ಸಂಪುಟದಲ್ಲಿ ಜಿಲ್ಲೆಗೆ ಪ್ರಾತಿನಿಧ್ಯಕ್ಕೆ ಮನವಿ: ರಾಜೇಗೌಡ

- ಜಿಪಂ ಅಧ್ಯಕ್ಷನಾಗಿ ಸಚಿವ ದರ್ಜೆಯಲ್ಲಿ ಕೆಲಸ ಮಾಡಿದ ಅನುಭವ

ಸಂಪುಟ ವಿಸ್ತರಣೆಯಾದರೆ ಜಿಲ್ಲೆಗೆ ಒಂದು ಪ್ರಾತಿನಿಧ್ಯ ನೀಡಿ ಎಂದು ಮುಖಂಡರ ಬಳಿ ಕೇಳಿದ್ದೇನೆ. ನನಗೆ ಅವಕಾಶ ಮಾಡಿಕೊಟ್ಟರೆ ನಾನೂ ಕೆಲಸ ಮಾಡುತ್ತೇನೆ ಎಂದು ಶೃಂಗೇರಿ ಶಾಸಕ ಟಿ.ಡಿ.ರಾಜೇಗೌಡ ಹೇಳಿದರು.

ಇಂಧನ ಸಚಿವ ಕೆ.ಜೆ.ಜಾರ್ಜ್ ಉಸ್ತುವಾರಿ ಸಚಿವರಾಗಿ ಉತ್ತಮವಾಗಿ ಕೆಲಸ ಮಾಡುತ್ತಿದ್ದಾರೆ. ಇಂಧನ ಇಲಾಖೆಯಡಿ ಜಿಲ್ಲೆಗೆ ಕೇಳಿದ ಅನುದಾನವೆಲ್ಲ ನೀಡಿದ್ದಾರೆ. ಅರಣ್ಯ, ಕಂದಾಯ ಭೂಮಿ ಸಮಸ್ಯೆ ಪರಿಹಾರಕ್ಕೆ ನಮ್ಮ ಜೊತೆ ಕೈ ಜೋಡಿಸಿದ್ದಾರೆ ಎಂದರು.

ನವೀಕರಿಸಬಹುದಾದ ಇಂಧನ ನಿಗಮದಲ್ಲಿ ಯುಜಿಎಫ್ ಅನುದಾನವನ್ನು ಸೋಲಾರ್ ಪ್ಲಾಂಟ್ ಹಾಕಲು ನೀಡುತ್ತಾರೆ. ಇದನ್ನು ಕೇಳಲು ತೆರಳಿದ್ದೆ. ನವೀಕರಿಸಬಹುದಾದ ಇಂಧನ ಸಚಿವ ಪ್ರಹ್ಲಾದ್ ಜೋಶಿ ಇದನ್ನು ಪ್ರಸ್ತಾವಿಸಿ, ಇಂಧನ ಸಚಿವರ ಬಳಿ ಇದು ಹೋಗಿ ಅವರಿಂದ ಅನುಮೋದನೆಗೊಂಡು ಸಬ್ಸಿಡಿ ಬರಬೇಕು. ಈ ವಿಚಾರ ಮಾತನಾಡಲು ನಾನು ತೆರಳಿದ್ದೆ ಎಂದು ಹೇಳಿದರು.

ರಾಜ್ಯದಲ್ಲಿ ಎಲ್ಲೂ ಆನೆಗಳನ್ನು ಹಿಡಿದಿಲ್ಲ. ನಮ್ಮ ಕ್ಷೇತ್ರದಲ್ಲಿ ಹಾನಿ ಮಾಡಿದ ಐದು ಆನೆಗಳನ್ನು ಹಿಡಿಸಲಾಗಿದೆ. ನಮ್ಮ ಕ್ಷೇತ್ರದ ಕಾರ್ಯವೈಖರಿ ನೋಡಿ ಕೆಲವು ಕಡೆಗಳಲ್ಲಿ ಮನುಷ್ಯರಿಗೆ ಹಾನಿ ಮಾಡಿದ ಹುಲಿಗಳನ್ನು ಹಿಡಿಯಲಾಗಿದೆ. ಇನ್ನೂ ನಾಲ್ಕೈದು ಆನೆಗಳು ಕ್ಷೇತ್ರದಲ್ಲಿ ಸ್ವಲ್ಪ ಉಪಟಳ ಮಾಡುತ್ತಿದ್ದು, ಹಂತ ಹಂತವಾಗಿ ಅವುಗಳನ್ನು ಹಿಡಿಯುವ ಕೆಲಸ ಮಾಡಲಾಗುವುದು.