ಅವಳಿ ನಗರದಲ್ಲಿ ಚಳಿಗಾಲದಲ್ಲಿಯೂ ನೀರಿಗೆ ಹಾಹಾಕಾರ

ಗದಗ: ಗದಗ-ಬೆಟಗೇರಿಯಲ್ಲಿ ಕುಡಿವ ನೀರಿನ ತೀವ್ರ ಕೊರತೆ ಉಂಟಾಗಿದ್ದು, 20 ದಿನಗಳಾದರೂ 35 ವಾರ್ಡ್‌ಗಳಿಗೆ ನೀರು ಪೂರೈಕೆಯಾಗಿಲ್ಲ. ಸಾರ್ವಜನಿಕರು ಹನಿ ನೀರಿಗೂ ಪರದಾಡುವಂತಾಗಿದೆ.

ಪ್ರಭಾವಿಗಳ ಊರಲ್ಲಿ ಹನಿ‌ ನೀರಿಲ್ಲ: ರಾಜ್ಯದ ಪ್ರಭಾವಿ ಸಚಿವ ಎಚ್.​ಕೆ. ಪಾಟೀಲರ ತವರು ಕ್ಷೇತ್ರವಾದ ಗದಗ ನಗರದಲ್ಲಿ ಕುಡಿವ ನೀರು ತಿಂಗಳು ಕಳೆದರೂ ಪೂರೈಕೆಯಾಗದೇ ಇರುವುದು ಅವಳಿ ನಗರದ ಜನರ ದೌರ್ಭಾಗ್ಯವೇ ಸರಿ‌. ಅವಳಿ ನಗರದ ನೀರಿನ ಸಮಸ್ಯೆ ಕುರಿತು ಸಚಿವರು ಇದುವರೆಗೂ ಎಲ್ಲ ಸದಸ್ಯರು, ಅಧಿಕಾರಿಗಳ ಸಭೆಯನ್ನು ಕನಿಷ್ಟ ಒಂದೇ ಬಾರಿ ನಡೆಸಿ ಅಧಿಕಾರಿಗಳಿಗೆ ಚುರುಕು ಮುಟ್ಟಿಸಿಲ್ಲ. ಇದಕ್ಕೆ ಕಾರಣ ನಗರಸಭೆಯಲ್ಲಿ ಬಿಜೆಪಿ ಬಹುಮತ ಹೊಂದಿದೆ ಎಂದು ಅವರಿಗೆ ಅಸೂಯೆ ಇದೆ ಎನ್ನುತ್ತಾರೆ ಬಿಜೆಪಿ ಸದಸ್ಯರು.

ದುರಸ್ಥಿಯಿಂದ ಸಮಸ್ಯೆ: ಗದಗ-ಬೆಟಗೇರಿ ಅವಳಿ ನಗರಕ್ಕೆ ನೀರು ಒದಗಿಸಲು 24*7 ಹೆಸರಿನಲ್ಲಿ ₹500 ಕೋಟಿ ಯೋಜನೆ ರೂಪಿಸಿ ಕಾಮಗಾರಿ ಪೂರ್ಣಗೊಳ್ಳುವ ಮೊದಲೇ ಉದ್ಘಾಟನೆ ಮಾಡಿರುವ ಹಿನ್ನೆಲೆಯಲ್ಲಿ ಪದೇ ಪದೇ ಪೈಪ್ ಲೈನ್ ಒಡೆದು ನೀರು ಪೂರೈಕೆಯಲ್ಲಿ ತೊಂದರೆಯಾಗುತ್ತಿದೆ. ಇದಕ್ಕೆ ಹಿಂದೆ ಅಧಿಕಾರ ನಡೆಸಿದ ಕಾಂಗ್ರೆಸ್ ಆಡಳಿತದ ವೈಫಲ್ಯವೇ ಕಾರಣ ಎನ್ನುತ್ತಾರೆ ಬಿಜೆಪಿ ಸದಸ್ಯರು.