25ನೇ ಗ್ರ್ಯಾನ್‌ಸ್ಲಾಂ ಪ್ರಶಸ್ತಿ ಮೇಲೆ ಕಣ್ಣಿಟ್ಟಿರುವ ನೋವಾಕ್‌ ಜೋಕೋವಿಚ್‌ : 3ನೇ ಸುತ್ತು ಪ್ರವೇಶ

ನ್ಯೂಯಾರ್ಕ್‌: ದಾಖಲೆಯ 25ನೇ ಗ್ರ್ಯಾನ್‌ಸ್ಲಾಂ ಪ್ರಶಸ್ತಿ ಮೇಲೆ ಕಣ್ಣಿಟ್ಟಿರುವ ಹಾಲಿ ಚಾಂಪಿಯನ್‌, ಸರ್ಬಿಯಾದ ನೋವಾಕ್‌ ಜೋಕೋವಿಚ್‌, ಯುಎಸ್‌ ಓಪನ್‌ ಟೆನಿಸ್ ಟೂರ್ನಿಯಲ್ಲಿ 3ನೇ ಸುತ್ತು ಪ್ರವೇಶಿಸಿದ್ದಾರೆ. ಸತತ 2ನೇ ಬಾರಿ ಯುಎಸ್‌ ಓಪನ್‌ ಗೆಲ್ಲುವ ಕಾತರದಲ್ಲಿರುವ ಕೊಕೊ ಗಾಫ್‌ ಕೂಡಾ ಮುಂದಿನ ಸುತ್ತಿಗೇರಿದ್ದಾರೆ.

ಬುಧವಾರ ಮಧ್ಯರಾತ್ರಿ ನಡೆದ ಪುರುಷರ ಸಿಂಗಲ್ಸ್‌ 2ನೇ ಸುತ್ತಿನ ಪಂದ್ಯದಲ್ಲಿ ವಿಶ್ವ ನಂ.2 ಜೋಕೋ ಸರ್ಬಿಯಾದವರೇ ಆದ ಲಾಸ್ಲೊ ಡೆರೆ ವಿರುದ್ಧ 6-4, 6-4, 2-0 ಸೆಟ್‌ಗಳಲ್ಲಿ ಮುಂದಿದ್ದಾಗ ವಾಕ್‌ಓವರ್‌ ಪಡೆದರು. 2ನೇ ಸೆಟ್‌ನಲ್ಲೇ ಲಾಸ್ಲೊ ಸೊಂಟದಲ್ಲಿ ನೋವು ಕಾಣಿಸಿಕೊಂಡರೂ ಪಂದ್ಯದಲ್ಲಿ ಮುಂದುವರಿದರು. ಆದರೆ 3ನೇ ಸೆಟ್‌ನಲ್ಲಿ ನೋವು ಹೆಚ್ಚಾದ ಕಾರಣ ಪಂದ್ಯದಿಂದ ಹಿಂದೆಸರಿದರು. 

ಯುಎಸ್‌ ಓಪನ್‌ನಲ್ಲಿ 90ನೇ ಗೆಲುವು ದಾಖಲಿಸಿದ ಜೋಕೋ, 3ನೇ ಸುತ್ತಿನಲ್ಲಿ ಆಸ್ಟ್ರೇಲಿಯಾದ ಅಲೆಕ್ಸಿ ಪೋಪಿರಿನ್‌ ವಿರುದ್ಧ ಸೆಣಸಲಿದ್ದಾರೆ. 6ನೇ ಶ್ರೇಯಾಂಕಿತ ಆ್ಯಂಡ್ರೆ ರುಬ್ಲೆವ್‌, 4ನೇ ಶ್ರೇಯಾಂಕಿತ ಅಲೆಕ್ಸಾಂಡರ್‌ ಜ್ವೆರೆವ್‌ ಕೂಡಾ 2ನೇ ಸುತ್ತಿನಲ್ಲಿ ಗೆಲುವು ಸಾಧಿಸಿದರು.

ಗಾಫ್‌ ಜಯಭೇರಿ: ಮಹಿಳಾ ಸಿಂಗಲ್ಸ್‌ನಲ್ಲಿ ವಿಶ್ವ ನಂ.3, ಅಮೆರಿಕದ 20 ವರ್ಷದ ಗಾಫ್‌ ಜರ್ಮನಿಯ ಮರಿಯಾ ವಿರುದ್ಧ 6-4, 6-0 ಸೆಟ್‌ಗಳಲ್ಲಿ ಸುಲಭ ಗೆಲುವು ದಾಖಲಿಸಿದರು. ಕಳೆದೆರಡು ಬಾರಿಯ ಆಸ್ಟ್ರೇಲಿಯನ್‌ ಓಪನ್‌ ಚಾಂಪಿಯನ್‌ ಅರೈನಾ ಸಬಲೆಂಕಾ, 2 ಬಾರಿ ಗ್ರ್ಯಾನ್‌ಸ್ಲಾಂ ವಿಜೇತ ವಿಕ್ಟೋರಿಯಾ ಅಜರೆಂಕಾ ಕೂಡಾ 3ನೇ ಸುತ್ತು ಪ್ರವೇಶಿಸಿದರು.

ಕ್ರೇಜಿಕೋವಾ ಔಟ್‌

ಇತ್ತೀಚೆಗಷ್ಟೇ ವಿಂಬಲ್ಡನ್‌ ಟೆನಿಸ್‌ನಲ್ಲಿ ಚಾಂಪಿಯನ್‌ ಆಗಿದ್ದ ಚೆಕ್‌ ಗಣರಾಜ್ಯದ ಬಾರ್ಬೊರಾ ಕ್ರೇಜಿಕೋವಾ 2ನೇ ಸುತ್ತಿನಲ್ಲೇ ಅಭಿಯಾನ ಕೊನೆಗೊಳಿಸಿದರು. ಬುಧವಾರ ರಾತ್ರಿ ಅವರು ರೊಮಾನಿಯಾದ ಎಲೆನಾ ರ್‍ಯುಸ್‌ ವಿರುದ್ಧ 4-6, 5-7 ಸೆಟ್‌ಗಳಲ್ಲಿ ಸೋಲನುಭವಿಸಿದರು.

ಶ್ರೀರಾಮ್‌, ಯೂಕಿ ಭಾಂಬ್ರಿ ಜೋಡಿಗಳು ಶುಭಾರಂಭ

ಯುಎಸ್‌ ಓಪನ್‌ನ ಪುರುಷರ ಡಬಲ್ಸ್‌ನಲ್ಲಿ ಭಾರತ ಎರಡು ಜೋಡಿಗಳು ಶುಭಾರಂಭ ಮಾಡಿದೆ. ಶ್ರೀರಾಮ್‌ ಬಾಲಾಜಿ-ಅರ್ಜೆಂಟೀನಾದ ಗ್ಯುಡೊ ಆ್ಯಂಡ್ರೋಜಿ ಮೊದಲ ಸುತ್ತಿನಲ್ಲಿ ನ್ಯೂಜಿಲೆಂಡ್‌ನ ಮಾರ್ಕಸ್‌ ಡೇನಿಲ್‌-ಮೆಕ್ಸಿಕೋದ ರೆಯೆಸ್ ವೆರೆಲಾ ವಿರುದ್ಧ 5-7, 6-1, 7-6(12-6) ಸೆಟ್‌ಗಳಲ್ಲಿ ಗೆಲುವು ಸಾಧಿಸಿದರು. ಮತ್ತೊಂದು ಪಂದ್ಯದಲ್ಲಿ ಯೂಕಿ ಭಾಂಬ್ರಿ ಹಾಗೂ ಫ್ರಾನ್ಸ್‌ನ ಅಲ್ಬಾನೊ ಒಲಿವೆಟ್ಟಿ ಜೋಡಿ ಅಮೆರಿಕದ ರ್‍ಯಾನ್ ಸೆಗೆರ್‌ಮಾನ್‌-ಪ್ಯಾಟ್ರಿಕ್‌ ವಿರುದ್ಧ 6-3, 6-4 ಸೆಟ್‌ಗಳಲ್ಲಿ ಸುಲಭ ಗೆಲುವು ಸಾಧಿಸಿತು.