ಕಾಸರಗೋಡು ವಿದ್ಯುತ್‌ ಲೈನ್‌ಗಾಗಿ ಕರಾವಳಿಯ 1150 ಎಕರೆ ಜಮೀನು ಆಹುತಿ!

ಕನ್ನಡಪ್ರಭ ವಾರ್ತೆ ಮಂಗಳೂರು

ಇತ್ತೀಚೆಗೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಹೋರಾಟ ಸಮಿತಿಯ ಪ್ರಮುಖ ಚಂದ್ರಹಾಸ ಶೆಟ್ಟಿ, ನಾಲ್ಕೂವರೆ ವರ್ಷ ಹಿಂದೆ ವಿಟ್ಲ ಭಾಗದ ರೈತರು ಮೊದಲ ಬಾರಿಗೆ ಈ ಯೋಜನೆಗೆ ಮೊದಲ ಬಾರಿಗೆ ವಿರೋಧ ವ್ಯಕ್ತಪಡಿಸಿದ್ದರು. ಇದೀಗ ಕರ್ನಾಟಕ ರಾಜ್ಯ ರೈತ ಸಂಘ ಸೇರಿದಂತೆ ಉಭಯ ಜಿಲ್ಲೆಗಳ ರೈತ ಪರ ಸಂಘಟನೆಗಳು, ಪರಿಸರ ಪ್ರೇಮಿ ಹಾಗೂ ಸಾಮಾಜಿಕ ನ್ಯಾಯ ಪರ ಸಂಘಟನೆಗಳ ಪ್ರತಿನಿಧಿಗಳು ಸೇರಿಕೊಂಡು ಹೋರಾಟ ಸಮಿತಿಗಳ ಒಕ್ಕೂಟ ರಚಿಸಿ ಹೋರಾಟಕ್ಕಿಳಿದಿರುವುದಾಗಿ ಹೇಳಿದರು.

ಎಷ್ಟು ಆಹುತಿ?: ದ.ಕ., ಉಡುಪಿ ಜಿಲ್ಲೆಗಳ 1150 ಎಕರೆ ಭೂಪ್ರದೇಶ ಈ ಯೋಜನೆಗೆ ಆಹುತಿಯಾಗಲಿದೆ. ಯೋಜನೆ ಜಾರಿಯಾದರೆ ಸುಮಾರು 2300 ಎಕರೆಯಷ್ಟು ಜಮೀನು, ವಿವಿಧ ಕಟ್ಟಡ, ಮನೆ, ಶೆಡ್, ಗೋದಾಮು, ಹಟ್ಟಿ, ಮಠ ಮಂದಿರಗಳಲ್ಲಿ ವಾಸಿಸಲು ಕಷ್ಟಕರವಾಗಲಿದೆ. ಅಂದಾಜು 1,65,000ದಷ್ಟು ಅಡಕೆ ಮರಗಳು, 7800 ತೆಂಗಿನ ಮರ, 1,20,000 ಕರಿಮೆಣಸಿನ ಬಳ್ಳಿ, 4500 ರಬ್ಬರ್ ಮರಗಳು, 2500 ಹಲಸು, 5 ಸಾವಿರ ಸಾಗುವಾನಿ, 2800 ಮಾವು, 4500ರಷ್ಟು ಬಲಿತ ಕಾಡು ಮರಗಳು ಸೇರಿದಂತೆ ಸಾವಿರಾರು ಸಂಖ್ಯೆಯ ಹಣ್ಣು ಹಂಪಲಿನ ಗಿಡಗಳು ಸರ್ವನಾಶ ಆಗಲಿವೆ ಎಂದು ಚಂದ್ರಹಾಸ ಶೆಟ್ಟಿ ಮಾಹಿತಿ ನೀಡಿದರು.

ಅಲ್ಲದೆ, 328 ಮನೆಗಳೂ, 26 ದೈವಸ್ಥಾನಗಳು, 8 ಮಸೀದಿ, 16 ದೇವಸ್ಥಾನ, 14 ಶಾಲೆಗಳು, 3 ಸೆಮಿನರಿಗಳು ಈ ಕಾರಿಡಾರ್‌ನ ಸಂಪರ್ಕಕ್ಕೆ ಬರಲಿವೆ ಎಂದು ಅವರು ವಿವರಿಸಿದರು.

ಪ್ರಮುಖರಾದ ರಾಜೀವ ಗೌಡ, ದಯಾನನಂದ ಶೆಟ್ಟಿ, ಉದಯ ಕುಮಾರ್, ಅಲೋನ್ಸ್ ಡಿಸೋಜ ಇದ್ದರು.