ದುಬಾರೆ: 70ನೇ ಕನ್ನಡ ರಾಜ್ಯೋತ್ಸವ ಕಾರ್ಯಕ್ರಮ

ಕನ್ನಡಪ್ರಭ ವಾರ್ತೆ ಗುಡ್ಡೆಹೊಸೂರು

ಕಾವೇರಿ ರಿವರ್ ರಾಫ್ಟಿಂಗ್ ನೌಕರರ ಸಂಘದ ಅಧ್ಯಕ್ಷರಾದ ನಿತನ್ ಅವರ ನೇತೃತ್ವದಲ್ಲಿ ಕ್ರೀಡಾಕೂಟ ಜರುಗಿತು.

ಕೊಡಗು ಜಿಲ್ಲಾ ಕರವೇ ಅಧ್ಯಕ್ಷರಾದ ದೀಪಕ್ ಅವರು ಮಾತನಾಡಿ ದುಬಾರೆಯ ರಿವರ್ ರಾಫ್ಟಿಂಗ್ ಹಾಗೂ ಆನೆ ಶಿಬಿರದ ಸ್ಥಳಗಳು ಕೊಡಗಿಗೆ ಆಗಮಿಸುವ ಪ್ರವಾಸಿಗರ ಆಕರ್ಷಣೆಯ ಸ್ಥಳವಾಗಿದೆ.

ನಂಜರಾಯಪಟ್ಟಣ ಗ್ರಾಮ ಪಂಚಾಯಿತಿ ಅಧ್ಯಕ್ಷರಾದ ಸಿ ಎಲ್ ವಿಶ್ವ ಅವರು ಮಾತನಾಡಿ , ಪ್ರತಿವರ್ಷವು ದುಬಾರೆಯಲ್ಲಿ ನಡೆಯುವ ಜಲ ಕ್ರೀಡೆಯು ಒಂದು ಹಬ್ಬದ ವಾತಾವರಣವನ್ನೇ ಸೃಷ್ಟಿಸುತ್ತದೆ, ಇಲ್ಲಿ ಜಾತಿ ಜಾತಿಗಳ ಹೆಸರಿನಲ್ಲಿ ಕ್ರೀಡಾಕೂಟಗಳು ನಡೆಯುವುದಿಲ್ಲ ಬದಲಿಗೆ ಎಲ್ಲಾ ಕೋಮಿನ ಎಲ್ಲಾ ಜಾತಿಯ ಯುವಕರು ಸೇರಿ ಇಂಥ ಕ್ರೀಡಾಕೂಟಗಳನ್ನು ಆಯೋಜಿಸುತ್ತಿರುವುದು ಸೌಹಾರ್ದತೆಯ ಪ್ರತೀಕ ಎಂದು ಬಣ್ಣಿಸಿದರು, ನಂಜರಾಯಪಟ್ಟಣ ಪಂಚಾಯಿತಿ ಗಾಂಧಿ ಗ್ರಾಮ ಪ್ರಶಸ್ತಿಗೆ ಭಾಜನವಾಗಿದ್ದರೆ ಅದು ಇಲ್ಲಿನ ಯುವಕರ ಸಹಕಾರದಿಂದ ಎಂದು ತಿಳಿಸಿದರು.

ನಮ್ಮ ರಾಫ್ಟಿಂಗ್ ಚಾಲಕರು ಪ್ರವಾಸಿಗರನ್ನು ರಂಜಿಸುವ ಗೈಡ್ ಮಾತ್ರವಲ್ಲ, ದಸರಾದಂತಹ ರಾಜ್ಯ ಮಟ್ಟದ ಕ್ರೀಡಾಕೂಟಗಳಲ್ಲಿ ಭಾಗವಹಿಸಿ ಪ್ರಶಸ್ತಿ ಪಡೆಯುವುದರ ಮುಖಾಂತರ ನಮ್ಮ ಊರಿಗೆ ಕೀರ್ತಿ ತಂದ ಹೆಮ್ಮೆಯ ನಾವಿಕರು ಎಂದು ಬಣ್ಣಿಸಿದರು.

ಜಲ ಕ್ರೀಡಾ ಪಂದ್ಯಾಟಗಳು ಬೆಳಿಗ್ಗೆ 9 ರಿಂದ ಪ್ರಾರಂಭವಾಗಿ ಸಂಜೆ 6 ಕ್ಕೆ ಮುಕ್ತಾಯಗೊಂಡಿತು, ತೀವ್ರ ಹಣಹಣಿಯಿಂದ ಕೂಡಿದ ಪಂದ್ಯಾಟಗಳು ರೋಮಾಂಚಕವಾಗಿದ್ದವು .

ಬೋಟ್ ರೇಸ್ ವಿಭಾಗದ ಸ್ಪರ್ಧೆಯಲ್ಲಿ ಪ್ರಥಮ ದ್ವಿತೀಯ ಹಾಗೂ ತೃತೀಯ ಸ್ಥಾನಗಳನ್ನು ಕ್ರಮವಾಗಿ ವೇವ್ ವಾರಿಯರ್ಸ್, ಟೀಮ್ ಕಾವೇರಿ, ಟೀಮ್ ಬ್ರಹ್ಮಪುತ್ರ, ತಂಡಗಳು ಪಡೆದುಕೊಂಡವು. ಪುರುಷರ ಹಗ್ಗ ಜಗ್ಗಾಟ ಸ್ಪರ್ಧೆಯಲ್ಲಿ ಪ್ರಥಮ ದ್ವಿತೀಯ ಸ್ಥಾನಗಳನ್ನು ಕ್ರಮವಾಗಿ ರೈ ಫ್ಯಾಮಿಲಿ ಹೊಸಗದ್ದೆ, ವೈಲ್ಡ್ ಕಾರ್ಟ್ ಬಿ, ತಂಡಗಳು ಪಡೆದುಕೊಂಡವು.

ಈಜು ಸ್ಪರ್ಧೆಯಲ್ಲಿ ಕ್ರಮವಾಗಿ ಪ್ರಥಮ ದ್ವಿತೀಯ ತೃತೀಯ ಸ್ಥಾನಗಳನ್ನು ಪುನೀತ್, ರಂಜಿತ್, ಪ್ರತಾಪ್ ಅವರುಗಳು ಪಡೆದುಕೊಂಡರು. ಮಹಿಳೆಯರಿಗಾಗಿ ಮ್ಯೂಸಿಕಲ್ ಬಾಲ್ ಸ್ಪರ್ಧೆಯಲ್ಲಿ ಕ್ರಮವಾಗಿ ಪ್ರಥಮ ದ್ವಿತೀಯ ಸ್ಥಾನಗಳನ್ನು ಕಾವ್ಯ ರಾಜೇಶ್, ರಮ್ಯಾ ಸತೀಶ್ ಅವರುಗಳು ಪಡೆದುಕೊಂಡರು.