66 ಕೆ.ಜಿ ಗಾಂಜಾ ವಶ, 6 ಆರೋಪಿಗಳ ಬಂಧನ

ಕನ್ನಡಪ್ರಭ ವಾರ್ತೆ ಅರಸೀಕೆರೆ

ನಗರ ಮತ್ತು ಹೊರವಲಯಗಳಲ್ಲಿ ಗಾಂಜಾ ಮಾರಾಟ ಮತ್ತು ಸೇವನೆ ದಿನೇ ದಿನೇ ಹೆಚ್ಚಾಗುತ್ತಿದ್ದು, ಇದರ ಬೆನ್ನತ್ತಿದ ಅಬಕಾರಿ ಅಧಿಕಾರಿಗಳು ಇತ್ತೀಚೆಗೆ ಮಿಂಚಿನ ಕಾರ್ಯಾಚರಣೆಗಳನ್ನು ನಡೆಸಿ ಪ್ರಕರಣ ದಾಖಲಿಸಿ ಆರೋಪಿಗಳಿಗೆ ಹೆಡೆಮುರಿ ಕಟ್ಟುತ್ತಿದ್ದಾರೆ. ಅಬಕಾರಿ ನಿರೀಕ್ಷಕರಾಗಿ ಇತ್ತೀಚೆಗೆ ಅರಸೀಕೆರೆಗೆ ಬಂದಿರುವ ರಮ್ಯ ಎಚ್.ಡಿ. ಮತ್ತು ತಂಡ ಹಾಗೂ ಹಾಸನ ಜಿಲ್ಲಾ ಅಬಕಾರಿ ಆಯುಕ್ತರ ಕಚೇರಿ ಹೆಚ್ಚುವರಿ ಪ್ರಭಾರ ಉಪನಿರೀಕ್ಷಕ ಜಯಕುಮಾರ್ ವಿ.ಜಿ. ನೇತೃತ್ವದಲ್ಲಿ ತಾಲೂಕಿನ ನಡೆದ ಮೂರನೆ ದಾಳಿ ಇದಾಗಿದ್ದು ಮೂರು ದಾಳಿಯಲ್ಲೂ ಬಾರಿ ಮೊತ್ತದ ಗಾಂಜಾ ವಶಪಡಿಸಿಕೊಂಡಿದ್ದು ಪ್ರಶಂಸಿಸಬೇಕಾದ ಸಂಗತಿಯಾಗಿದೆ.ಅಬಕಾರಿ ನಿರೀಕ್ಷಕಿ ರಮ್ಯಾ ಅವರು ಸಿಬಂದಿಯೊಂದಿಗೆ ಸೆ. 13ರ ಶನಿವಾರ ರಾತ್ರಿ ವೇಳೆ ರಸ್ತೆ ಕಾವಲಿನಲ್ಲಿದ್ದಾಗ ತಾಲೂಕಿನ ಬಂಡೀಹಳ್ಳಿ ಸಮೀಪ ಬೈಕ್ ಒಂದರಲ್ಲಿ ಅಕ್ರಮವಾಗಿ ಸಾಗಿಸುತ್ತಿದ್ದ ಗಾಂಜಾ ವಶಪಡಿಸಿಕೊಂಡಿದ್ದು ಕುಮಾರಿ ಎಂಬ ಆರೋಪಿಯನ್ನು ಬಂಧಿಸಿದ್ದಾರೆ. ಪ್ರಮುಖ ಆರೋಪಿ ಬೈಕ್ ಸವಾರ ಅಭಿಲಾಷ್ ಬೈಕ್ ಸ್ಥಳದಲ್ಲೆ ಬಿಟ್ಟು ಪರಾರಿಯಾಗಿದ್ದಾನೆ. ಬಂಧಿತಳಿಂದ ಸುಮಾರು 520 ಗ್ರಾಂ ತೂಕದ ಸುಮಾರು ಹದಿನೈದು ಸಾವಿರ ಬೆಲೆ ಬಾಳುವ ಗಾಂಜಾ, ಸಾಗಾಣಿಕೆಗೆ ಬಳಸುತ್ತಿದ್ದ ಬೈಕ್ ಅನ್ನು ವಶಪಡಿಸಿಕೊಂಡು ಪ್ರಕರಣ ದಾಖಲಿಸಿದ್ದಾರೆ.

ಕಳೆದ ಆಗಸ್ಟ್‌ ತಿಂಗಳಿನಲ್ಲೂ ಕೂಡ ಜಯಕುಮಾರ್ ಮತ್ತು ತಂಡ ದಾಳಿ ನಡೆಸಿ ಸುಮಾರು 5 ಕೆಜಿ ಗಾಂಜಾ ವಶಪಡಿಸಿಕೊಂಡು ಸಯ್ಯದ್ ಜುನೇದ್, ಸಯ್ಯದ್ ರುಹಾನ್ ಹಾಗೂ ಶೇಕ್ ಹುಸೇನ್ ಎಂಬ ಮೂವರು ಆರೋಪಿಗಳನ್ನು ಬಂಧಿಸಿ ಎರಡು ವಾಹನಗಳನ್ನು ವಶಪಡಿಸಿಕೊಂಡಿದ್ದರು.

ಸದರಿ ದಾಳಿಯಲ್ಲಿ ಸಿಬ್ಬಂದಿ ರಂಜಿತ, ತೋಟದೇಶ, ಆರ್ ಮಲ್ಲಿಕಾರ್ಜುನ ಬಿ ಗಿಣ್ಣಿ, ಮಲ್ಲಿಕಾರ್ಜುನ ಕಲಬುರಗಿ, ಚಾಲಕ ಮತ್ತಿತರು ಹಾಜರಿದ್ದರು.