ಸಂಕ್ರಾಂತಿ ಪ್ರಯುಕ್ತ ಕೊಣ್ಣೂರಿನಲ್ಲಿ ಗಂಗಾಮಾತೆಗೆ ಪೂಜೆ

ನರಗುಂದ: ದಿನಕರ ತನ್ನ ಪಥವನ್ನು ದಕ್ಷಿಣಾಯನದಿಂದ ಉತ್ತರಾಯಣಕ್ಕೆ ಬದಲಿಸುವ ಸುಸಂದರ್ಭವೇ ಸಂಕ್ರಾಂತಿ. ಇದು ಪ್ರಪಂಚದ ಹಬ್ಬ. ಸಾಂಸ್ಕೃತಿಕ ಹಬ್ಬ. ಮಕರ ಜ್ಯೋತಿಯ ದರ್ಶನದ ಹಬ್ಬವಾಗಿದೆ ಎಂದು ಕೊಣ್ಣೂರು ಗ್ರಾಮದ ವಿರಕ್ತಮಠದ ಡಾ. ಚನ್ನವೀರ ಶಿವಾಚಾರ್ಯ ಶ್ರೀಗಳು ತಿಳಿಸಿದರು.ಬುಧವಾರ ತಾಲೂಕಿನ ಕೊಣ್ಣೂರ ಗ್ರಾಮದ ಮಲಪ್ರಭಾ ನದಿಯಲ್ಲಿ ಸಂಕ್ರಮಣ ಹಬ್ಬದ ನಿಮಿತ್ತ ಗ್ರಾಮದ ಗಂಗಾಮತಸ್ಥರ ಗಂಗಾಮಾತೆಗೆ ಪೂಜೆ ಸಲ್ಲಿಸುವ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಸಿಹಿ- ಕಹಿ ಬಾಳಿನಲ್ಲಿ ಬರುವ ಎರಡು ಸವಿಗನಸುಗಳು. ಬಯಸಿದಾಗ ಕಾಣುವ ಎರಡು ಮುಖಗಳು, ಅವೆರಡನ್ನು ಸಮ ಸಮನಾಗಿ ಸ್ವೀಕರಿಸಿದಾಗಲೇ ಈ ಬಾಳು ನಂದಗೋಕುಲ. ಈ ಮಹತ್ತರ ದಿನಕ್ಕಾಗಿ ತ್ಯಾಗ ಮತ್ತು ಪ್ರತಿಜ್ಞೆಗೆ ಹೆಸರಾದ ಮಹಾಭಾರತದ ಭೀಷ್ಮನು ಸಹ ತನ್ನ ಸಾವನ್ನು 58 ರಾತ್ರಿಗಳವರೆಗೆ ಅರ್ಜುನನ ಬಿಟ್ಟ ಬಾಣಗಳ ಶರಶೈಯದ ನೋವಿನಲ್ಲಿ ನರಳಿ ನರಳಿ ಸಂಕ್ರಾಂತಿಯ ದಿನದಂದು ಪ್ರಾಣ ಬಿಟ್ಟನು ಎಂಬ ಪ್ರತೀತಿಯಿದೆ ಎಂದರು.

ಬಸಯ್ಯ ಹಿರೇಮಠ, ಚನ್ನಪ್ಪ ಶಿರಹಟ್ಟಿ, ಈರಣ್ಣ ಶಿರಸಂಗಿ, ಆನಂದ ನರಗುಂದ, ಬಸಯ್ಯ ಚಿಕ್ಕಮಠ, ಮಲ್ಲಯ್ಯ ಪುರತರಮಠ, ರೇಹಮಸಾಬ ಅಲ್ಲಿಬಾಯಿ, ಗಂಗವ್ವ ಶಿರಹಟ್ಟಿ, ಮಲ್ಲವ್ವ ಮರ್ಚಪ್ಪನವರ, ಮಂಜವ್ವ ಅಂಬಗೇರ ಇದ್ದರು.