ಕಸಾಪದಿಂದ ಮತ ಕಾವ್ಯದ ಮೂಲಕ ಮತದಾನ ಜಾಗೃತಿ

ಹೂವಿನಹಡಗಲಿ: ಮತದಾನ ಮಾಡಿ ಭಾರ ಇಳಿಸುವವನಿಗೆ, ಕಣ್ಣೀರು ಒರೆಸುವವನಿಗೆ, ನಿಮ್ಮ ಬೆರಳಿನ ನೀಲಿ ಶಾಹಿಯಿಂದ ಬೆಳಕಿನ ರಾಜಕುಮಾರ ಮೂಡಿಬರಲಿ ಎಂದು ಹೂವಿನಹಡಗಲಿಯಲ್ಲಿ ಮತದಾನ ಜಾಗೃತಿ ಮೂಡಿಸಲಾಯಿತು.

ಮತ ಚಲಾಯಿಸಿ ಮತಿಯಿಂದ, ಜಾತಿ ಮತಗಳ ಬದಿಗಿರಿಸಿ, ಭಯ ಬಿಡಿ ಮತದಾನ ಮಾಡಿ, ಚುನಾವಣೆ ಪ್ರಜಾಪ್ರಭುತ್ವದ ಉಯ್ಯಾಲೆ, ಮತದಾನದಲ್ಲಿ ಭಾಗವಹಿಸಿ ದೇಶದ ಹಿತ ಕಾಪಾಡಿ, ಮತದಾನವು- ಹಬ್ಬ, ಫಲಿತಾಂಶವು-ಸುಗ್ಗಿ, ಮತದಾನದಲ್ಲಿ ಭಾಗವಹಿಸದಿದ್ದರೆ ನೀವು ಇದ್ದೂ ಇಲ್ಲದಂತೆ, ಚುನಾವಣೆ 5 ವರ್ಷಕ್ಕೊಮ್ಮೆ ಬರುವ ದೇಶದ ಹಬ್ಬ. ಈ ಹಬ್ಬ ಆಚರಣೆಗೆ ದುರ್ಬಲರಿಗೆ, ವಿಕಲಚೇತನರಿಗೆ ಸಾಕಷ್ಟು ಅನುಕೂಲ ಕಲ್ಪಿಸಿದೆ ಆಯೋಗ, ಮತದಾನ ಅಗತ್ಯ, ಜಗದ ಕತ್ತಲು ಅಳಿಸಲು, ಸುಭದ್ರ ದೇಶದ ನಿರ್ಮಾಣ ಮಾಡಲು, ಒಂದು ದಿನದ ಆಸೆ ಆಮಿಷ ಬದಿಗಿರಿಸಿ ನಿಷ್ಪಕ್ಷಪಾತವಾಗಿ ಮತ ಚಲಾಯಿಸಿ, ಮಾಡಬೇಕು ಮತದಾನ ಕಲ್ಯಾಣ ರಾಜ್ಯ ನಿರ್ಮಾಣವಾಗಲು, ಮತ ಚಲಾಯಿಸಿ ಪ್ರಜಾಪ್ರಭುತ್ವದ ತೇರನೆಳೆಯೋಣ, ಮತಗಳು ಅಭಿವೃದ್ಧಿಯ ಪಥಗಳು ಹೀಗೆ ಮತದಾನ ಜಾಗೃತಿ ಕುರಿತು ಹಿರಿ ಕಿರಿ ಕವಿಗಳನ್ನು ತಮ್ಮದೇ ಆದ ದಾಟಿಯಲ್ಲಿ ಮತ ಕಾವ್ಯಗಳನ್ನು ವಾಚಿಸಿ ಎಲ್ಲರ ಗಮನ ಸೆಳೆದರು.

ಹಿರಿಯ ಸಾಹಿತಿ ಪಿ.ಕರಿವೀರನಗೌಡ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ಎಲ್ಲರೂ ತಪ್ಪದೇ ಮತದಾನ ಮಾಡಿ ಪ್ರಜಾತಂತ್ರದ ಹಬ್ಬವನ್ನು ಯಶಸ್ವಿಗೊಳಿಸಲು ಕರೆ ನೀಡಿದರು.

ಪುರಸಭೆಯ ವ್ಯವಸ್ಥಾಪಕ ಉಮೇಶ್ ಹಿರೇಮಠ ಮಾತನಾಡಿ, ಪ್ರತಿಯೊಂದು ಮತವು ಅಮೂಲ್ಯ, ಸರ್ವರೂ ಜನತಂತ್ರ ಗಟ್ಟಿಗೊಳಿಸುವ ಮತದಾನ ಕಾರ್ಯಕ್ರಮದಲ್ಲಿ ಭಾಗವಹಿಸಬೇಕಿದೆ ಎಂದರು.

ಸಂಗೀತ ಶಿಕ್ಷಕ ಬಿ.ಯುವರಾಜಗೌಡ ಪ್ರಾರ್ಥಿಸಿದರು. ವಿ.ಭೀಮಾನಾಯ್ಕ ಸ್ವಾಗತಿಸಿದರು. ಜಿಲ್ಲಾ ಚುನಾವಣಾ ತರಬೇತುದಾರ ಎ.ಕೊಟ್ರಗೌಡ ಪ್ರಾಸ್ತಾವಿಕ ಮಾತನಾಡಿದರು. ಯುವರಾಜಗೌಡ ಹಾಗೂ ಎ.ಚಂದ್ರಪ್ಪ ಇವರು ಮತದಾನ ಜಾಗೃತಿ ಗೀತೆಗಳ ಗಾಯನ ಜನಮನ ಸೂರೆಗೊಂಡಿತು.