ಪೌರಸಂಸ್ಥೆಗೆ ಮೀಸಲಾತಿ ಘೋಷಣೆ: ಗರಿಗೆದರಿದ ರಾಜಕೀಯ ಚಟುವಟಿಕೆ

ಚುನಾವಣೆಗೆ ಸ್ಪರ್ಧಿಸಲು ಯುವಮನಸ್ಸುಗಳಲ್ಲಿ ಮೂಡುತ್ತಿರುವ ಆಸಕ್ತಿ

ಪುರಸಭೆಯ ಆಡಳಿತ ಮಂಡಳಿಯ ಆಡಳಿತಾವಧಿಯು ಮುಗಿದ ಹಿನ್ನೆಲೆ ಪ್ರಕಟಗೊಂಡ ವಾರ್ಡ್‌ ಮೀಸಲಾತಿ ಬೆನ್ನಲ್ಲೇ ಹಳಿಯಾಳದಲ್ಲಿ ರಾಜಕೀಯ ಚಟುವಟಿಕೆ ಗರಿಗೆದರಿದೆ. ಈ ಬಾರಿ ಪುರಸಭಾ ಚುನಾವಣೆಗೆ ಸ್ಪರ್ಧಿಸಲು ಯುವಮನಸ್ಸುಗಳಲ್ಲಿ ಆಸಕ್ತಿ ಮೂಡಿರುವ ಆಶಾದಾಯಕ ಬೆಳವಣಿಗೆ ಕಂಡು ಬಂದಿದೆ. ಹಳಿಯಾಳ ಪಟ್ಟಣದ ಅಭಿವೃದ್ಧಿಯ ದಿಸೆಯಲ್ಲಿ ಇದೊಂದು ಸಕಾರಾತ್ಮಕ ಪ್ರಗತಿಪರ ಬೆಳವಣಿಗೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ರಾಜಕೀಯಕ್ಕೂ ಹಳಿಯಾಳಕ್ಕೂ ಬಿಡಿಸಲಾರದೂ ನಂಟು! ಇಲ್ಲಿ ರಾಜಕೀಯವು ಚುನಾವಣೆಗಷ್ಟೇ ಸೀಮಿತವಾಗದು. ಚುನಾವಣೆಗೆ ಆರಂಭಗೊಂಡ ರಾಜಕೀಯ ಮುಂದಿನ ಚುನಾವಣೆ ವರೆಗೂ ಮುಂದುವರಿಯುತ್ತದೆ. ಚುನಾವಣೆಯಲ್ಲಿ ಗೆಲುವು ದಕ್ಕಿಸಲು, ಎದುರಾಳಿಯನ್ನು ಹಣಿಯಲು ದ್ವೇಷದ ರಾಜಕಾರಣ ನಡೆದರೆ ಇತ್ತೀಚಿನ ವರ್ಷಗಳಲ್ಲಿ ಮಾಟ-ಮಂತ್ರದ ಹೊಸ ರಾಜಕಾರಣವು ಹೊಸದಾಗಿ ಪ್ರವೇಶಿಸಿದೆ ಎಂದು ಹೇಳಲಾಗುತ್ತಿದೆ.ಅಭಿವೃದ್ಧಿಗೆ ಯುವ ಮನಸ್ಸುಗಳಿರಲಿ:

ಹಳಿಯಾಳ ಪಟ್ಟಣದಲ್ಲಿ ಬೆಳೆದ ಭ್ರಷ್ಟಾಚಾರ, ಕಳಪೆ ಕಾಮಗಾರಿಗಳು, ಇಲ್ಲಿನ ರಾಜಕಾರಣವು ಅಪರಾಧ ಪ್ರವೃತ್ತಿಯುಳ್ಳವರಿಗೆ ನೀಡುವ ಆದ್ಯತೆಯನ್ನು ಕಂಡಿರುವ ಇಲ್ಲಿನ ಯುವಮನಸ್ಸುಗಳು ಈ ಅನಿಷ್ಟಗಳಿಗೆ ವಿರಾಮ ಹಾಕಲು ಈಗ ಸದ್ದಿಲ್ಲದೇ ಕಾರ್ಯ ಆರಂಭಿಸಿವೆ. ಹಳಿಯಾಳ ಪಟ್ಟಣದ ರಾಜಕಾರಣ ಗಮನಿಸಿದಾಗ ಇಲ್ಲಿ ವಿದ್ಯಾವಂತ ಸುಶಿಕ್ಷಿತ ಯುವಮನಸ್ಸುಗಳ ಸಹಭಾಗಿತ್ವದ ಕೊರತೆಯೂ ಎದ್ದು ಕಾಣುತ್ತದೆ. ಹಳಿಯಾಳದ ರಾಜಕಾರಣಕ್ಕೆ ಶಿಕ್ಷಣಕ್ಕೆ ಹೆಚ್ಚಿನ ಮಹತ್ವವಿಲ್ಲ ಎಂಬ ಕುಹಕದ ಮಾತುಗಳಿಗೆ ಉತ್ತರವೆಂಬಂತೆ ಈಗ ಹಳಿಯಾಳ ಪಟ್ಟಣದ ರಾಜಕಾರಣದಲ್ಲಿ ನಿಧಾನವಾಗಿ ಬದಲಾವಣೆಯ ಗಾಳಿ ಬೀಸಲಾರಂಭಿಸಿದೆ. ನಯನ ಹೆಗಡೆ:

ರಾಜಕೀಯದಲ್ಲಿ ನೈತಿಕತೆ, ಪಾರದರ್ಶಕತೆ ಮತ್ತು ಹೊಸ ಚಿಂತನೆ ತರಲು ಸುಶಿಕ್ಷಿತ ಯುವಕರ ಪಾತ್ರ ಬಹುಮುಖ್ಯವಾಗಿದೆ. ಹಳಿಯಾಳ ಅಭಿವೃದ್ಧಿಯ ದಿಸೆಯಲ್ಲಿ ಸುಶಿಕ್ಷಿತ ಯುವಸಮೂಹವು ಮುಂದಾಗಿರುವುದು ಸ್ವಾಗತಾರ್ಹ. ಹಳಿಯಾಳ ಅಭಿವೃದ್ಧಿ ದೃಷ್ಟಿಯಿಂದ ಈ ಸುಶಿಕ್ಷಿತ ಮುಖಗಳಿಗೆ ನಮ್ಮ ಬೆಂಬಲವಿದೆ ಎಂದು ಕ್ರೀಡಾ ತರಬೇತುದಾರ ಉದಯ ಜಾಧವ ತಿಳಿಸಿದ್ದಾರೆ.