ನಗರ ಮತ್ತು ತಾಲೂಕಿನಾದ್ಯಂತ ಶುಕ್ರವಾರ ವರಮಹಾಲಕ್ಷ್ಮಿ ಹಬ್ಬವನ್ನು ಅತ್ಯಂತ ಸಡಗರ ಸಂಭ್ರಮದಿಂದ ಆಚರಿಸಲಾಯಿತು. ವರಮಹಾಲಕ್ಷ್ಮೀ ವಿಶೇಷವಾದ ಹಬ್ಬವಾಗಿರುವುದರಿಂದ ಬೆಳಗ್ಗೆಯಿಂದಲೇ ಮಹಿಳೆಯರು ಲವಲವಿಕೆ, ಸಡಗರ - ಸಂಭ್ರಮದಿಂದ ಮನೆಯಲ್ಲಿ ಲಕ್ಷ್ಮಿ ಪೂಜೆ, ಸಿಹಿ ಖಾದ್ಯಗಳನ್ನು ಮಾಡಿ ಶ್ರದ್ಧಾಭಕ್ತಿಯಿಂದ ಆಚರಿಸಿದರು. ಲಕ್ಷ್ಮೀ ಬೆಳ್ಳಿ ಮುಖವಾಡವನ್ನು ಕಳಸದ ಮೇಲೆ ಕೂರಿಸಿ ಸೀರೆ ಉಡಿಸಿ ಲಕ್ಷ್ಮೀ ಅಲಂಕಾರ ಮಾಡಿ ನಮ್ಮ ಮನೆಯಲ್ಲಿ ಸದಾ ಲಕ್ಷ್ಮೀ ನೆಲಸಲೆಂದು ಶ್ರದ್ಧಾ ಭಕ್ತಿಯಿಂದ ಪೂಜೆ ಪುನಸ್ಕಾರಗಳನ್ನು ನೆರವೇರಿಸಿದರು. ಮನೆಯಲ್ಲಿ ಹೋಳಿಗೆ (ಹೊಬ್ಬಟ್ಟು) ಮುಂತಾದ ಖಾದ್ಯಗಳನ್ನು ಮಾಡಿ ಮನೆ ಮಂದಿಯಲ್ಲಾ ಹಬ್ಬದೂಟ ಮಾಡಿದರು. ನಂತರ ಸಂಜೆ ವೇಳೆಗೆ ಮುತ್ತೈದೆಯರನ್ನು ಮನೆಗೆ ಕರೆದು ಅರಿಶಿಣ, ಕುಂಕುಮ, ಬಳೆ ಮೊದಲಾದ ಮಂಗಳ ದ್ರವ್ಯಗಳನ್ನು ಬಾಗಿನದಲ್ಲಿರಿಸಿ ನೀಡಿದರು. ಲಕ್ಷ್ಮೀ ಕೂರಿಸಿ ಪೂಜಿಸುವುದರಿಂದ ಮನೆ ಹೆಣ್ಣುಮಕ್ಕಳಿಗೆ ಒಳ್ಳೆಯದಾಗುತ್ತದೆ ಎಂಬ ನಂಬಿಕೆ ನಡೆದು ಬಂದಿದೆ.
