ಹೋಳಿ ಆಚರಣೆಗೆ ಸಂಭ್ರಮದ ಸ್ವಾಗತ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ಮಧ್ಯರಾತ್ರಿ ನಡೆದ ಕಾಮದಹನದ ಪ್ರಕ್ರಿಯೆಗೆ ಕಿಲ್ಲಾ ಓಣಿಯ ಬಸವಪ್ರಭು ಸರನಾಡಗೌಡರ ಮನೆಯಿಂದ ಹಲಿಗೆ ಹಾಗೂ ನಿಶಾನೆಯನ್ನು ತೆಗೆದುಕೊಂಡು, ನಾರಾಯಣ ಕುಲಕರ್ಣಿ ಅವರ ಜೊತೆಗೂಡಿ ಅಂಬೇಡ್ಕರ ಗಲ್ಲಿಯಲ್ಲಿರುವ ರಾಮಚಂದ್ರ ಖಾತೆದಾರ ಮನೆಯಿಂದ ಬೆಂಕಿಯನ್ನು ತಂದು ಮೊದಲ ಕಾಮದಹನ ನಡೆಸುವ ಮೂಲಕ ಪರಂಪರೆಯ ಹೋಳಿಗೆ ವೈಭವದ ಚಾಲನೆ ನೀಡಲಾಯಿತು.

ಭಾವೈಕ್ಯತೆಯ ಸಂಕೇತವಾಗಿರುವ ಬಾಗಲಕೋಟೆಯ ಹೋಳಿಹಬ್ಬದ ಮೊದಲ ಕಾಮದಹನದ ನಂತರ ನಗರದ ವಿವಿಧ ಬಡಾವಣೆಗಳಲ್ಲಿ ಜಾತಿ, ಮತ, ಕುಲ ಸಮಾಜದ ಅಂತಸ್ತುಗಳನ್ನು ಬದಿಗಿಟ್ಟು ಸಂಪ್ರದಾಯದ ಪ್ರಕಾರ ಕಾಮದಹನವನ್ನು ನೆರವೇರಿಸಿದರೆ, ಯುವ ಸಮೂಹ ಹಲಗೆ ಬಾರಿಸುವ ಮೂಲಕ ಕಾಮದಹನಕ್ಕೆ ಕಳೆಕಟ್ಟಿದರು. ಬುಧವಾರದಿಂದ ಆರಂಭವಾಗುವ ಬಣ್ಣದಾಟ ಮೂರು ದಿನಗಳ ಕಾಲ ನಡೆಯಲಿದ್ದು, ಬಣ್ಣದಾಟದಲ್ಲಿ ಎಲ್ಲಾ ವಯೋಮಾನದವರು ಭಾಗವಹಿಸಲಿದ್ದಾರೆ.