ತರಕಾರಿ ಮಾರುವ ಮಗಳ ಮುಡಿಗೇರಿದ ನಾಲ್ಕು ಚಿನ್ನದ ಪದಕಗಳು!

ಬಳ್ಳಾರಿ: ವಿಶ್ವವಿದ್ಯಾಲಯದ ಪ್ರಾಧ್ಯಾಪಕಿಯಾಗಿ ಸೇವೆ ಮಾಡಬೇಕು ಎಂಬ ಕನಸಿದೆ. ಬಡತನ ನಡುವೆಯೂ ನನ್ನ ಓದಿಗೆ ಯಾವುದೇ ಸಮಸ್ಯೆಯಾಗದಂತೆ ನೋಡಿಕೊಂಡ ನನ್ನ ತಾಯಿ ನಾಗಮ್ಮಳೇ ವಿವಿಯ ನಾಲ್ಕು ಚಿನ್ನದ ಪದಕ ಪಡೆಯಲು ದೊಡ್ಡ ಪ್ರೇರಣೆ.

ನನ್ನಮ್ಮ ತರಕಾರಿ ಮಾರಿ ನಮ್ಮನ್ನು ಓದಿಸಿದ್ದಾಳೆ. ಅವರ ಆಶಯದಂತೆಯೇ ಮೊದಲಿನಿಂದಲೂ ಓದಿನಲ್ಲಿ ಮುಂದಿದ್ದೆ. ಪಿಯುಸಿಯಲ್ಲಿ ನಮ್ಮೂರಿಗೆ (ತೆಕ್ಕಲಕೋಟೆ) ನಾನೇ ಅತಿ ಹೆಚ್ಚು ಅಂಕ ಪಡೆದ ವಿದ್ಯಾರ್ಥಿಯಾಗಿದ್ದೆ. ಪಿಜಿಯಲ್ಲಿ ಚಿನ್ನದ ಪದಕ ಪಡೆಯಲೇಬೇಕು ಎಂದು ನಿರ್ಧರಿಸಿದ್ದೆ. ಸತತ ಓದು, ಪ್ರಾಧ್ಯಾಪಕರ ಮಾರ್ಗದರ್ಶನ ನನಗೆ ಹೆಚ್ಚು ಸಹಕಾರಿಯಾಯಿತು ಎಂದು ಹಂಸಾ ತಿಳಿಸಿದರು.

ತಾಯಿ ನಾಗಮ್ಮ ಅವರು ಮಗಳ ಸಾಧನೆಯ ಬಗ್ಗೆ ಸಂತಸ ವ್ಯಕ್ತಪಡಿಸಿದರಲ್ಲದೆ ಮಕ್ಕಳ ಓದಿಗೆ ನಾನೆಂದೂ ಕೊರತೆ ಮಾಡಲಿಲ್ಲ ಎನ್ನುತ್ತಲೇ ಕಣ್ಣಾಲಿಗೆ ತುಂಬಿಕೊಂಡರು.

ಬಳ್ಳಾರಿ ವಿಜಯನಗರ ಶ್ರೀಕೃಷ್ಣದೇವರಾಯ ವಿವಿಯ ಔದ್ಯೋಗಿಕ ರಸಾಯನಶಾಸ್ತ್ರ ವಿಭಾಗದ (ಎಂಎಸ್ಸಿ) ರಾಜೇಶ್ವರಿ ಮೂರು ಚಿನ್ನದ ಪದಕಗಳನ್ನು ಪಡೆದು ಗಮನ ಸೆಳೆದಿದ್ದಾರೆ.

ಮೂರು ಚಿನ್ನದ ಪದಕ ಪಡೆಯಲು ಪೋಷಕರ ಪ್ರೋತ್ಸಾಹ ಪ್ರಾಧ್ಯಾಪಕರ ಮಾರ್ಗದರ್ಶನ ಹಾಗೂ ವಿವಿಯ ಗ್ರಂಥಾಲಯವೇ ಕಾರಣ. ಹೆಚ್ಚು ಸಮಯವನ್ನು ಗ್ರಂಥಾಲಯದಲ್ಲಿ ಕಳೆದಿದ್ದೇನೆ ಎಂದರು. ಗೋಲ್ಡ್ ಮೆಡಲ್ ತೆಗೆದುಕೊಳ್ಳುವುದು ನನ್ನ ಕನಸಾಗಿತ್ತು. ಹೀಗಾಗಿಯೇ ಸತತ ಅಧ್ಯಯನ ಮಾಡಿದೆ. ಫಲ ಸಿಕ್ಕಿತು ಎಂದು ಸಂತಸಗೊಂಡರು.