ಕಲಾವಿದರಿಗೆ ಮುಡಿಪು: ಉಡುಪಿ ‘ಯಕ್ಷಗಾನ ಕಲಾರಂಗ’ಕ್ಕೆ ಸಾರ್ಥಕ ಸುವರ್ಣ ಸಂಭ್ರಮ

ಯಾವುದೇ ಸಂಪನ್ಮೂಲ ಇಲ್ಲದ ಸಂಸ್ಥೆಯಿಂದ ವಾರ್ಷಿಕ 5 ಕೋಟಿ ರು. ವ್ಯವಹಾರ । ಕಲಾವಿದರಿಗೆ ನಾನಾ ರೂಪದ ನಿರಂತರ ನೆರವುಕಳೆದ ಶತಮಾನದ ೭೦ರ ದಶಕದಲ್ಲಿ ಅನ್ಯ ಕಲಾಪ್ರಕಾರದ ಪ್ರಭಾವದಿಂದ ತನ್ನ ಪಾರಂಪರಿಕ ಸೊಗಸಿನಿಂದ ಯಕ್ಷಗಾನ ದೂರವಾಗುತ್ತಿರುವುದನ್ನು ಮನಗಂಡು ಕಲಾ ರಸಿಕರಿಗೆ ರುಚಿ ಶುದ್ಧಿಯ ಯಕ್ಷಗಾನವನ್ನು ತೋರಿಸುವ ಉದ್ದೇಶದೊಂದಿಗೆ, ಸಮಾನ ಮನಸ್ಕರಿಂದ ೧೯೭೫ರಲ್ಲಿ ಉಡುಪಿಯಲ್ಲಿ ಪ್ರಾರಂಭವಾದ ಸಂಸ್ಥೆ ಯಕ್ಷಗಾನ ಕಲಾರಂಗ.

೧೯೮೫ರಲ್ಲಿ ನೊಂದಾಯಿಸಲ್ಪಟ್ಟ ಈ ಸಂಸ್ಥೆಯಲ್ಲಿ ಆಜೀವ, ಪೋಷಕ ಮತ್ತು ಮಹಾ ಪೋಷಕರು ಸೇರಿದಂತೆ ಸುಮಾರು ೧೨೬೫ ಸದಸ್ಯರಿದ್ದಾರೆ. ಒಂದೂವರೆ ದಶಕಗಳ ಕಾಲ ಡಾ.ಬಿ.ಬಿ. ಶೆಟ್ಟರ ಲಲಿತಾ ಕ್ಲಿನಿಕ್, ಸುಂದರ ಶೆಟ್ಟರ ನಿರ್ಮಲಾ ಲಂಚ್ ಹೋಮ್ ಮತ್ತು ನಿಟ್ಟೂರು ಹೈಸ್ಕೂಲ್‌ಗಳಲ್ಲಿ ಕಲಾರಂಗದ ಕಚೇರಿ ಕಾರ್ಯಾಚರಿಸುತ್ತಿತ್ತು. ೨೦೦೦ನೇ ಇಸವಿಯಿಂದ ೨೦೨೪ರ ಏಪ್ರಿಲ್ ತಿಂಗಳವರೆಗೆ ಪೇಜಾವರ ಮಠದ ಕಟ್ಟಡದಲ್ಲಿದ್ದ ಕಚೇರಿ ಇದೀಗ ಇನ್‌ಫೋಸಿಸ್ ಫೌಂಡೇಶನ್ ದಾನವಾಗಿತ್ತ, ಸ್ವಂತ ಕಟ್ಟಡದಲ್ಲಿ ಕಾರ್ಯಾಚರಿಸುತ್ತಿದೆ.

ಫಲಾನುಭವಿಗಳಿಂದಲೇ ಬಂದ ದೇಣಿಗೆ ಈ ವರ್ಷ ರೂ. ಹತ್ತು ಲಕ್ಷವನ್ನು ಮೀರಿದೆ. ಫಲಾನುಭವಿಗಳು ತಮ್ಮ ವಿದ್ಯಾ ಪ್ರಗತಿ ಉಲ್ಲೇಖಿಸಿ ದಾನಿಗಳಿಗೆ ವರ್ಷಕ್ಕೆ ೪ ಪತ್ರ ಬರೆಯುತ್ತಾರೆ. ಉದ್ಯೋಗದ ನಂತರ ತಮ್ಮ ಪ್ರಥಮ ಸಂಬಳವನ್ನು ವಿದ್ಯಾಪೋಷಕ್‌ಗೆ ನೀಡಿ ಕೃತಜ್ಞತಾ ಭಾವ ವ್ಯಕ್ತಪಡಿಸಿದ ಕ್ಷಣಗಳು ಹೃದಯಸ್ಪರ್ಶಿ.‘ಮುಖ ಚೆಂದವಾಗಿದ್ದರೆ ಕನ್ನಡಿಯಲ್ಲೂ ಮುಖ ಚೆನ್ನಾಗಿ ಕಾಣುತ್ತದೆ. ನಾವು ಪಾರದರ್ಶಕವಾಗಿ ಸಂಪನ್ಮೂಲವನ್ನು ಸದುಪಯೋಗಪಡಿಸಿದರೆ ಜನ ಸರಿಯಾಗಿ ಸ್ಪಂದಿಸುತ್ತಾರೆ’ ಎಂದು ಕಾರ್ಯದರ್ಶಿ ಮುರಳಿ ಕಡೆಕಾರ್ ಕೃತಜ್ಞತಾ ಭಾವ ವ್ಯಕ್ತಪಡಿಸುತ್ತಾರೆ. ೩) ಯಕ್ಷ ಶಿಕ್ಷಣ : ಪರ್ಯಾಯ ಶ್ರೀ ಪಾದರ ಗೌರವ ಅಧ್ಯಕ್ಷತೆಯಲ್ಲಿ, ಉಡುಪಿ ಶಾಸಕರು ಅಧ್ಯಕ್ಷರಾಗಿರುವ ಟ್ರಸ್ಟ್ ಮೂಲಕ ಪ್ರೌಢಶಾಲಾ ವಿದ್ಯಾರ್ಥಿಗಳಿಗೆ ಯಕ್ಷ ಶಿಕ್ಷಣ ನೀಡಲಾಗುತ್ತಿದೆ. ಮೂಲತಃ ಉಡುಪಿ ತಾಲೂಕಿಗೆ ಸೀಮಿತವಾಗಿದ್ದ ಈ ತರಬೇತಿ, ಕಾಪು, ಕುಂದಾಪುರ ಮತ್ತು ಬೈಂದೂರು ಶಾಸಕರ ಆಶಯದಂತೆ ಆ ತಾಲೂಕುಗಳಿಗೂ ವಿಸ್ತರಿಸಲ್ಪಟ್ಟಿದೆ. ಈ ಯೋಜನೆಯಲ್ಲಿ ಇದೀಗ ೯೨ ಶಾಲೆಗಳಲ್ಲಿ ೩೦೦೦ ವಿದ್ಯಾರ್ಥಿಗಳಿಗೆ ಯಕ್ಷ ಶಿಕ್ಷಣ ನೀಡುವ ಮಹತ್ತರ ಜವಾಬ್ದಾರಿಯನ್ನು ಕಲಾರಂಗ ನಿರ್ವಹಿಸುತ್ತಿದೆ. ಯಕ್ಷ ಶಿಕ್ಷಣ ಪಡೆದ ವಿದ್ಯಾರ್ಥಿಗಳ ಪ್ರದರ್ಶನಗಳು ಡಿಸೆಂಬರ್ ತಿಂಗಳಲ್ಲಿ ಉಡುಪಿಯ ರಾಜಾಂಗಣ, ಬ್ರಹ್ಮಾವರ, ಕಾಪು, ಶಿರ್ವ, ಕುಂದಾಪುರ. ಬೈಂದೂರುಗಳಲ್ಲಿ ನಡೆಯಲಿದೆ. ಈ ಯೋಜನೆ ಆರಂಭದಿಂದ ಸಾವಿರಾರು ವಿದ್ಯಾರ್ಥಿಗಳು ಯಕ್ಷ ತರಬೇತಿ ಪಡೆದಿದ್ದಾರೆ. ಕಲಾರಂಗಕ್ಕೆ ಯಾವುದೇ ಸ್ವಂತ ಸಂಪನ್ಮೂಲಗಳಿಲ್ಲ. ಅದರ ಸಮಾಜಮುಖಿ ಕಾರ್ಯಗಳನ್ನು ಸೂಕ್ಷ್ಮವಾಗಿ ಗಮನಿಸಿದ ಜನತೆ ಸ್ವಯಂ ಪ್ರೇರಿತರಾಗಿ ಕಲಾರಂಗದ ಖಾತೆಗೆ ಹಣ ಜಮಾಯಿಸುತ್ತಾರೆ.ಗೃಹ ನಿರ್ಮಾಣ ಯೋಜನೆ: ವಿದ್ಯಾಪೋಷಕ್ ವಿದ್ಯಾರ್ಥಿಗಳ ಮನೆ ಭೇಟಿ ಸಂದರ್ಭದಲ್ಲಿ ದುಃಸ್ಥಿತಿಯಲ್ಲಿದ್ದ ಮನೆಗಳನ್ನು ಕಂಡು ಅವರಿಗೆ ಹೊಸತಾಗಿ ಗೃಹ ನಿರ್ಮಾಣ ಮಾಡುವ ಯೋಜನೆಯಲ್ಲಿ ಯಕ್ಷಗಾನ ಕಲಾವಿದರೂ ಒಳಗೊಂಡಿದ್ದಾರೆ. ಮನೆ ನಿರ್ಮಾಣದ ಸ್ಥಳವನ್ನು ಮಾತ್ರ ಫಲಾನುಭವಿಗಳು ಒದಗಿಸುತ್ತಾರೆ. ಕಟ್ಟಡ ಸಾಮಾಗ್ರಿಗಳು, ಕಾರ್ಮಿಕರು, ವಿದ್ಯುತ್ ಸರಬರಾಜು, ದೀಪ ಬೆಳಗಿಸಿ ಮನೆ ಉದ್ಘಾಟಿಸುವ ಸಮಾರಂಭ, ಪ್ರಾಯೋಜಕರ ಉಪಸ್ಥಿತಿ, ಉಪಾಹಾರದ ವ್ಯವಸ್ಥೆ ಎಲ್ಲವನ್ನೂ ಕಲಾರಂಗವೇ ಆಯೋಜಿಸುತ್ತಿದೆ. ಪ್ರತಿಯೊಂದು ವಿಷಯದಲ್ಲೂ ಪೂರ್ಣಗೊಂಡ ಮನೆಯನ್ನು ಪ್ರಾಯೋಜಕರ ಮೂಲಕವೇ ಫಲಾನುಭವಿಗಳಿಗೆ ಹಸ್ತಾಂತರಿಸುವ ಕ್ಷಣ ಹೃದಯಸ್ಪರ್ಶಿ. ಫಲಾನುಭವಿಗಳ ಕಣ್ಣಂಚಿನಲ್ಲಿ ಮಿನುಗುವ ಆನಂದಭಾಷ್ಪ ನಮಗೆ ನೀಡುವ ಸಂತೃಪ್ತಿಯನ್ನು ಶಬ್ದದಲ್ಲಿ ವರ್ಣಿಸಲು ಅಸದಳ ಎಂದು ೩೫ ವರ್ಷದಿಂದ ಕಲಾರಂಗದ ಕಾರ್ಯದರ್ಶಿ, ಎಲ್ಲ ಯೋಜನೆಗಳ ರೂವಾರಿ, ಚಾಲನಶಕ್ತಿ, ಮುರಳಿ ಕಡೆಕಾರ್ ಹೇಳುತ್ತಾರೆ.ಈಗಾಗಲೇ ೭೩ ಮನೆ ನಿರ್ಮಿಸಿದ್ದು ಇನ್ನು ೨೦ ಮನೆಗಳು ವಿವಿಧ ಹಂತಗಳಲ್ಲಿ ನಿರ್ಮಾಣಗೊಳ್ಳುತ್ತಿವೆ. ಸುಮಾರು ೬ ರಿಂದ ೭ ಲಕ್ಷಕ್ಕೆ ಸೀಮಿತವಾದ ಖರ್ಚಿನಲ್ಲಿ ಈ ಮನೆಗಳ ನಿರ್ಮಾಣದ ಪೂರ್ತಿ ಜವಾಬ್ದಾರಿಯನ್ನು ಕಲಾರಂಗ ನಿರ್ವಹಿಸುತ್ತಿದೆ. ಸ್ವತಃ ಇಂಜಿನಿಯರ್ ಆಗಿರುವ ಕಲಾರಂಗದ ಅಧ್ಯಕ್ಷ ಗಂಗಾಧರ ರಾಯರು ಮನೆ ನಿರ್ಮಾಣದ ಸ್ಥಳಕ್ಕೆ ಹಲವು ಬಾರಿ ಭೇಟಿ ನೀಡಿ. ಗುಣಮಟ್ಟವನ್ನು ಖಾತರಿಪಡಿಸುತ್ತಾರೆ. ಗೃಹ ಪ್ರವೇಶದ ಶುಭ ಸಂದರ್ಭದಲ್ಲಿ ಮನೆ ನಿರ್ಮಾಣದ ಪ್ರಾಯೋಜಕರು ಉಪಸ್ಥಿತರಿದ್ದು ತಮ್ಮ ಮನಸ್ಸಿನ ಇಚ್ಛೆ ಪರಿಪೂರ್ಣವಾಗಿರುವುದಕ್ಕೆ ಸಂತಸ ವ್ಯಕ್ತಪಡಿಸುತ್ತಾರೆ. ಕಲಾರಂಗದ ಮನೆ ಪ್ರಾಯೋಜಿಸಿದವರ ಪಟ್ಟಿ ನೋಡಿದರೆ ಸಂತಸ ಮತ್ತು ಆಶ್ಚರ್ಯ ಏಕಕಾಲದಲ್ಲಿ ಉಂಟಾಗುತ್ತದೆ. ಪೇಜಾವರ ಹಿರಿಯ ಸ್ವಾಮೀಜಿ ವಿಶ್ವೇಶತೀರ್ಥರು, ಕಿರಿಯ ಸ್ವಾಮೀಜಿ ವಿಶ್ವ ಪ್ರಸನ್ನ ತೀರ್ಥರು, ಪಲಿಮಾರು ಮಠಾಧೀಶರು, ಕರ್ನಾಟಕ ಬ್ಯಾಂಕ್, ಹೆಚ್.ಎಸ್. ಶೆಟ್ಟಿ ಮೊದಲಾದವರಿದ್ದಾರೆ. ನಿವೃತ್ತಿಯ ದಿನವೇ ಮುರಳಿ ಕಡೆಕಾರರು ತಮ್ಮ ಶಾಲೆಯ ಕೊರಗ ವಿದ್ಯಾರ್ಥಿನಿ ನಯನಳಿಗೆ ‘ವಿಶ್ವೇಶ’ವೆಂಬ ಹೆಸರಿನ ಮನೆ ಕಟ್ಟಿಸಿ ದಾನ ಮಾಡಿದ್ದಾರೆ. ಅಧ್ಯಕ್ಷರಾದ ಗಂಗಾಧರ ರಾಯರು ೪ ಮನೆ ಪ್ರಾಯೋಜಿಸಿದ್ದಾರೆ. ಕಲಾರಂಗದ ಬದ್ಧತೆ, ಪಾರದರ್ಶಕತೆ ಮತ್ತು ಕ್ಲಪ್ತತೆಗಳನ್ನು ಮನಸಾರೆ ಮೆಚ್ಚಿದ ಹಲವಾರು ಪ್ರಾಯೋಜಕರು ‘ತಮಗೊಂದು ಅವಕಾಶ ಕೊಡಿ’ ಎಂದು ಆಗ್ರಹಿಸುತ್ತಿದ್ದು, ಪ್ರಾಯೋಜಕರ ಸಂಖ್ಯೆ ಜಾಸ್ತಿಯಾದುದರಿಂದ ಅರ್ಹ ಫಲಾನುಭವಿಗಳನ್ನು ಗುರುತಿಸಲಾಗುತ್ತಿದೆ. ಕಾರ್ಯಕಾರಿ ಸಮಿತಿಯ ಹಿರಿಯ ಸದಸ್ಯ, ನಿವೃತ್ತ ಶಿಕ್ಷಕ ರಾಜಗೋಪಾಲ ಆಚಾರ್ಯರು ತಮ್ಮ ವಿವಾಹದ ೫೦ನೇ ವರ್ಷಾಚರಣೆಯನ್ನು ಆಚರಿಸಿದ ಪರಿ ವಿಶಿಷ್ಟವಾದುದು. ಕಾರ್ಕಳ ತಾಲೂಕಿನ ಈದು ಗ್ರಾಮದ ನೂರಾಲು ಬೆಟ್ಟಿನಲ್ಲಿ ಕಲಾರಂಗ ನಿರ್ಮಿಸಿದ ೫೦ನೇ ಮನೆಯನ್ನು ಆಚಾರ್ಯರು ಪ್ರಾಯೋಜಿಸಿ ತಮ್ಮ ಮದುವೆಯ ೫೦ನೇ ವರ್ಷವನ್ನು ಸಂಭ್ರಮಿಸಿದರು. ೧೯೯೦ರಲ್ಲಿ ಡಾ.ಬಿ.ಬಿ.ಶೆಟ್ಟರ ನೆನಪಿನಲ್ಲಿ ರು.೧೦೦೦ದ ಪುರಸ್ಕಾರದಿಂದ ಹಿರಿಯ ಕಲಾವಿದರೊಬ್ಬರಿಗೆ ನೀಡುತ್ತಿದ್ದ ‘ಯಕ್ಷಗಾನ ಕಲಾರಂಗ ಪ್ರಶಸ್ತಿ’, ಈಗ ೨೪ ಪ್ರಶಸ್ತಿಗಳ ಮೂಲಕ ೪ ಲಕ್ಷ ರು.ಗೆ ವಿಸ್ತರಿಸಲ್ಪಟ್ಟಿದ್ದು, ಸಂಸ್ಥೆಯ ಇನ್ನೊಂದು ಹಿರಿಮೆ. ಶ್ರೀ ವಿಶ್ವೇಶ ತೀರ್ಥ ಶ್ರೀಪಾದರ ಹೆಸರಿನಲ್ಲಿ ವಾರ್ಷಿಕ ಒಂದು ಲಕ್ಷ ರೂಪಾಯಿಯ ‘ವಿಶ್ವೇಶ ಪ್ರಶಸ್ತಿ’ಯನ್ನು ಯಕ್ಷಗಾನದಲ್ಲಿ ಗಣನೀಯ ಸಾಧನೆ ಮಾಡಿದ ಸಂಸ್ಥೆಗೆ ನೀಡಲಾಗುತ್ತಿದೆ. ಯಾವುದೇ ಸಂಪನ್ಮೂಲ ಇಲ್ಲದ ಈ ಸಂಸ್ಥೆ ವಾರ್ಷಿಕ ೫ ಕೋಟಿಯಷ್ಟು ವ್ಯವಹಾರವನ್ನು ದಾಖಲಿಸುತ್ತಿದೆ. ಪ್ರತಿವರ್ಷ ಕಲಾವಿದರಿಗೆ ಸನ್ಮಾನ, ತಾಳಮದ್ದಲೆ ಸಪ್ತಾಹ, ಸಾಧಕರ ಬಗ್ಗೆ ಪುಸ್ತಕ ಪ್ರಕಟಣೆ, ಬಣ್ಣಗಾರಿಕೆಯ ಶಿಬಿರ, ಕೋವಿಡ್ ಸಮಯದಲ್ಲಿ ಕಿಟ್ ವಿತರಣೆ, ಡಾ. ಶೈಲಜಾ ಭಟ್ ಪ್ರಾಯೋಜಿತ ಸರ್ಪಂಗಳ ಸುಬ್ರಹ್ಮಣ್ಯ ಭಟ್ ಪ್ರಶಸ್ತಿ ಪ್ರದಾನ ಮೊದಲಾದ ಕಾರ್ಯಗಳಿಗೆ ವಿಸ್ತರಿಸಿದೆ.

ವರ್ಷಂಪ್ರತಿ ಮೇ ೩೧ರಂದು ಕಲಾರಂಗ, ಉಡುಪಿಯ ರಾಜಾಂಗಣದಲ್ಲಿ ವೃತ್ತಿ ಕಲಾವಿದರ ಸಮಾವೇಶ ಆಯೋಜಿಸುತ್ತಿದೆ. ಈ ಬಾರಿಯ ಸಮಾವೇಶದಲ್ಲಿ ‘ಸುವರ್ಣ ಸಡಗರ’ವನ್ನು ಸಂಯೋಜಿಸಿಕೊಂಡು ೫೦ ಹಿರಿಯ ಕಲಾವಿದರಿಗೆ ‘ಯಕ್ಷಗಾನ ಕಲಾರಂಗ ಸುವರ್ಣ ಪುರಸ್ಕಾರ’ವನ್ನು ಪ್ರತಿಯೊಬ್ಬರಿಗೆ ೫೦ ಸಾವಿರ ರು. ನೀಡುವ ಮೂಲಕ ಬಹಳ ಅರ್ಥಪೂರ್ಣವಾಗಿ ಆಚರಿಸುತ್ತಿದೆ.ಕಲಾರಂಗಕ್ಕೆ ತನ್ನ ಅಸ್ತಿತ್ವದ ೪೯ ವರ್ಷಗಳವರೆಗೂ ಸ್ವಂತ ಮನೆ ಇರಲಿಲ್ಲ. ಈ ಸಂದರ್ಭದಲ್ಲಿ, ಕಾಕತಾಳೀಯ ಎಂಬಂತೆ, ಬೆಂಗಳೂರಿನ ಇನ್‌ಫೋಸಿಸ್ ಫೌಂಡೇಶನ್ ಸಂಸ್ಥೆಯು, ೧೫.೪೮ ಕೋಟಿ ರು. ವೆಚ್ಚದಲ್ಲಿ ಕಟ್ಟಡ ನಿರ್ಮಿಸಿ ಕೊಟ್ಟಿದೆ. ಸುಮಾರು ೧೫ ಸಾವಿರ ಚದರಡಿ ವಿಸ್ತೀರ್ಣದ ನಾಲ್ಕು ಮಹಡಿಯ ಈ ಕಟ್ಟಡದಲ್ಲಿ ಅತ್ಯುತ್ತಮ ಧ್ವನಿವರ್ಧಕ, ಬೆಳಕು, ಹವಾನಿಯಂತ್ರಣ, ೩೮೮ ಜನರಿಗೆ ಆಧುನಿಕ ರೀತಿಯ ಆಸನ, ಲಿಫ್ಟ್, ವಿಶ್ರಾಂತಿ ಕೊಠಡಿಗಳು, ಕಚೇರಿ, ವೇದಿಕೆ, ಬಣ್ಣದ ಮನೆಗಳ ಸೌಲಭ್ಯಗಳಿವೆ. ಏಪ್ರಿಲ್ ೨೦೨೪ರಲ್ಲಿ ಉದ್ಘಾಟನೆಯಾದ ಕಟ್ಟಡದಲ್ಲಿ ಯಕ್ಷಗಾನ, ಸಂಗೀತ, ನಾಟಕ ಮೊದಲಾದ ನಿರಂತರ ಕಾರ್ಯಕ್ರಮಗಳ ಮೂಲಕ ‘ನಿತ್ಯೋತ್ಸವ’ ನಡೆಯುತ್ತಿದೆ.ವಿವಿಧ ರಂಗಗಳಲ್ಲಿ ಕಲಾರಂಗದ ಸಾಧನೆಗಳನ್ನು ಗಮನಿಸಿದ ಮಣಿಪಾಲದ ಮಾಹೆ ಸಂಸ್ಥೆ ರು. ಐವತ್ತು ಲಕ್ಷದ ಬೃಹತ್ ಮೊತ್ತದ ದೇಣಿಗೆ ನೀಡಿ ಪ್ರೋತ್ಸಾಹಿಸಿರುವುದು ನಮಗೆ ಹೆಮ್ಮೆ ತಂದಿದೆ. ಮಾತ್ರವಲ್ಲದೆ ಮುಂದಿನ ೫ ವರ್ಷ ಹತ್ತು ಲಕ್ಷದಂತೆ ನೀಡಿ ಸಹಕರಿಸಲಿದೆ.ವರ್ಷಗಳಿಂದ ಸಂಸ್ಥೆಯ ಸಾಧನೆಗಳನ್ನು ಬಿಂಬಿಸುವುದಕ್ಕಾಗಿ ಮತ್ತು ದಾನಿಗಳಿಗೆ ಕೃತಜ್ಞತೆ ವ್ಯಕ್ತಪಡಿಸುವುದಕ್ಕಾಗಿ, ‘ಕಲಾಂತರಂಗ’ ಎಂಬ ಮೌಲಿಕ ವಾರ್ಷಿಕ ಸಂಚಿಕೆ ಪ್ರಕಟಿಸುತ್ತಿದೆ. ಸ್ಥಾಪನೆಯಾದ ಈ ೫೦ ವರ್ಷಗಳಿಂದ ನೂರಾರು ಪ್ರಶಸ್ತಿಗಳನ್ನು ನೀಡಿರುವ ಕಲಾರಂಗ ಎಂದೂ ತನ್ನ ಪ್ರಶಸ್ತಿಗಾಗಿ ಹಾತೊರೆಯಲಿಲ್ಲ. ಆದರೂ ಉಡುಪಿ ಜಿಲ್ಲಾ ಸಾಹಿತ್ಯ ಸಮ್ಮೇಳನ ಪ್ರಶಸ್ತಿ, ಎನ್.ಎಸ್ ಕಿಲ್ಲೆ ಪ್ರಶಸ್ತಿ, ಕಾರ್ಕಳ ಬೆಳದಿಂಗಳ ಸಮ್ಮೇಳನ ಪ್ರಶಸ್ತಿ, ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಯಕ್ಷಧ್ರುವ ಕಲಾಗೌರವ, ಭಟ್ಕಳದ ಮಹಿಷಾಸುರ ಮರ್ದಿನಿ ಯಕ್ಷ ಕಲಾ ಪ್ರತಿಷ್ಠಾನದ ಪ್ರಶಸ್ತಿಗಳು ಅರಸಿಕೊಂಡು ಬಂದಿವೆ.ಲೇಖನ: ಭುವನ್‌ ಪ್ರಸಾದ್‌ ಹೆಗ್ಡೆ ಉಡುಪಿ