ದೇಶವ್ಯಾಪಿ ಬಲಿಷ್ಠವಾದ ಸಂಘ ನಿಷೇಧಿಸಲು ಸಾಧ್ಯವಿಲ್ಲ: ಡಾ. ವೀರಣ್ಣ ಚರಂತಿಮಠ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕ್ಲಿಷ್ಟಕರ ಪರಿಸ್ಥಿತಿ ಹೊಂದಿರುವ ಕೇರಳದಲ್ಲೇ ಆರ್‌ಎಸ್‌ಎಸ್ ಅನ್ನು ಅಲ್ಲಾಡಿಸಲು ಅಲ್ಲಿನ ಕಮ್ಯೂನಿಸ್ಟ್ ಹಾಗೂ ಕಾಂಗ್ರೆಸ್ ಮಿತ್ರಪಕ್ಷಗಳಿಗೆ ಸಾಧ್ಯವಾಗಿಲ್ಲ. ದೇಶದ 19 ರಾಜ್ಯಗಳಲ್ಲಿ ಬಿಜೆಪಿ ಆಡಳಿತದಲ್ಲಿದೆ. ಬಲಿಷ್ಠ ಪ್ರಧಾನಿ ದೇಶ ಆಳುತ್ತಿರುವಾಗ ಕೇವಲ ಪ್ರಚಾರದ ತೆವಲಿಗೆ ಪ್ರಿಯಾಂಕ್ ಖರ್ಗೆ ಅಂಥವರು ಈ ರೀತಿ ಹೇಳಿಕೆ ನೀಡಬಹುದೇ ವಿನಃ ಅವರ ತಂದೆ ಮಲ್ಲಿಕಾರ್ಜುನ ಖರ್ಗೆ ಅವರಿಂದಲೂ ಸಾಧ್ಯವಾಗದ್ದನ್ನು ಇವರು ಮಾಡುವುದು ಕನಸಿನ ಮಾತು ಎಂದು ವಾಗ್ದಾಳಿ ನಡೆಸಿದರು.

ಬಸವಣ್ಣನವರನ್ನು ಸಾಂಸ್ಕೃತಿಕ ನಾಯಕನನ್ನಾಗಿಸಿ, ಸರ್ಕಾರಿ ಕಚೇರಿಗಳಲ್ಲಿ ಭಾವಚಿತ್ರ ಅಳವಸುವುದನ್ನು ಕಡ್ಡಾಯಗೊಳಿಸಿದ್ದರೂ ನನ್ನನ್ನು ದ್ವೇಷಿಸುತ್ತೀರಿ ಏಕೆ ಎಂಬ ಸಿಎಂ ಸಿದ್ದರಾಮಯ್ಯ ಅವರ ಪ್ರಶ್ನೆಗೆ ಉತ್ತರಿಸಿದ ಚರಂತಿಮಠ ಅವರು, ಬಸವಣ್ಣನವರದು ಸಾಂಸ್ಕೃತಿಕ ರಾಯಭಾರಿಯನ್ನೂ ಮೀರಿದ ಮೇರು ವ್ಯಕ್ತಿತ್ವ. ಅವರು ಪ್ರತಿಪಾದಿಸಿದ ವಿಚಾರಗಳಿಂದಾಗಿ ವಿಶ್ವಗುರುವಾದ್ದಾರೆ. ನಾವು ಸರ್ಕಾರದ ಘೋಷಣೆ ಎಂದಿಗೂ ವಿರೋಧಿಸುವುದಿಲ್ಲ. ಆದರೆ ವೀರಶೈವ-ಲಿಂಗಾಯತರನ್ನು ಒಡೆಯುವ ಮನಸ್ಥಿತಿ ವಿರೋಧಿಸುತ್ತೇವೆ. 2013-18ರ ಅವಧಿಯುದ್ಧಕ್ಕೂ ಸಿದ್ದರಾಮಯ್ಯ ಅವರು ಮಾಡಿರುವುದು ಇದನ್ನೇ. ದೇವರಾಜ ಅರಸು ಹಾವನೂರ ಆಯೋಗ ರಚಿಸಿ ವೀರಶೈವ-ಲಿಂಗಾಯತ ಉಪಪಂಗಡ ಒಡೆದರು. ಒಕ್ಕಲಿಗರನ್ನು ಒಡೆಯಲು ಸಾಧ್ಯವಾಗಲಿಲ್ಲ. ನಾವು ಸುಲಭವಾಗಿ ಸಿಗುತ್ತೇವೆ ಎಂಬ ಕಾರಣಕ್ಕೆ ನಮ್ಮ ಸಮಾಜ ಗುರಿಯಾಗಿಸುತ್ತಾರೆ. ಜನಕ್ಕೆ ಮೀಸಲಾತಿ ಸೌಲಭ್ಯ ಪಡೆದುಕೊಂಡಿರಬಹುದು. ಆದರೆ ಆಳದಲ್ಲಿ ಸಮಾಜ ಒಂದೇ ಎಂಬ ಭಾವವಿದೆ ಎಂದು ಹೇಳಿದರು.