ಜಿಪಂ, ತಾಪಂ ಮೀಸಲಾತಿ: ಹಿಂದುಳಿದ ವರ್ಗಕ್ಕೆ ಅನ್ಯಾಯ

- ಮೀಸಲಾತಿ ಪಟ್ಟಿ ಬಗ್ಗೆ ಆಕ್ಷೇಪ: ಕಾನೂನು ಹೋರಾಟಕ್ಕೆ ಸಜ್ಜಾಯ್ತು ಕುರುಬ ಸಮಾಜ - - -

ಜಿಲ್ಲಾ ಪಂಚಾಯಿತಿ, ತಾಲೂಕು ಪಂಚಾಯಿತಿ ಮೀಸಲಾತಿ ಪಟ್ಟಿಯಲ್ಲಿ ಹಿಂದುಳಿದ ವರ್ಗಗಳಿಗೆ ಆಗಿರುವ ಅನ್ಯಾಯವನ್ನು ಜಿಲ್ಲಾ ಕುರುಬರ ಸಮಾಜ ಒಕ್ಕೊರಲಿನಿಂದ, ಪಕ್ಷಾತೀತವಾಗಿ ಖಂಡಿಸಿದ್ದಲ್ಲದೇ ಕಾನೂನು ಹೋರಾಟ ನಡೆಸಲು ನಿರ್ಣಯಿಸಿದೆ.

ಸಮಾಜದ ಮುಖಂಡ ಬಿ‌.ಎಂ‌.ಸತೀಶ ಕೊಳೇನಹಳ್ಳಿ ಮಾತನಾಡಿ, ಹಿಂದುಳಿದ ವರ್ಗಗಳಿಗೆ ಶೇ.33ರಷ್ಟು ಮೀಸಲಾತಿ ನೀಡಬೇಕೆಂದಿದೆ. ಆದರೆ, ಎಸ್‌ಸಿ-ಎಸ್‌ಟಿಗೆ ಶೇ.18ರಷ್ಟು ಮೀಸಲಾತಿ ನಿಗದಿಯಾಗಿದೆ. ಜನಸಂಖ್ಯೆಯಲ್ಲಿ ಯಾವುದು ಹೆಚ್ಚು ಅಂತಹ ಮೀಸಲಾತಿ ಜಾರಿ ಮಾಡಬೇಕೆಂಬ ಕಾಯ್ದೆಯೇ ಇದೆ. ಹಾಗಾಗಿ, ಕಾಯ್ದೆ ತಿದ್ದುಪಡಿಗೆ ಹೋರಾಟ ಮಾಡಬೇಕಾಗಿದೆ. ಈ ನಿಟ್ಟಿನಲ್ಲಿ ರಾಜ್ಯ ಸರ್ಕಾರದ ವಿರುದ್ಧ ಹಿಂದುಳಿದ ವರ್ಗಗಳು ಒಗ್ಗೂಡಿ ಹೋರಾಟ ಮಾಡಬೇಕು. ಇಲ್ಲದಿದ್ದರೆ ಜಿಪಂ, ತಾಪಂ ಕ್ಷೇತ್ರಗಳಲ್ಲಿ ಹಿಂದುಳಿದ ವರ್ಗಗಳಿಗೆ ಸ್ಥಾನಮಾನ, ಅವಕಾಶಗಳೇ ಇಲ್ಲದ ಸ್ಥಿತಿ ನಿರ್ಮಾಣವಾಗಲಿದೆ ಎಂದು ಎಚ್ಚರಿಸಿದರು.

ದೂಡಾ ಮಾಜಿ ಅಧ್ಯಕ್ಷ ರಾಜನಹಳ್ಳಿ ಶಿವಕುಮಾರ ಮಾತನಾಡಿ, ಹಿಂದುಳಿದ ವರ್ಗಗಳು ತಮಗೆ ಆಗುತ್ತಿರುವ ಅನ್ಯಾಯ ಖಂಡಿಸದಿದ್ದರೆ ಮುಂದಿನ ದಿನಗಳಲ್ಲಿ ಇನ್ನೂ ಅನ್ಯಾಯ ಆಗುತ್ತದೆ. ರಾಜ್ಯ ಸರ್ಕಾರ ಹೊರಡಿಸಿದ ಜಿಪಂ, ತಾಪಂ ಮೀಸಲಾತಿ ಪಟ್ಟಿಗೆ ನಮ್ಮ ವಿರೋಧವಿದೆ. ಜಿಲ್ಲೆಯಲ್ಲಿ 29 ಜಿಪಂ ಕ್ಷೇತ್ರದಲ್ಲಿ ಕೇವಲ 2 ಹಿಂದುಳಿದ ವರ್ಗ(ಅ) ಮೀಸಲಾಗಿದೆ. ಲೆಕ್ಕಾಚಾರದ ಪ್ರಕಾರ ಕನಿಷ್ಠ 4 ಸ್ಥಾನಗಳ ನೀಡಬೇಕು ಎಂದರು.

ಮುಖಂಡರಾದ ಹದಡಿ ಜೆ.ಸಿ.ನಾಗರಾಜ, ಶಿಕ್ಷಕ ಹದಡಿ ಗಣೇಶ, ದೇವಿಕುಮಾರ, ಹದಡಿ ಮಾಲತೇಶ, ಮಲೇಬೆನ್ನೂರು ಕೆ‌.ಪಿ.ಗಂಗಾಧರ, ಪಿ.ಎಸ್.ಶಿವಕುಮಾರ, ಬಲ್ಲೂರು ವಿರೂಪಾಕ್ಷಪ್ಪ,‌ ಮುದಹದಡಿ ನಾಗರಾಜ, ಮಾಲತೇಶ್, ಹದಡಿ ಹಾಲೇಶ ಇತರರು ಇದ್ದರು. ಮೀಸಲಾತಿಯಲ್ಲಿ ಆದ ಅನ್ಯಾಯದ ವಿರುದ್ಧ ಹೋರಾಡಲು ಕಾನೂನು ಹೋರಾಟ ಸಮಿತಿ ರಚಿಸಲು, ಬೃಹತ್ ಹೋರಾಟ ದ ರೂಪುರೇಷೆ ತಯಾರಿಸಲು ಸಭೆ ನಿರ್ಣಯಿಸಿತು.

(ಕೋಟ್‌) ಹಿಂದುಳಿದ ವರ್ಗಗಳಿಗೆ ಆಗಿರುವ ಅನ್ಯಾಯವನ್ನು ಸಮಾಜ ಒಕ್ಕೊರಲಿನಿಂದ ಖಂಡಿಸುತ್ತದೆ. ಮೀಸಲು, ಸಾಮಾನ್ಯ ಕ್ಷೇತ್ರಗಳಲ್ಲಿ ಯಾರಾದರೂ ಒಬ್ಬರು ಸಮಾಜದವರು ಸ್ಪರ್ಧಿಸಬೇಕು. ಆ ನಿಟ್ಟಿನಲ್ಲಿ ನಾವು ಕೆಲಸ ಮಾಡೋಣ. ಪಕ್ಷಾತೀತವಾಗಿ ನಮ್ಮ ಸಮಾಜದ ಪರ ಕೆಲಸ ಮಾಡೋಣ.

- - -