ಕಣ್ಮನ ಸೆಳೆದ ಜಾನಪದ ಕಲಾತಂಡಗಳ ಮೆರವಣಿಗೆ

ಕನ್ನಡಪ್ರಭ ವಾರ್ತೆ ಬೈಲಹೊಂಗಲ

ಹಣೆಗೆ ತಿಲಕ, ತಲೆಗೆ ಪೇಠ ತೊಟ್ಟು ಕಂಗೊಳಿಸಿದ ಯುವಕರು, ಊರಿನ ಹಿರಿಯರು, ಪೂರ್ಣಕುಂಭ ಹೊತ್ತು ಸಾಗಿದ ಸುಮಂಗಲೆಯರು ಮೆರವಣಿಗೆ ಆಕರ್ಷಣೆಯಾಗಿದ್ದರು. ವಿಶ್ವದಲ್ಲೇ ಪ್ರಥಮ ಮಹಿಳಾ ಸೈನ್ಯ ಕಟ್ಟಿ ನಾಡ ರಕ್ಷಣೆಗೆ ದಿಟ್ಟ ಹೋರಾಟ ನಡೆಸಿ ಇತಿಹಾಸ ಸೃಷ್ಟಿಸಿದ ರಾಣಿ ಮಲ್ಲಮ್ಮಳ ಉತ್ಸವದಲ್ಲಿ ಜಾನಪದ ಕಲಾತಂಡಗಳ ಮೆರವಣಿಗೆ ಜನರ ಮನಸೂರೆಗೊಳಿಸಿತು.

ಶಿರಸಿ ತಾಲೂಕು ಸೋಂದಾ ಗ್ರಾಮದಿಂದ ವಿವಿಧೆಡೆ ಪೂಜೆ ಹಾಗೂ ಗೌರವ ಸ್ವಾಗತಗೊಂಡು ಆಗಮಿಸಿದ ಮಲ್ಲಮ್ಮಳ ವಿಜಯ ಜ್ಯೋತಿಗೆ ಪೂಜೆ ಸಲ್ಲಿಸಿ ಸ್ವಾಗತಿಸಿದರು. ಬೆಳವಡಿ ಮಲ್ಲಮ್ಮ ವೃತ್ತದಲ್ಲಿ ಗ್ರಾಪಂ ಅಧ್ಯಕ್ಷ ಚಂದ್ರಶೇಖರಯ್ಯ ಕಾರಿಮನಿ ಬೆಳವಡಿ ಸಂಸ್ಥಾನದ ಧ್ವಜಾರೋಹಣ ನೆರವೇರಿಸಿದರು.

ಮೆರಗು ತಂದ ಕಲಾ ತಂಡಗಳು:

ಮೂಡಲಗಿ ಪುರವಂತಿಕೆ ಕಲಾ ಮೇಳ, ಡೊಳ್ಳು ಕುಣಿತ, ಅಥಣಿ ಮತ್ತು ರಾಮದುರ್ಗದ ಮಹಿಳಾ ಡೊಳ್ಳು ಕುಣಿತ, ಜಗ್ಗಲಗಿ ತಂಡ, ಸಂಬಳ ವಾದನ, ರಾಯಬಾಗದ ಹಲಗೆ ವಾದನ, ರಾಯಬಾಗದ ಡೋಲ್ ಪಥಕ್, ಕರಬಲ್ ಕುಣಿತ, ಚಿಕ್ಕೋಡಿಯ ಕರಡಿ ಮಝಲು ಮತ್ತು ಜಾಂಝ್ ಪಥಕ್, ಗೋಕಾಕದ ಡೊಳ್ಳು ಕುಣಿತ, ಸಿ.ಎಸ್.ಲೋಕೇಶ ವೀರ ಹುನುಮಾನ ಗೊಂಬೆ ರೂಪಕದಲ್ಲಿ ಗಮನ ಸೆಳೆದರು. ಉಳಿದಂತೆ ವೀರಗಾಸೆ. ಅಗೋರಿ, ತಮಟೆ ವಾದನ, ಪೂಜಾ ಕುಣಿತ, ಕಂಸಾಳೆ ಕುಣಿತ ಉತ್ಸವದ ಕಳೆ ಹೆಚ್ಚಿಸಿದವು. ಬೆಳವಡಿಯ ಈಶಪ್ರಭು ಶಿಕ್ಷಣ ಸಂಸ್ಥೆಯ ಶಾಲೆಯ ವಿದ್ಯಾರ್ಥಿಗಳು ಬೆಳವಡಿ ಮಲ್ಲಮ್ಮ ಮತ್ತು ರಾಜಾಈಶಪ್ರಭು ರೂಪಕ ಮತ್ತು ಮಹಿಳಾ ಸೈನ್ಯದ ವೇಷಭೂಷಣದಲ್ಲಿ ಮಿಂಚಿದರು.