ಪಡಿತರ ಚೀಟಿ ಮೇಲೆ ದೇಶದ 100 ಕೋಟಿ ಜನರ ಅವಲಂಬನೆ

ಹೊಸಪೇಟೆ: ದೇಶದ 100 ಕೋಟಿ ಜನರು ಈಗಲೂ ಪಡಿತರ ಚೀಟಿ ಮೇಲೆ ಬದುಕುವ ಸ್ಥಿತಿ ಇದೆ ಎಂದು ಸಿಪಿಐಎಂ ಪಕ್ಷದ ರಾಜ್ಯ ಕಾರ್ಯದರ್ಶಿ ಯು. ಬಸವರಾಜ ಹೇಳಿದರು.

ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳು ಅಭಿವೃದ್ಧಿ ಹೆಸರಿನಲ್ಲಿ ಕೋಟ್ಯಂತರ ರುಪಾಯಿ ಖರ್ಚು ಮಾಡುತ್ತಿವೆ. ಆದರೂ ದೇಶದ ಜನರ ಸಮಸ್ಯೆ ಹಾಗೇ ಉಳಿದಿವೆ. ದೇವದಾಸಿ ಸಮಸ್ಯೆ ಹೋಗಲಾಡಿಸಲು ಆಗಿಲ್ಲ. ದೇವದಾಸಿಯರಿಗೆ ಐದು ಎಕರೆ ನೀರಾವರಿ, ಮಾಸಿಕ ಐದು ಸಾವಿರ ರುಪಾಯಿ ಪೆನ್ಷನ್ ನೀಡಬೇಕು. ದೇವದಾಸಿ ಪದ್ಧತಿ ನಿಯಂತ್ರಣಕ್ಕಾಗಿ ಕಾಯ್ದೆ ತಿದ್ದುಪಡಿ ಮಾಡಬೇಕು. ದೇವದಾಸಿಯರ ಉದ್ಧಾರ ನಮ್ಮ ಕೆಲಸವಲ್ಲ, ಸಿರಿವಂತರ ಕೆಲಸ ಎಂದು ಸರ್ಕಾರಗಳು ನುಣುಚಿಕೊಳ್ಳುತ್ತಿವೆ. ಮಸಣ ಕಾರ್ಮಿಕರಿಗೂ ತಲಾ ಐದು ಎಕರೆ ಜಮೀನು ನೀಡಬೇಕು. ಜನರ ಆದಾಯ ಜಾಸ್ತಿ ಆಗಬೇಕು. ನರೇಗಾದಲ್ಲಿ ೨೦೦ ದಿನ ಕೂಲಿ ಒದಗಿಸಬೇಕು. ಕೂಲಿ ಹೆಚ್ಚಳ ಮಾಡಬೇಕು. ಪ್ರಧಾನಿ ನರೇಂದ್ರ ಮೋದಿ ಸರ್ಕಾರ ಈ ದಿಸೆಯಲ್ಲಿ ಯೋಜನೆಗಳನ್ನು ರೂಪಿಸಬೇಕು ಎಂದರು.

65 ಲಕ್ಷ ಎಕರೆ ಸರ್ಕಾರಿ ಜಾಗ ಇದೆ. ಆದರೆ ಬಡವರಿಗೆ ನೀಡುತ್ತಿಲ್ಲ. ಬೀದರ್‌ನ ರಾಜಕಾರಣಿಯೊಬ್ಬರಿಗೆ 7000 ಎಕರೆ ನೈಸ್ ರಸ್ತೆ ಬಳಿ ಜಮೀನು ನೀಡಲಾಗಿದೆ. ಬಡವರ ಪರ ಇರುವವರನ್ನು ಆಯ್ಕೆ ಮಾಡಬೇಕು ಎಂದರು.

ಹೊಸಪೇಟೆಯಲ್ಲಿ ಮಂಗಳವಾರ ನಡೆದ ನಡೆದ ಸಿಪಿಐಎಂ ಪಕ್ಷದ 13ನೇ ಜಿಲ್ಲಾ ಸಮ್ಮೇಳನ ಉದ್ಘಾಟಿಸಿ ಸಿಪಿಐಎಂ ಪಕ್ಷದ ರಾಜ್ಯ ಕಾರ್ಯದರ್ಶಿ ಯು. ಬಸವರಾಜ ಮಾತನಾಡಿದರು.