ಹಂಪಿ ಉತ್ಸವ: ದೇಶಿ ತಳಿಗಳ ರಕ್ಷಣೆ ಅರಿವು ಮೂಡಿಸಿದ ವಸ್ತು ಪ್ರದರ್ಶನ

ಬಿ. ರಾಮಪ್ರಸಾದ್‌ ಗಾಂಧಿ

ಕೃಷಿ ಇಲಾಖೆಯವರು ಹಂಪಿ ಉತ್ಸವದ ಅಂಗವಾಗಿ ಶುಕ್ರವಾರ ಆಯೋಜಿಸಿದ್ದ ಕೃಷಿ ವಸ್ತು ಪ್ರದರ್ಶನದಲ್ಲಿ ಕಳೆದು ಹೋಗಿರುವ ದೇಶಿ ತಳಿಗಳ ಉಳಿಸಿಕೊಂಡು ಬಂದಿರುವ ರೈತರಿಗೆ ಈ ಪ್ರದರ್ಶನ ಉತ್ತೇಜನ ನೀಡುವಂತಿತ್ತು. ಸಕ್ಕರೆ ಅಂಶ ಜಾಸ್ತಿ ಇಲ್ಲದ ಗೋದಿ, ವಿಶಿಷ್ಟವಾದ ಔಷಧ ಗುಣ ಹೊಂದಿರುವ ಹಾಲು ನವಣಿ, ಸಾಮೆ, ಬರಗು, ಸಜ್ಜೆ, ಜೋಳಗಳ ಬೀಜಗಳು ಗಮನ ಸೆಳೆದವು.

ಈ ಕುರಿತು ಮಾತನಾಡಿದ ಜಂಟಿ ಕೃಷಿ ನಿರ್ದೇಶಕ ಶರಣಪ್ಪ ಮುದಗಲ್‌ ಅವರು ದೇಶಿ ತಳಿಗಳ ಉಳಿಸಿ ಬೆಳೆಸುವ ರೈತರಿಗೆ ಸರ್ಕಾರ ರಾಯಲ್ಟಿ ಕೊಟ್ಟು ಉತ್ತೇಜನ ನೀಡುವ ಚಿಂತನೆಯಲ್ಲಿದೆ ಎಂದರು. ಇತರ ಇಲಾಖೆಯ ಯೋಜನೆಗಳನ್ನು ಪ್ರದರ್ಶನ ಮಾಡಿದ್ದೇವೆ ಎಂದು ಹೇಳಿದರು.

ಫಲಪುಷ್ಪ ಪ್ರದರ್ಶನ: ಫಲಪುಷ್ಪ ಪ್ರದರ್ಶನದಲ್ಲಿ ಸಿರಿಧಾನ್ಯದಲ್ಲಿ ಮೂಡಿದ ಹಂಪಿ ಉತ್ಸವದ ಲಾಂಛನ ಮನಮೋಹಕವಾಗಿತ್ತು. ಹಕ್ಕ-ಬುಕ್ಕರ ಸ್ತಬ್ಧಚಿತ್ರ, ಸಿರಿಧಾನ್ಯದಲ್ಲಿ ಹಂಪಿ ವಿರೂಪಾಕ್ಷೇಶ್ವರ ದೇವಸ್ಥಾನ, ವಿವಿಧ ಜಾತಿ ಹೂವುಗಳಿಂದ ಎದುರು ಬಸವಣ್ಣ ದೇವಸ್ಥಾನ, ಸಂವಿಧಾನ ಮಹತ್ವ ತಿಳಿಸಲು ಸಂವಿಧಾನ ಪುಸ್ತಕ ಸ್ತಬ್ಧಚಿತ್ರ ನೋಡುಗರ ಗಮನ ಸೆಳೆದವು. ಸ್ವಯಂ ಹವಮಾನ ಮುನ್ಸೂಚನಾ ಘಟಕ ಈ ಬಾರಿಯ ವಿಶೇಷವಾಗಿತ್ತು. ಸಹಾಯಕ ಕೃಷಿ ನಿರ್ದೇಶಕ ಉಮೇಶ ಪ್ರವಾಸಿಗರಿಗೆ ವಿವರ ನೀಡುತ್ತಿದ್ದರು.