ನಗರ ವ್ಯಾಪ್ತಿಯಲ್ಲಿ ೨೨೦೦ ಗ್ರಾಪಂ ಅಕ್ರಮ ಖಾತೆಗಳು: ಒಂದು ವಾರದಲ್ಲಿ ಜಂಟಿ ಸರ್ವೇ ನಡೆಸಿ ಹಸ್ತಾಂತರ ಪ್ರಕ್ರಿಯೆ

ಕನ್ನಡಪ್ರಭ ವಾರ್ತೆ ಮಂಡ್ಯ

ಬುಧವಾರ ನಗರಸಭೆ ಅಧ್ಯಕ್ಷ ಎಂ.ವಿ.ಪ್ರಕಾಶ್ ಮತ್ತು ಆಯುಕ್ತೆ ಪಂಪಾಶ್ರೀ ನೇತೃತ್ವದಲ್ಲಿ ಬೂದನೂರು, ಬೇವಿನಹಳ್ಳಿ, ಇಂಡುವಾಳು, ಬೇಲೂರು, ಹಳುವಾಡಿ, ಮಂಡ್ಯ ಗ್ರಾಮಾಂತರ, ಸಾತನೂರು, ಉಮ್ಮಡಹಳ್ಳಿ, ಸಂತೆ ಕಸಲಗೆರೆ ಸೇರಿ ಒಂಬತ್ತು ಗ್ರಾಮ ಪಂಚಾಯಿತಿಗಳ ಪಿಡಿಒಗಳ ಸಭೆ ನಡೆಸಿ ತೀರ್ಮಾನಿಸಲಾಯಿತು.

ನಗರಸಭೆಯಲ್ಲಿ ಆಸ್ತಿ ಖಾತೆಯಾಗಬೇಕಾದರೆ ನಿವೇಶನದ ಅಲಿಗೇಷನ್, ಮುಡಾ ಅನುಮತಿ ಪತ್ರ ಸೇರಿದಂತೆ ಹಲವು ದಾಖಲಾತಿಗಳನ್ನು ಕೇಳುತ್ತಾರೆ. ಜೊತೆಗೆ ಒಂದು ಬಡಾವಣೆಯಲ್ಲಿ ನಿವೇಶನ ಅಥವಾ ಮನೆ ಖಾತೆಯಾಗಬೇಕಾದರೆ ಸಂಪೂರ್ಣ ವಿಳಾಸವನ್ನು ಕ್ರಮಬದ್ಧವಾಗಿ ನೀಡುವ ಅವಶ್ಯಕತೆ ಇದೆ. ಆದರೆ, ಪಂಚಾಯಿತಿಯಲ್ಲಿ ಖಾತೆ ಮಾಡುವುದಕ್ಕೆ ಕ್ರಯಪತ್ರವಿದ್ದರೆ ಸುಲಭವಾಗಿ ಖಾತೆ ಮಾಡಿಕೊಡುತ್ತಾರೆ. ಅಲ್ಲಿ ಮುಡಾ ಅನುಮತಿಯೂ ಬೇಕಿಲ್ಲ, ವಿಳಾಸದ ಅವಶ್ಯಕತೆಯೂ ಇಲ್ಲ. ಅವರು ಖಾತೆ, ಪಟ್ಟಾಪುಸ್ತಕದಲ್ಲಿ ಹೋಬಳಿ, ಪಂಚಾಯಿತಿ ಹೆಸರನ್ನು ನಮೂದು ಮಾಡುವರೇ ವಿನಃ ವಿಳಾಸವನ್ನು ಕೇಳುವುದೇ ಇಲ್ಲ. ಇದರೊಂದಿಗೆ ಪಂಚಾಯಿತಿ ಖಾತೆಯಲ್ಲಿರುವ ಮನೆ- ನಿವೇಶನಗಳಿಗೆ ತೆರಿಗೆಯೂ ಕಡಿಮೆ. ಹೀಗಾಗಿ ನಗರಸಭೆ ವ್ಯಾಪ್ತಿಯೊಳಗಿನ ಸಾವಿರಾರು ಆಸ್ತಿಗಳ ಖಾತೆಗಳು ಪಂಚಾಯಿತಿ ವ್ಯಾಪ್ತಿಯೊಳಗೆ ಸೇರಿಕೊಂಡಿರುವುದರಿಂದ ನಗರಸಭೆ ಆದಾಯದ ಮೇಲೆ ಹೊಡೆತ ಬಿದ್ದಿದೆ.

ನಗರಸಭೆ ಖಾತೆ ಮಾಡುವುದಕ್ಕೆ ಆಸ್ತಿಗೆ ಸಂಬಂಧಿಸಿದಂತೆ ಪೂರಕ ದಾಖಲೆಗಳನ್ನು ಒದಗಿಸಲಾಗದಿದ್ದವರು ಆ ವ್ಯಾಪ್ತಿಯ ಪಂಚಾಯಿತಿಗಳಿಂದ ಖಾತೆ ಮಾಡಿಸಿಕೊಂಡಿರುವ ಅನೇಕ ಪ್ರಕರಣಗಳಿವೆ. ನಗರಸಭೆ, ಮುಡಾ ಹಾಗೂ ಗ್ರಾಮ ಪಂಚಾಯಿತಿ ಅಧಿಕಾರಿಗಳ ನಡುವಿನ ಸಂಪರ್ಕ ಕೊರತೆಯೂ ಇದಕ್ಕೆ ಕಾರಣವಾಗಿದೆ. ಪರಸ್ಪರ ಸಂಪರ್ಕ, ಸಮನ್ವಯತೆಯಿಂದ ಆಸ್ತಿಗಳನ್ನು ವ್ಯವಸ್ಥಿತ ರೀತಿಯಲ್ಲಿ ಖಾತೆ ಮಾಡಿಕೊಡುವಲ್ಲಿ ಆಗಿರುವ ಲೋಪಗಳಿಂದ ನಗರಸಭೆ ವ್ಯಾಪ್ತಿಯ ಸಾಕಷ್ಟು ಆಸ್ತಿಗಳು ಪಂಚಾಯಿತಿಯೊಳಗೆ ಉಳಿದುಕೊಳ್ಳುವಂತಾಗಿದೆ.

ನಗರಸಭೆ ವ್ಯಾಪ್ತಿಯ ಆಸ್ತಿಗಳನ್ನೂ ಬಿ- ಖಾತೆ ಮಾಡುವುದಕ್ಕೆ ಅವಕಾಶ ಮಾಡಿಕೊಟ್ಟಿರುವುದರಿಂದ ಪಂಚಾಯಿತಿಯೊಳಗೆ ಸೇರಿರುವ ನಗರಸಭೆ ಆಸ್ತಿಗಳನ್ನು ನಿರ್ದಿಷ್ಟವಾಗಿ ಸರಹದ್ದು ಮತ್ತು ಗಡಿ ಗುರುತಿಸಿ ಅವುಗಳನ್ನು ಹಸ್ತಾಂತರ ಮಾಡಿಕೊಳ್ಳಲು ನಗರಸಭೆ ಅಧಿಕಾರಿಗಳು ಮತ್ತು ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗಳು ಜಂಟಿ ಸರ್ವೇಗೆ ಇಳಿಯಲಿದ್ದಾರೆ.

ಸರ್ಕಾರದ ಸುತ್ತೋಲೆಯಂತೆ ನಗರಸಭೆ ವ್ಯಾಪ್ತಿಯೊಳಗೆ ಬಿ- ಖಾತೆ ಮಾಡಬೇಕಿರುವುದರಿಂದ ಗಡಿ ಭಾಗದ ಪಂಚಾಯಿತಿಗಳು ನಗರಸಭೆಗೆ ಸೇರಿದ ಆಸ್ತಿಗಳನ್ನು ಖಾತೆ ಮಾಡಿವೆ. ಎಷ್ಟು ಆಸ್ತಿಗಳನ್ನು ಖಾತೆ ಮಾಡಿರುವುದಾಗಿ ಮಾಹಿತಿ ಕೇಳಿದ್ದೇವೆ. ಒಂದು ವಾರದೊಳಗೆ ಸಂಪೂರ್ಣ ಮಾಹಿತಿ ಕೊಡುವುದಾಗಿ ಹೇಳಿದ್ದಾರೆ. ಬಿ- ಖಾತೆ ವಿವರಣೆಯನ್ನು ಜಿಲ್ಲಾಧಿಕಾರಿಗಳೂ ಕೇಳಿದ್ದು, ಅವರಿಗೂ ನೀಡಬೇಕಿದೆ. ಈ ಖಾತೆಗಳು ಬಹಳ ಹಿಂದೆಯೇ ಆಗಿರುವುದರಿಂದ ಆಸ್ತಿಗಳನ್ನು ಸಮರ್ಪಕವಾಗಿ ವಿನಿಮಯ ಮಾಡಿಕೊಳ್ಳಲಾಗುವುದು. ಹಿಂದೆಲ್ಲಾ ಗಡಿ ಗುರುತಿಸಿರಲಿಲ್ಲ. ಸರ್ವೇ ನಂ., ಪಂಚಾಯಿತಿ ಎಲ್ಲೆಗಳ ಮೇಲೆ ಖಾತೆ ಮಾಡುತ್ತಿದ್ದರು. ಕ್ರಮಕ್ಕಿಂತ ಹೆಚ್ಚಾಗಿ ನಗರಸಭೆ ಮತ್ತು ಗ್ರಾಪಂ ಆಸ್ತಿಗಳ ನಡುವಿನ ಗೊಂದಲಕ್ಕೆ ಅಂತ್ಯಹಾಡಬೇಕಿದೆ.