ಕವಿತಾಳ ಕೆಲ ವಾರ್ಡಲ್ಲಿ ನೀರು ಸಮಸ್ಯೆ; ಜನರ ಅಲೆದಾಟ

ಕನ್ನಡಪ್ರಭ ವಾರ್ತೆ ಕವಿತಾಳ

1,9,12,13,14ನೇ ವಾರ್ಡ್‌ಳಿಗೆ ಕೊಳವೆಬಾವಿ ನೀರು ಪೂರೈಸುವ ಪೈಪ್‌ಗಳಲ್ಲಿ ಮರದ ಬೇರುಗಳು ಬೆಳೆದು ನೀರು ಸರಬರಾಜು ಬಂದ್ ಆಗಿದೆ, 1 ಮತ್ತು 13 ನೇ ವಾರ್ಡ್‌ಗಳಿಗೆ ಸಂಪೂರ್ಣ ಕೊಳವೆಬಾವಿ ನೀರನ್ನೇ ಸರಬರಾಜು ಮಾಡಲಾಗುತ್ತಿದ್ದು ಇದೀಗ ನೀರು ಪೂರೈಕೆ ಸಂಪೂರ್ಣ ಸ್ಥಗಿತವಾದ ಹಿನ್ನೆಲೆಯಲ್ಲಿ ವಾರ್ಡ್ ಜನರು ಕೊಡ ಹಿಡಿದುಕೊಂಡು ನೀರಿಗಾಗಿ ಅಲೆಯುವಂತಾಗಿದೆ. ಅದೇ ರೀತಿ 9, 12 ಹಾಗೂ 14ನೇ ಕೆಲವು ಓಣಿಗಳಿಗೆ ಕೆರೆ ನೀರಿನ ಜೊತೆಗೆ ಪ್ರತ್ಯೇಕವಾಗಿ ಇದೇ ಕೊಳವೆ ಬಾವಿ ನೀರು ಪೂರೈಸುತ್ತಿದ್ದು ಅಲ್ಲಿಯೂ ನೀರು ಸರಬರಾಜು ಸ್ಥಗಿತವಾಗಿ ಮಹಿಳೆಯರು ಬೇರೆ ಓಣಿಗಳಿಂದ ನೀರು ತರುವಂತಾಗಿದೆ.

ಪಟ್ಟಣ ಪಂಚಾಯಿತಿ ಇಂಜಿನಿಯರ್ ಮತ್ತು ಅಧಿಕಾರಿಗಳ ನಿರ್ಲಕ್ಷ ಸದಸ್ಯರ ಅಸಹಾಯಕತೆ ನಡುವೆ ವಾರ್ಡ್ ಜನರು ಹನಿ ನೀರಿಗಾಗಿ ಪರದಾಡುವಂತಾಗಿದೆ. ಹೊಲ, ಮನಿ ಕೆಲಸ ಬಿಟ್ಟು ಬೆಳಗ್ಗೆಯಿಂದ ನೀರಿಗಾಗಿ ಅಲೆಯುವಂತಾಗಿದೆ. ಪೈಪ್ ದುರಸ್ತಿ ಮಾಡುವ ಬಗ್ಗೆ ಅಧಿಕಾರಿಗಳು ಕಾಳಜಿ ತೋರಬೇಕು ಎಂದು ಮಹಿಳೆಯರು ಆಗ್ರಹಿಸಿದರು.