ಬಾಡುತ್ತಿರುವ ಬೆಳೆ ಬಸವನಾಡಿನಲ್ಲಿ ಬರದ ಛಾಯೆ!

ಬಸವರಾಜ ಎಸ್. ನಂದಿಹಾಳ

ಪ್ರಸಕ್ತ ಮುಂಗಾರು ಹಂಗಾಮಿನಲ್ಲಿ ಮಳೆಯ ಪ್ರಮಾಣ ಕುಸಿತದಿಂದಾಗಿ ರೈತರ ಆತಂಕ ಹೆಚ್ಚಿದೆ. ತಾಲೂಕಿನಲ್ಲಿ ಆರಂಭದಲ್ಲಿ ಕೆಲವೆಡೆ ಅಲ್ಪಮಳೆ ಸುರಿದಿದ್ದರಿಂದ ಕೆಲ ರೈತರು ತೊಗರಿ, ಮುಸುಕಿನ ಜೋಳ, ಹತ್ತಿ, ಸೂರ್ಯಕಾಂತಿ, ಶೇಂಗಾ, ಸಜ್ಜೆ ಸೇರಿ ಹಲವು ರೈತರು ಬೀಜ ಬಿತ್ತನೆ ಮಾಡಿ ಮಳೆಗಾಗಿ ಕಾಯುತ್ತಿದ್ದಾರೆ. ಮಳೆಯಾಗದೇ ನಾಟಿಯಾದ ಬೆಳೆಗಳು ಬಾಡುತ್ತಿವೆ. ಕೆಲವು ರೈತರು ಜಮೀನು ಹದ ಮಾಡಿಕೊಂಡು ಮಳೆಗಾಗಿ ಕಾಯುತ್ತಿದ್ದು, ದೇವರ ಮೊರೆ ಹೋಗುತ್ತಿದ್ದಾರೆ.ತಾಲೂಕಿನಲ್ಲಿ ಜೂನ್ ಮತ್ತು ಜುಲೈ ತಿಂಗಳಿನಲ್ಲಿ 105.2 ಮಿ.ಮೀ.ವಾಡಿಕೆ ಮಳೆಯಲ್ಲಿ 82.9 ಮಿ.ಮೀ ಮಾತ್ರ ಮಳೆ ಆಗಿದ್ದು, 21.1 ಮಿ.ಮೀ ಮಳೆ ಕೊರತೆಯಾಗಿದೆ. ಮಳೆ ಕೊರತೆಯಿಂದಾಗಿ ಅಂತರ್ಜಲಮಟ್ಟ ಕುಸಿತಗೊಂಡು ಬಾವಿ, ಬೋರವೆಲ್ ನೀರು ಕಡಿಮೆಯಾಗುತ್ತಿದೆ. ನೀರಾವರಿ ಹೊಂದಿರುವ ರೈತರು ಸಹ ಆತಂಕಕ್ಕೆ ಒಳಗಾಗುವಂತಾಗಿದೆ.

ಅಖಂಡ ಬಸವನಬಾಗೇವಾಡಿ ತಾಲೂಕಿನಲ್ಲಿ ಕೃಷಿ ಇಲಾಖೆ 1,33,900 ಹೆಕ್ಟೇರ್ ಬಿತ್ತನೆ ಗುರಿ ಇಟ್ಟುಕೊಳ್ಳಲಾಗಿತ್ತು. ಆದರೆ 77,150 ಹೆಕ್ಟೇರ್ ಪ್ರದೇಶದಲ್ಲಿ ಮಾತ್ರ ಬಿತ್ತನೆಯಾಗಿ ಶೇ.57ರಷ್ಟು ಸಾಧನೆಯಾಗಿದೆ.

ಮುಸುಕಿನ ಜೋಳ 40,092 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಗುರಿಯಲ್ಲಿ 24,158 ಹೆಕ್ಟೇರ್ ಬಿತ್ತನೆ, ಸಜ್ಜೆ 1,622 ಹೆಕ್ಟೇರ್ ಪೈಕಿ 406, ತೊಗರಿ 72,345 ಹೆಕ್ಟೇರ್ ಪೈಕಿ 31,719, ಹೆಸರು 32 ಹೆಕ್ಟೇರ್ ಪೈಕಿ 10, ಶೇಂಗಾ 298 ಹೆಕ್ಟೇರ್ ಪೈಕಿ 19, ಸೂರ್ಯಕಾಂತಿ 3,277 ಹೆಕ್ಟೇರ್ ಪೈಕಿ 961 ಹೆಕ್ಟೇರ್ ಬಿತ್ತನೆ ಮಾಡಲಾಗಿದೆ. ಹತ್ತಿ 3,269 ಹೆಕ್ಟೇರ್ ಗುರಿ ಮೀರಿ 6,877 ಹೆಕ್ಟೇರ್ ಬಿತ್ತನೆಯಾಗಿದೆ. ನಾಟಿ ಕಬ್ಬು 3,110 ಹೆಕ್ಟೇರ್ ಪೈಕಿ 3,168 ಹೆಕ್ಟೇರ್, ಕುಳೆ ಕಬ್ಬು 9,855 ಹೆಕ್ಟೇರ್ ಪೈಕಿ 9,832 ಹೆಕ್ಟೇರ್ ಬಿತ್ತನೆಯಾಗಿದೆ ಎಂದು ಕೃಷಿ ಇಲಾಖೆಯ ತಾಂತ್ರಿಕ ಅಧಿಕಾರಿ ಗಾಯತ್ರಿ ಶಿಂಧೆ ಮಾಹಿತಿ ನೀಡಿದರು.

ಮುಂಗಾರು ಮಳೆ ನಿರೀಕ್ಷೆಯಲ್ಲಿ ಹತ್ತಿ ಬಿತ್ತನೆ ಮಾಡಿದ್ದೆ. ಮುಂಗಾರು ಮಳೆ ನಿರೀಕ್ಷೆಯಷ್ಟು ಬಾರದೇ ಇರುವುದರಿಂದ ಹತ್ತಿ ಬೆಳೆ ಒಣಗಿ ಹೋಗುತ್ತಿದೆ. ಮುರಿದು ಬಿತ್ತಬೇಕೆಂದರೆ ಹೊಲದಲ್ಲಿ ಬಂಗಾರ ಹುಗಿದು ಬಿತ್ತಬೇಕು. ಮೊದಲೇ ಸಾಕಷ್ಟು ಖರ್ಚು ಮಾಡಿ ಹತ್ತಿ ಬಿತ್ತನೆ ಮಾಡಲಾಗಿದೆ. ಈಗ ಬಂಗಾರ ಬೆಲೆ ಗಗನ ಕುಸುಮವಾಗಿದೆ. ಚಿನ್ನ ಖರೀದಿಸಿ ಹೊಲದಲ್ಲಿ ಹುಗಿಯಬೇಕೆಂದರೆ ಹಣ ಹೊಂದಿಸಲು ಕಷ್ಟವಿದೆ. ಮಳೆ ಬಂದರೆ ಹತ್ತಿ ಬೆಳೆ ಬರುವ ನಿರೀಕ್ಷೆಯಲ್ಲಿರುವುದಾಗಿ ಕಾನ್ನಾಳ ರೈತ ಹಣಮಂತ ಗುಬ್ಬಾ ಹೇಳಿದರು.

ಮುಂಗಾರು ಹಂಗಾಮಿನಲ್ಲಿ ಮಳೆ ಅಭಾವವಾಗಿದೆ. ಈಗ ಗಾಳಿ ಬೀಸುತ್ತಿರುವುದರಿಂದ ಭೂಮಿ ಒಣಗುತ್ತಿದೆ. ಬಿತ್ತನೆ ಮಾಡಿದ ಬೆಳೆಗಳಿಗೆ ಮಳೆ ತುಂಬಾ ಅಗತ್ಯವಿದೆ. ಜು.15ರವರೆಗೂ ಹಸಿ ಇದ್ದಲ್ಲಿ ತೊಗರಿ ಬಿತ್ತನೆ ಮಾಡಬಹುದು. ಮಳೆಯಾದರೆ ಇಳುವರಿ ಚೆನ್ನಾಗಿ ಬರಲಿದೆ.