ಮನೆಗಳ ಮುಂದೆ ಮಹಿಳೆಯರು ರಂಗೋಲಿ ಬಿಡಿಸುವ ಮೂಲಕ ಪಂಚಾಯತ್ ರಾಜ್ ದಿನ ಆಚರಣೆ

ಬಿ.ಎಸ್.ಸುನೀಲ್

ಪಂಚಾಯತ್ ರಾಜ್ ದಿನದ ಅಂಗವಾಗಿ ಅಣ್ಣೂರು ಪಂಚಾಯ್ತಿ ವ್ಯಾಪ್ತಿಯ ಮೂರು ಗ್ರಾಮಗಳ ಮನೆಗಳ ಮುಂದೆ ಮಹಿಳೆಯರು ರಂಗೋಲಿ ಬಿಡಿಸಿ ಪ್ರಜಾತಂತ್ರ ವ್ಯವಸ್ಥೆಗೆ ಗೌರವ ಸಲ್ಲಿಸುವ ಕೆಲಸ ಮಾಡಿದ್ದು ಗಮನ ಸೆಳೆಯಿತು.

ಮೂರು ಗ್ರಾಮಗಳ ಸುಮಾರು ಒಂದೂವರೆ ಸಾವಿರ ಮನೆಗಳ ಮುಂದೆ ಮಹಿಳೆಯರು ನಸುಕಿನಲ್ಲಿಯೇ ಬಣ್ಣದ ರಂಗೊಲಿ ಬಿಟ್ಟು, ಗ್ರಾಮದ ಪ್ರಮುಖ ದ್ವಾರಗಳಿಗೆ ತಳಿರು, ತೋರಣ ಕಟ್ಟಿ ಸಿಂಗರಿಸಿದ ಪಂಚಾಯುತ್ ರಾಜ್ ದಿನದ ಶುಭಾಶಯ ತಿಳಿಸಿ, ದೇಶದಲ್ಲೇ ಮಾದರಿ ಜೊತೆಗೆ ಹಿರಿಮೆ ತಂದು ದಾಖಲೆಗೆ ಪಾತ್ರರಾದರು. ಗ್ರಾಮದ ಸರಕಾರಿ ಕಚೇರಿ, ಸಹಕಾರಿ- ಸಂಸ್ಥೆಗಳು, ಶಾಲಾ ಕಾಲೇಜು, ವಸತಿ ಶಾಲೆ, ಅಂಗನವಾಡಿಗಳ ಮುಂದೆಯೂ ಸಿಬ್ಬಂದಿ ರಂಗೊಲಿ ಬಿಟ್ಟು ಏಕತೆ ಮೆರೆದರು.

ಜಿಲ್ಲೆಯಲ್ಲಿ ಪ್ರತಿಷ್ಠಿತ ಪಂಚಾಯ್ತಿಗಳಲ್ಲಿ ಒಂದಾಗಿರುವ ಅಣ್ಣೂರು ಈಗಾಗಲೇ ಹಲವು ಸಾಧನೆಗಳನ್ನು ಮಾಡಿ ಕೇಂದ್ರ ಸರ್ಕಾರದ ಮೂರು, ರಾಜ್ಯ ಸರಕಾರದ ಮೂರು ಹಾಗೂ ಜಿಲ್ಲಾ ಮಟ್ಟದ ಮೂರು ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿದೆ.