ಗುರುಗಳ ಆದರ್ಶ ಪಾಲನೆ ಅನನ್ಯ ಗುರುಕಾಣಿಕೆ

ಕಂಪ್ಲಿ: ಗುರುಗಳು ಬೋಧಿಸಿದ ಉತ್ತಮ ಆದರ್ಶ, ಮೌಲ್ಯ ಮತ್ತು ಸಂಸ್ಕಾರ ಜೀವನದುದ್ದಕ್ಕೂ ಪಾಲಿಸುವುದೇ ಅವರಿಗೆ ಸಲ್ಲಿಸುವ ಅನನ್ಯ ಗುರುಕಾಣಿಕೆಯಾಗಿದೆ ಎಂದು ಶಾಲಾ ಸಂಸ್ಥಾಪಕ ಹಾಗೂ ನಿವೃತ್ತ ಶಿಕ್ಷಕ ಎಂ.ಎಸ್. ಗಂಗಾಧರಯ್ಯ ಹೇಳಿದರು.

ವಿದ್ಯಾರ್ಥಿ ಜೀವನದಲ್ಲಿ ಶಿಕ್ಷಕರು ಬೋಧಿಸುವ ಪಾಠಗಳು ಕೇವಲ ಪಠ್ಯ ವಿಷಯಗಳಿಗೆ ಸೀಮಿತವಾಗಿರದೇ ಜೀವನದ ಮೌಲ್ಯ ರೂಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಅಂದು ಕಲಿತ ಉತ್ತಮ ಗುಣ, ಶಿಸ್ತು, ಸಂಸ್ಕಾರ ಹಾಗೂ ಮಾನವೀಯ ಮೌಲ್ಯ ಮುಂದಿನ ಪೀಳಿಗೆಗೆ ತಿಳಿಸುವ ಮೂಲಕ ಸಮಾಜದಲ್ಲಿ ಉತ್ತಮ ಸಂಸ್ಕೃತಿ ಬೆಳೆಸಬೇಕು. ಹಳೆ ವಿದ್ಯಾರ್ಥಿಗಳು ಹಲವು ವರ್ಷಗಳ ನಂತರವೂ ಶಿಕ್ಷಕರನ್ನು ಸ್ಮರಿಸಿ ಗೌರವಿಸುತ್ತಿರುವುದು ಸಂತಸದ ಸಂಗತಿ ಎಂದರು.

ಬಳಿಕ ಹಳೆ ವಿದ್ಯಾರ್ಥಿಗಳು ತಮ್ಮ ವಿದ್ಯಾರ್ಥಿ ಜೀವನದ ನೆನಪು ಮೆಲುಕು ಹಾಕಿದರು. ಶಾಲಾ ದಿನಗಳಲ್ಲಿ ನಡೆದ ಘಟನೆ, ಶಿಕ್ಷಕರ ಮಾರ್ಗದರ್ಶನ ಹಾಗೂ ಸ್ನೇಹಿತರೊಂದಿಗಿನ ಒಡನಾಟ ಪರಸ್ಪರ ಹಂಚಿಕೊಂಡು ಸಂಭ್ರಮಿಸಿದರು. ಹಲವು ವರ್ಷಗಳ ಬಳಿಕ ಒಂದೆಡೆ ಸೇರಿದ್ದ ಹಳೆ ವಿದ್ಯಾರ್ಥಿಗಳಲ್ಲಿ ಹಳೆಯ ಸ್ನೇಹ ಮತ್ತೆ ಗಟ್ಟಿಗೊಂಡು ಕಾರ್ಯಕ್ರಮ ಭಾವನಾತ್ಮಕ ಕ್ಷಣಗಳಿಗೆ ಸಾಕ್ಷಿಯಾಯಿತು.

ಸ್ನೇಹ ಸಮ್ಮೇಳನದ ಅಧ್ಯಕ್ಷ ರವಿ, ಪದಾಧಿಕಾರಿ ನಾಗಾರ್ಜುನ, ವಿಷ್ಣು, ಭಾಸ್ಕರ, ಎಜಾಜ್, ಫಕ್ರುದ್ದೀನ್, ರಾಘವೇಂದ್ರ, ಎನ್.ಶ್ರೀನಿವಾಸ್, ವೆಂಕಟೇಶ್, ದಾವೂದ್, ಶ್ರೀನಿವಾಸ್, ರಮೇಶ್, ಗಾಜಿ ಅಹಮದ್, ಸಾವಿತ್ರಿ, ದೇವಿಕಬಾಯಿ, ವಿಜಯಲಕ್ಷ್ಮೀ, ನಾಗಮಣಿ, ಡಿ.ರೇಖಾ, ವೀಣಾ, ಮಂಜುಶ್ರೀ, ಪಾರ್ವತಿ, ರಾಧಾ, ಕುಲುಸ್ಮ, ಸಲ್ಮಾ, ಶಶಿರೇಖಾ ಸೇರಿದಂತೆ ಹಳೆ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.