ಸರ್ಕಾರಿ ಶಾಲೆಗಾಗಿ ಗ್ರಾಮಸ್ಥರ ಪ್ರತಿಭಟನೆ

ಕನ್ನಡಪ್ರಭ ವಾರ್ತೆ ಟೇಕಲ್

ತೊರಹಳ್ಳಿ ಗ್ರಾಮದಲ್ಲಿ ಸರ್ಕಾರಿ ಶಾಲಾ ಕಟ್ಟಡ ನಿರ್ಮಿಸುತ್ತಿರುವಾಗ ಗ್ರಾಮಸ್ಥರೊಬ್ಬರು ಈ ಸ್ಥಳ ತಮಗೆ ಸೇರಿದ್ದೆಂದು ನ್ಯಾಯಾಲಯದಲ್ಲಿ ದಾವೆ ಹೂಡಿದ್ದಾರೆ. ತಕ್ಷಣ ಶಾಲಾ ಕಟ್ಟಡದ ಕಾಮಗಾರಿ ನಿಲ್ಲಿಸಲು ನ್ಯಾಯಾಲಯ ಸೂಚಿಸಿತ್ತು. ಈ ಹಿನ್ನಲೆಯಲ್ಲಿ ಒಂದು ತಿಂಗಳಾದರು ಈ ಬಗ್ಗೆ ಅಧಿಕಾರಿಗಳು ಗಮನಹರಿಸದಿದ್ದಾಗ ಶಾಲಾ ಪೋಷಕರು, ಗ್ರಾಮಸ್ಥರು ಕಂಗಲಾಗಿ ನಮ್ಮೂರಿಗೆ ಶಾಲೆ ಬೇಕೆಂದು ಪಟ್ಟು ಹಿಡಿದಿದ್ದಾರೆ.ಶಾಲಾ ಕಟ್ಟಡಕ್ಕಾಗಿ ಪಟ್ಟು

ಈ ವೇಳೆ ಸ್ಥಳಕ್ಕೆ ಮಾಲೂರು ಕ್ಷೇತ್ರ ಶಿಕ್ಷಣಾಧಿಕಾರಿ ಚಂದ್ರಕಲಾ, ಹುಳದೇನಹಳ್ಳಿ ಪಂಚಾಯ್ತಿ ಪಿಡಿಒ ಸೋಮೇಶ, ಮಾಸ್ತಿ ಪಿಐ ರಾಮಪ್ಪಗುತ್ತೆದಾರ್, ಸ್ಥಳಕ್ಕೆ ಆಗಮಿಸಿ ಅವರ ಜೊತೆಗೆ ಮಾತುಕತೆ ನಡೆಸಲಾಯಿತು. ಈ ವಿಚಾರವು ನ್ಯಾಯಾಲಯದಲ್ಲಿ ಇರುವುದರಿಂದ ಸಮುದಾಯ ಭವನದಲ್ಲಿ ಶಾಲೆ ನಡೆಯುವಂತೆ ಮಾಡಲಾಗುವುದೆಂದು ಪಿಡಿಒ ಮತ್ತು ಬಿಇಒ ತಿಳಿಸಿದ ಮೇಲೆ ಪ್ರತಿಭಟನೆಯನ್ನು ಕೈಬಿಡಲಾಯಿತು. ಪ್ರತಿಭಟನೆಯಲ್ಲಿ ರೈತ ಸಂಘದ ನಲ್ಲಂಡಹಳ್ಳಿ ಶ್ರೀಧರ್, ತೊರಹಳ್ಳಿ ಗ್ರಾಮದ ಶ್ರೀಧರ್‌ಮೂರ್ತಿ, ಮುರಳಿ, ಮುನಿಕೃಷ್ಣ, ಸುಬ್ರಮಣಿ, ಮತ್ತಿತರರು ಭಾಗವಹಿಸಿದ್ದರು.