ಎರಡು ತಿಂಗಳಲ್ಲಿ 85 ಮಂದಿಗೆ ಹಾವಿನ ಕಡಿತ

ಕನ್ನಡಪ್ರಭ ವಾರ್ತೆ ಚಿಕ್ಕಬಳ್ಳಾಪುರ

ಈಗ ಎಲ್ಲಡೆ ಬಿರುಬಿಸಿಲು, ಮನುಷ್ಯರು ಒಂದು ಕಡೆಯಿಂದ ಇನ್ನೊಂದು ಕಡೆ ಹೋಗಿಯಾದರೂ, ದೇಹ ಹಾಗೂ ಮನಸ್ಸನ್ನು ತಂಪಾಗಿಸಿಕೊಳ್ಳುತ್ತಾರೆ. ಆದರೆ ಹುತ್ತಗಳು ಮತ್ತು ಬಿಲಗಳ ಒಳಗೆ ಇರುವ ಹಾವುಗಳು ಹುತ್ತ ಮತ್ತು ಬಿಲಗಳಿಂದ ಆಚೆ ಬರುತ್ತಿವೆ. ಜಿಲ್ಲೆಯಲ್ಲಿ ಹಾವುಗಳ ಹಾವಳಿ ಹೆಚ್ಚಾಗಿದ್ದು, ಅದರಲ್ಲೂ ಗ್ರಾಮಾಂತರ ಮತ್ತು ನೂತನ ಬಡಾವಣೆಗಳಲ್ಲಿ ಹೆಚ್ಚಾಗಿದೆ.

ಜಿಲ್ಲೆಯಲ್ಲಿ ನಾಯಿಗಿಂತ ಹಾವುಗಳ ಕಾಟ ಹೆಚ್ಚಾಗಿದೆ. ಈಗ ಬಿರು ಬಿಸಿಲು ಹಿನ್ನೆಲೆ ಹುತ್ತ, ಬಿಲಗಳ ಒಳಗೆ ರಕ್ಷಣಾತ್ಮಕವಾಗಿ ಇರುತ್ತಿದ್ದ ಹಾವುಗಳು, ಈಗ ಬಿಸಿಲ ಬೇಗೆ ತಾಳಲಾರದೆ, ರಸ್ತೆ, ಮನೆ, ಶೌಚಾಲಯಗಳು, ಪಾರ್ಕ್​​ಗಳು, ಹೊಲ,ಗದ್ದೆ,ತೋಟಗಳು,ಬಾವಿಗಳು,ಕೆರೆ-ಕುಂಟೆಗಳು, ಕೃಷಿ ಹೊಂಡಗಳು, ನೀರಿನ ಸಂಪಿನಲ್ಲಿ ಕಾಣಿಸುತ್ತಿವೆ. ಜನರು ಒಡಾಡುವಾಗ ಸ್ವಲ್ಪ ಯಾಮಾರಿ ತುಳಿದರೆ, ಸಿಕ್ಕಸಿಕ್ಕವರೆಗೆ ಹಾವು ಕಚ್ಚುತ್ತಿವೆ. ಎರಡು ತಿಂಗಳಲ್ಲಿ ಚಿಕ್ಕಬಳ್ಳಾಪುರ ಜಿಲ್ಲೆಯೊಂದರಲ್ಲಿ 85 ಜನರಿಗೆ ಹಾವು ಕಚ್ಚಿದ್ದು, ಈ 85 ಜನರಿಗೂ ನಾಗರ ಹಾವುಗಳೇ ಕಚ್ಚಿರುವುದು ವಿಪರ್ಯಾಸ.

ಮೃತರಿಗೆ ಪರಿಹಾರ ಮೊತ್ತ ಹೆಚ್ಚಿಸಿ

ಶೇ.70 ರಷ್ಟು ಹಾವುಗಳು ವಿಷಪೂರಿತವಲ್ಲ. ಹಾವು ಕಡಿತಕ್ಕೊಳಗಾದವರು ಆತಂಕ ಪಡಬೇಕಿಲ್ಲ. ಹಾವು ಕಡಿದರೆ ಮಂತ್ರ ಹಾಕಿ, ಗುಣಪಡಿಸಬಹುದು ಎಂಬುದು ಮೂಢನಂಬಿಕೆ. ವಿಷಪೂರಿತ ಹಾವು ಕಡಿದಾಗ ಚಿಕಿತ್ಸೆ ತಡವಾದಲ್ಲಿ ಔಷಧ ನೀಡಿದರೂ ಜೀವ ಉಳಿಸಲು ಸಾಧ್ಯವಿಲ್ಲ. ಇನ್ನು ಮಂತ್ರದಿಂದ ಜೀವ ಉಳಿಸಲು ಸಾಧ್ಯವೇ. ಮಂತ್ರ ತಂತ್ರವನ್ನು ನಂಬುವುದು, ಕಚ್ಚಿದ ಹಾವನ್ನು ಹುಡುಕುತ್ತ ಸಮಯ ವ್ಯರ್ಥ ಮಾಡುವುದು ಇವೆಲ್ಲ ಸಾವಿಗೆ ಕಾರಣವಾಗುತ್ತದೆ. ಹಾವು ಕಡಿದ 30 ನಿಮಿಷದಿಂದ 3 ಗಂಟೆಯೊಳಗೆ ಸಾವು ಸಂಭವಿಸಲಿದ್ದು, ಅಷ್ಟರೊಳಗೆ ಅಗತ್ಯ ಚಿಕಿತ್ಸೆ ಪಡೆದರೆ, ಪ್ರಾಣ ಹಾನಿ ಸಂಭವಿಸುವುದಿಲ್ಲ ಎನ್ನುತ್ತಾರೆ ವೈದ್ಯರು.