ಕ್ರಿಯಾಶೀಲ ಚಿಂತನೆ ಮಾಡದ ಯುವಕರಿಂದ ದೇಶ ಏನನ್ನು ನಿರೀಕ್ಷಿಸಲು ಸಾಧ್ಯವಿಲ್ಲ-ಡಾ. ವೈದ್ಯ

ಬ್ಯಾಡಗಿ:ಕ್ರಿಯಾಶೀಲ ಚಿಂತನೆ ಮಾಡದೇ ಗುಲಾಮಗಿರಿಗೆ ಒಳಗಾಗುತ್ತಿರುವ ದೇಶದ ಯುವಕರು ಕೇಸರಿ, ಕೆಂಪು, ನೀಲಿ, ಹಸಿರು, ಬಿಳಿ ಬಾವುಟಗಳ ಮುಖವಾಡಗಳಲ್ಲಿ ಹುದುಗಿ ಹೋಗುತ್ತಿದ್ದಾರೆ. ಇಂತಹವರಿಂದ ದೇಶ ಏನನ್ನೂ ನಿರೀಕ್ಷಿಸಲು ಸಾಧ್ಯವಿಲ್ಲ. ದೇಶದ ಸಾಂಸ್ಕೃತಿಕ ರಾಯಭಾರಿ ಸ್ವಾಮಿ ವಿವೇಕಾನಂದರು ಕಳೆದ ಏಳೆಂಟು ದಶಕಗಳ ಹಿಂದೆ ದೇಶದ ಯುವಕರನ್ನು ಎಚ್ಚರಿಸುವ ಕೆಲಸ ಮಾಡಿದ್ದಾರೆ ಎಂದು ಬಿಇಎಸ್ ಎಂ ಕಾಲೇಜು ಪ್ರಾಚಾರ್ಯ ಡಾ.ಎಸ್.ಜಿ. ವೈದ್ಯ ಅಭಿಪ್ರಾಯ ವ್ಯಕ್ತಪಡಿಸಿದರು.

ಉಕ್ಕಿನ ದೇಹ-ಕಬ್ಬಿಣದ ನರಮಂಡಲದ-ದೃಢ ಮತ್ತು ಕಠಿಣ ಮನಸ್ಸನ್ನು ಭಾರತದ ಯುವಶಕ್ತಿ ಹೊಂದಿರಬೇಕು ಎಂದು ಆಶಿಸಿದವರಲ್ಲಿ ಸ್ವಾಮಿವಿವೇಕಾನಂದರು ಮೊದಲಿಗರು. ಆದರೆ ಈಗಿನ ವಾಸ್ತವವೇ ಬೇರೆಯಾಗುತ್ತಿದೆ. ರಕ್ತಕ್ಕೆ-ರಕ್ತ ಕೊಲೆಗೆ ಕೊಲೆ ಈ ಮಣ್ಣಿನ ಈ ನೆಲದ ಗುಣವಲ್ಲ ಎಂದು ಅಭಿಮಾನದಿಂದ ಹೇಳುತ್ತೇನೆ. ಭವಿಷ್ಯದ ದಿನಗಳಲ್ಲಿ ಭಾರತದ ಯುವಕರು ಬಹುದೊಡ್ಡ ಶಕ್ತಿಯಾಗಿ ಗುರ್ತಿಸಿಕೊಳ್ಳುವಂತೆ ಕರೆ ನೀಡಿದರು.

ಬ್ರಹ್ಮಕುಮಾರಿ ಬಿ.ಕೆ. ಸುರೇಖಾ ಅಧ್ಯಕ್ಷತೆ ವಹಿಸಿದ್ದರು. ಅತಿಥಿಗಳಾಗಿ ರೋಟರಿ ಸಂಸ್ಥೆ ಅಸಿಸ್ಟೆಂಟ್ ಗವರ್ನರ್ ಮಂಜುನಾಥ ಉಪ್ಪಾರ, ಕಾರುಣ್ಯ ಸಂಸ್ಥೆ ಅಧ್ಯಕ್ಷ ಬಸವರಾಜ ಹಿರೇಮತ್ತೂರ, ಸ್ನೇಹ ಸದನ ನಿರ್ದೇಶಕಿ ಸಿಸ್ಟರ್ ರೂಪಾ, ರೋಟರಿ ಸ್ಂಸ್ಥೆ ಪರಶುರಾಮ ಮೇಲಗಿರಿ, ಕಿರಣ ಮಾಳೇನಹಳ್ಳಿ, ಸತೀಶ ಅಗಡಿ, ವಿಶ್ವನಾಥ ಅಂಕಲಕೋಟಿ, ಶಿವರಾಜ ಚೂರಿ ಇನ್ನರ್ವ್ಹೀಲ್ ಅಧ್ಯಕ್ಷೆ ಕವಿತಾ ಸೊಪ್ಪಿನಮಠ ಸದಸ್ಯರಾದ ಲಕ್ಷ್ಮೀ ಉಪ್ಪಾರ, ರೂಪಾ ಕಡೇಕೊಪ್ಪ, ಪ್ರತಿಭಾ ಮೇಲಗಿರಿ, ಸುರೇಖಾ ಬೆಟಗೇರಿ ಇನ್ನಿತರರಿದ್ದರು. ಸಂಧ್ಯಾರಾಣಿ ದೇಶಪಾಂಡೆ ಸ್ವಾಗತಿಸಿದರು, ಶಂಭು ಹಾವೇರಿ ನಿರೂಪಿಸಿದರು. ಸುನಂದಾ ಹಿರೇಮಠ, ಎಂ.ಎಫ್.ಕರೇಣ್ಣನವರ, ಬಿ.ಕೆ.ಶಾಂತಾ ನಿರ್ಣಾಯಕರಾಗಿ ಕೆಲಸ ನಿರ್ವಹಿಸಿದರು.