ಬದಲಾದ ಕಾನೂನಿಗೆ ನಾವು ಹೊಂದಿಕೊಳ್ಳಬೇಕು

ಕನ್ನಡಪ್ರಭ ವಾರ್ತೆ ಅರಸೀಕೆರೆ

ನಗರದ ನ್ಯಾಯಾಲಯ ಆವರಣದಲ್ಲಿರುವ ಸಭಾಂಗಣದಲ್ಲಿ ಕಳೆದ ಮೂರು ದಿನಗಳಿಂದ ಕರ್ನಾಟಕ ರಾಜ್ಯ ವಕೀಲರ ಪರಿಷತ್ತು, ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರ, ಅರಸೀಕೆರೆ ವಕೀಲರ ಸಂಘ, ತಾಲೂಕು ಕಾನೂನು ಸೇವೆಗಳ ಪ್ರಾಧಿಕಾರ ಸಂಯುಕ್ತಾಶ್ರಯದಲ್ಲಿ ವಕೀಲರಿಗಾಗಿ ಆಯೋಜಿಸಲಾಗಿದ್ದ ಮೂರು ದಿನಗಳ ಕಾನೂನು ಕಾರ್ಯಾಗಾರ ಸಮಾರೋಪ ಸಮಾರಂಭ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ಉತ್ತಮ ವಿಷಯಗಳನ್ನಾಧರಿಸಿ ಆಯೋಜಿಸಿರುವ ಕಾನೂನು ಕಾರ್ಯಾಗಾರ ಸದುಪಯೋಗ ಮಾಡಿಕೊಳ್ಳಿ ಒಂದು ದಿನಕ್ಕೆ ಮಾತ್ರ ಇಂತಹ ಕಾರ್ಯಾಗಾರಗಳು ಸೀಮಿತವಾಗಬಾರದು, ಪ್ರತಿ ದಿನಗಳೂ ಕಲಿಕಾ ದಿನಗಳಾಗಬೇಕು. ಸಾರ್ವಜನಿಕ ಕ್ಷೇತ್ರದ ಹಕ್ಕುಗಳನ್ನು ಸಂರಕ್ಷಿಸಲು ಕಾನೂನು ಅರಿವು ಮೂಡಿಸಿಕೊಳ್ಳುವುದು ಅನಿವಾರ್ಯವಾಗಿದೆ ಎಂದರು.

ಹೊಸದಾಗಿ ಬಂದಿರುವ ಯುವ ವಕೀಲರು ಹಿರಿಯ ವಕೀಲರ ಸಹಕಾರ, ಮಾರ್ಗದರ್ಶನ ಮತ್ತು ಅನುಭವವನ್ನು ಪಡೆಯಲು ಮುಂದಾಗಬೇಕು. ಯುವ ವಕೀಲರು ನ್ಯಾಯಾಧೀಶರಾಗಲು ಪ್ರಯತ್ನಿಸಿ. ಅನೇಕ ತರಬೇತಿ ಪಡೆದು ನ್ಯಾಯಧೀಶರಾಗಬಹುದು. ನ್ಯಾಯಾಲಯಗಳಲ್ಲಿ ಗ್ರಾಮೀಣ ಪ್ರದೇಶಗಳ ಜನತೆ ಪ್ರಕರಣಗಳು ಹೆಚ್ಚಾಗಿರುತ್ತದೆ. ಅವರ ಪ್ರಕರಣಗಳಲ್ಲಿ ನ್ಯಾಯ ಸಿಗುವ ಮಟ್ಟದಲ್ಲಿ ನೂತನ ಕಾನೂನುಗಳ ಅನುಷ್ಠಾನ ಅರಿವು ಮೂಡಿಸಿಕೊಳ್ಳಲು ಎಲ್ಲ ವಕೀಲರು ಮುಂದಾಗಬೇಕು ಎಂದು ಕರೆ ನೀಡಿದರು.

ಸ್ವಾಮಿ ವಿವೇಕಾನಂದ ಮತ್ತು ಬಸವೇಶ್ವರ ದಾರ್ಶನಿಕರ ಪಂಚ ಮಂತ್ರಗಳಾದ ಶಿಸ್ತು, ಶ್ರಮ, ಸಮಯ ಪ್ರಜ್ಞೆ, ಆತ್ಮ ವಿಶ್ವಾಸ, ನಿರ್ಭಯತೆ ಅಥವಾ ಧೈರ್ಯ ದೊಂದಿಗೆ ನೊಂದವರಿಗೆ ಕೆಡುಕು ಆಗದಂತೆ ಪ್ರಕರಣಗಳ ಸಂಬಂಧ ನ್ಯಾಯ ಸಿಕ್ಕಾಗ ಮಾತ್ರ ನ್ಯಾಯಾಂಗ ವ್ಯವಸ್ಥೆ ಮೇಲೆ ಕಕ್ಷಿಗಾರನಿಗೆ ನಂಬಿಕೆ ವಿಶ್ವಾಸ ಮೂಡುತ್ತದೆ. ಮೂರು ದಿನಗಳ ಕಾನೂನು ಕಾರ್ಯಗಾರ ಕೃಷಿ ತರಭೇತಿಯಲ್ಲಿ ಪಡೆದ ಮಾಹಿತಿ ಮತ್ತು ಜ್ಞಾನ ಸಂಪತ್ತು ಸದುಪಯೋಗ ಆಗಲಿ.ನಮ್ಮೇಲ್ಲರ ಕಾರ್ಯ ಚಟುವಟಿಗಳು ಭಾರತದ ಸಂವಿಧಾನ ಅಡಿಯಲ್ಲೇ ನಡೆಯುತ್ತದೆ. ಕಾನೂನು ಅರಿವು ನಿರಂತರವಾಗಲಿ, ಸದುಪಯೋಗ ಆಗಲಿ ಎಂದು ತಿಳಿಸಿದರು.

ಜಿಲ್ಲಾ ಪ್ರಧಾನ ಮತ್ತು ಸತ್ರ ನ್ಯಾಯಾಧೀಶರಾದ ಉಷರಾಣಿ ಮಾತನಾಡಿ, ಹೆಣ್ಣುಮಕ್ಕಳು ವಕೀಲ ವೃತ್ತಿಗೆ ಹೊಂದುಕೊಳ್ಳದ ಕಾಲವೊಂದಿತ್ತು. ಮೊಬೈಲ್ ಕಂಪ್ಯೂಟರ್‌ ಇಂಟರ್ ನೆಟ್ ಇಲ್ಲದ ಕಾಲದ ವಕೀಲ ತರಬೇತಿ ಕಷ್ಟಕರವಾಗಿತ್ತು. ಇಂದು ಕಾಲ ಬದಲಾಗಿದೆ. ಹೆಣ್ಣುಮಕ್ಕಳು ವಕೀಲ ವೃತ್ತಿಗೆ ಹೆಚ್ಚು ಹೆಚ್ಚು ಬರುತ್ತಿದ್ದಾರೆ. ಎಲ್ಲ ಕ್ಷೇತ್ರಗಳಲ್ಲೂ ಮುಂಚೂಣಿಯಲ್ಲಿರುವ ಮಹಿಳೆಯರು ನ್ಯಾಯಾಂಗ ಕ್ಷೇತ್ರದಲ್ಲೂ ಮುಂಚೂಣಿಗೆ ಬರಬೇಕು. ಮೂರು ದಿನಗಳ ಕಾಲ ನಡೆದ ಕಾರ್ಯಾಗಾರವನ್ನು ಎಲ್ಲರೂ ಸದುಪಯೋಗ ಪಡೆದುಕೊಳ್ಳಬೇಕು ಎಂದರು.