ಮೂರುಸಾವಿರ ಮಠದ ಆಸ್ತಿ ಏನಾಗಿದೆ?

ಹುಬ್ಬಳ್ಳಿ:

ಹಾನಗಲ್‌ ಕುಮಾರೇಶ್ವರ ಮಠದ ಆಸ್ತಿ ಅಡವಿಟ್ಟು ಕೋಟಿಗಟ್ಟಲೇ ಸಾಲ ಮಾಡಿದ್ದಾರೆ ಎನ್ನಲಾಗಿದ್ದು, ಇದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿತ್ತು. ಹಾನಗಲ್‌ ಮಠದ ಹಾನಗಲ್‌, ಅಕ್ಕಿಆಲೂರ, ಹುಬ್ಬಳ್ಳಿ, ಶಿಕಾರಿಪುರ, ಹಾವೇರಿಯಲ್ಲಿನ ಆಸ್ತಿಗಳೆಲ್ಲ ಪರಭಾರೆಯಾಗಿವೆ ಎಂದು ಹೇಳಲಾಗಿದೆ. ಇದು ಅಲ್ಲಿನ ಭಕ್ತರಲ್ಲಿ ಅಸಮಾಧಾನವನ್ನುಂಟು ಮಾಡಿದೆ. ಮಠಕ್ಕೆ ನಾನೇ ಅಧಿಕಾರಿ, ಅಗತ್ಯಕ್ಕೆ ತಕ್ಕಂತೆ ಸಾಲ ಮಾಡಿದ್ದೇನೆ. ಇದರಲ್ಲಿ ಯಾವುದು ಕಾನೂನು ಬಾಹೀರವಾಗಿ ಮಾಡಿಲ್ಲ ಎಂದು ಶ್ರೀಗಳು ಸ್ಪಷ್ಟಪಡಿಸಿದ್ದರಿಂದ ಹುಬ್ಬಳ್ಳಿ ಮಠದ ಭಕ್ತರಲ್ಲಿ ಆತಂಕ ಹೆಚ್ಚಿಸಿದೆ.

ಶ್ರೀಗಳು ಸಾಲಗಾರರೇ?

ಜಿಪಂ ಮಾಜಿ ಸದಸ್ಯೆಯೊಬ್ಬರಿಗೆ ಶ್ರೀಗಳು ಸಾಲ ಕೊಟ್ಟಿದ್ದಾರೆ ಎನ್ನಲಾಗಿದೆ. ಆ ಮಾಜಿ ಸದಸ್ಯೆ ಬೇರೆಯವರಿಂದ ದುಡ್ಡು ಇಸಿದುಕೊಂಡು ಶ್ರೀಗಳಿಗೆ ಕೊಟ್ಟಿದ್ದಾರೆನ್ನಲಾಗಿದೆ. ಆ ಮಾಜಿ ಸದಸ್ಯೆ ಯಾರು? ಎಂದು ಕೂಡ ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ.ಹಿಂದೆ ಉತ್ತರಾಧಿಕಾರಿ ವಿವಾದದ ವೇಳೆಯೂ ಮಠದ ಆಸ್ತಿ ವಿಷಯವಾಗಿ ಚರ್ಚೆಗೆ ಗ್ರಾಸವನ್ನುಂಟು ಮಾಡಿತ್ತು. ಇದೀಗ ಮತ್ತೆ ಹಾನಗಲ್‌ ಮಠದ ಆಸ್ತಿ ಅಡವಿಟ್ಟಿರುವ ವಿಷಯ ಬಯಲಿಗೆ ಬರುತ್ತಿದ್ದಂತೆ ಮತ್ತೆ ಚರ್ಚೆಗೆ ಗ್ರಾಸವನ್ನುಂಟು ಮಾಡಿದೆ. ನಗರದ ಹಿರಿಯರು, ಉನ್ನತಾಧಿಕಾರ ಸಮಿತಿಯಲ್ಲಿರುವವರು ಈ ಬಗ್ಗೆ ಸ್ಪಷ್ಟಪಡಿಸಿ ಭಕ್ತರಲ್ಲಿರುವ ಗೊಂದಲ ಬಗೆಹರಿಸಲು ಕ್ರಮ ಕೈಗೊಳ್ಳಬೇಕೆಂಬುದು ಒಕ್ಕೊರಲಿನ ಆಗ್ರಹ.