ಸಕಲೇಶಪುರದ ಹಾಡ್ಯ ಸಮೀಪ ಸೀಗೆ ಹೆಸರಿನ ಕಾಡಾನೆ ಸೆರೆ

ಯಶಸ್ವಿಯಾದ ಅರಣ್ಯ ಇಲಾಖೆ ಎರಡನೇ ದಿನದ ಕಾರ್ಯಾಚರಣೆ । ಸಾಕಾನೆಗಳ ಮೂಲಕ ಸೆರೆಯ ತಂತ್ರ

ಎರಡನೇ ದಿನದ ಕಾರ್ಯಚರಣೆಯಲ್ಲಿ ಸೀಗೆ ಹೆಸರಿನ ಕಾಡಾನೆಯನ್ನು ಅರಣ್ಯ ಇಲಾಖೆ ಯಶಸ್ವಿಯಾಗಿ ಸೆರೆ ಹಿಡಿದಿದೆ.

ಅಭಿಮನ್ಯು ನೇತೃತ್ವದ ಒಟ್ಟು ಏಳು ಆನೆಗಳು ೧೧.೩೦ಕ್ಕೆ ಅರಣ್ಯ ಪ್ರವೇಶಿಸಿದ್ದು ೧೨.೪೫ಕ್ಕೆ ಸೀಗೆ ಕಾಡಾನೆಗೆ ಆರವಳಿಕೆ ಚುಚ್ಚುಮದ್ದು ಹಾರಿಸಲಾಯಿತು. ಈ ವೇಳೆ ಅಲ್ಲಿಂದ ಕಿ.ಮೀ.ಗಳ ದೂರ ಓಡಿ ಅಸ್ಪಸ್ಥಗೊಂಡು ನೆಲಕ್ಕೆ ಉರುಳಿದ ಸೀಗೆ ಕಾಡಾನೆಗೆ ನೀರು ಹಾಕಿ ಉಪಚರಿಸಿದ ನಂತರ ಕಬ್ಬಿಣದ ಸರಪಳಿ ಹಾಗೂ ಹಗ್ಗದಿಂದ ಬಂಧಿಸಲಾಯಿತು. ಬಳಿಕ ಕೊಡ್ಲಿಪೇಟೆ-ಸಕಲೇಶಪುರ ಮುಖ್ಯ ರಸ್ತೆಗೆ ತಂದು ಸಂಜೆ ನಾಲ್ಕು ಗಂಟೆಯ ವೇಳೆಗೆ ಕ್ರೇನ್ ಮೂಲಕ ಲಾರಿಗೆ ಹತ್ತಿಸಿ ದುಬಾರೆ ಅರಣ್ಯಕ್ಕೆ ಕೊಂಡೊಯ್ಯಲಾಯಿತು. ಈ ಕಾರ್ಯಾಚರಣೆಯಲ್ಲಿ ಸಿಸಿಎಪ್ ರವಿಶಂಕರ್, ಉಪ ಅರಣ್ಯ ಸಂರಕ್ಷಣಾಧಿಕಾರಿ ಸ್ವರೂಪ್, ಎಸಿಎಫ್ ಮಹದೇವ್, ವಲಯ ಅರಣ್ಯಾಧಿಕಾರಿ ಶಿಲ್ವಾ ನೇತೃತ್ವದಲ್ಲಿ ನೂರಕ್ಕೂ ಅಧಿಕ ಸಿಬ್ಬಂದಿ ಪಾಲ್ಗೊಂಡಿದ್ದರು.

ಕಾಡಾನೆ ಕಾರ್ಯಾಚರಣೆ ಸಮೀಪ ಸಾರ್ವಜನಿಕರ ಪ್ರವೇಶಕ್ಕೆ ಅರಣ್ಯ ಇಲಾಖೆ ನಿರ್ಬಂಧ ಹೇರಿತ್ತು, ಆದರೆ ಅಧಿಕಾರಿಗಳ ಕಣ್ತಪ್ಪಿಸಿ ಕಾರ್ಯಾಚರಣೆ ಚಿತ್ರಿಕರಣದಲ್ಲಿ ತೊಡಗಿದ್ದ ಹುರುಡಿ ವಿಕ್ರಂ ಸೇರಿದಂತೆ ಮತ್ತೊಬ್ಬರ ಕ್ಯಾಮರಾಗಳನ್ನು ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.

ಸಕಲೇಶಪುರ ತಾಲೂಕಿನ ನಿಡಿಗೆರೆ ಗ್ರಾಮದ ಹೊರವಲಯದಲ್ಲಿ ಸೀಗೆ ಹೆಸರಿನ ಕಾಡಾನೆಯನ್ನು ಅರಣ್ಯ ಇಲಾಖೆ ಯಶಸ್ವಿಯಾಗಿ ಸೆರೆಹಿಡಿಯಿತು.