ಬಸವಣ್ಣನವರು ಪರಿವರ್ತನೆಯ ಹರಿಕಾರರು: ಡಾ. ನಿಷ್ಠಿ ರುದ್ರಪ್ಪ

ಸಂಡೂರು: ಸಮಾಜದಲ್ಲಿ ಮನೆ ಮಾಡಿದ್ದ ಮೂಢನಂಬಿಕೆ, ಅಂಧ ಶ್ರದ್ಧೆಗಳನ್ನು ಹೋಗಲಾಡಿಸಲು ಹಾಗೂ ಸಮಾಜದಲ್ಲಿ ಸಮಾನತೆ ಕಲ್ಪಿಸಲು ಶ್ರಮಿಸಿದವರು ಬಸವಣ್ಣನವರು. 12ನೇ ಶತಮಾನದಲ್ಲಿ ಬಸವಣ್ಣ ಹುಟ್ಟಿ ಬರದಿದ್ದರೆ ವೈದಿಕತೆ, ಮೌಢ್ಯತೆ, ಅಂಧಕಾರ, ಬಡತನ ಇನ್ನೂ ಹೆಚ್ಚಾಗುತ್ತಿತ್ತು. ಬಸವಣ್ಣ ಪರಿವರ್ತನೆಯ ಹರಿಕಾರರು ಎಂದು ಕನ್ನಡ ಸಾಹಿತ್ಯ ಪರಿಷತ್ ಜಿಲ್ಲಾ ಘಟಕದ ಅಧ್ಯಕ್ಷ ಡಾ. ನಿಷ್ಠಿ ರುದ್ರಪ್ಪ ಅಭಿಪ್ರಾಯಪಟ್ಟರು.

ಕವಿ ಸಿದ್ದಯ್ಯ ಪುರಾಣಿಕರು ಬಸವಣ್ಣನವರನ್ನು ಭೂಮಿಯ ಬೆಳಕು ಎಂದು ಉಲ್ಲೇಖಿಸಿದ್ದಾರೆ. ರಾಷ್ಟ್ರಕವಿ ಕುವೆಂಪು ಅವರು ಬಸವಣ್ಣನವರನ್ನು ಕಾರ್ತಿಕದ ಕತ್ತಲಲ್ಲಿ ಆಕಾಶ ದೀಪವಾಗಿ ನೀ ಬಂದೆ ಎಂದು ವರ್ಣಿಸಿದ್ದಾರೆ ಎಂದರು.

ತುಮಕೂರಿನ ಆಯುರ್ವೇದ ವೈದ್ಯ ಡಾ. ಬಿ. ನಂಜುಂಡಸ್ವಾಮಿ ವಚನ ಶಾಸ್ತ್ರಸಾರ ಆವೃತ್ತಿಗಳು ಎಂಬ ವಿಷಯ ಕುರಿತು ಉಪನ್ಯಾಸ ನೀಡಿ, ಫ.ಗು ಹಳಕಟ್ಟಿಯವರು ರಚಿಸಿದ ವಚನ ಶಾಸ್ತ್ರಸಾರ ಸಮಗ್ರ ಸಾಹಿತ್ಯದಲ್ಲಿ ಸೃಷ್ಟಿಯ ರಚನೆ, ಸ್ವರೂಪ, ಇಷ್ಟಲಿಂಗ ಮುಂತಾದ ವಿಷಯಗಳ ಬಗ್ಗೆ ವಿವರಿಸಿದ್ದಾರೆ. ಹಸ್ತಪ್ರತಿಗಳ ಮೂಲಕ ವಚನಗಳನ್ನು ಸಂಗ್ರಹಿಸಿ, ಅವುಗಳ ಮೂಲಕ ರಚಿಸಿದ ವಚನ ಶಾಸ್ತ್ರಸಾರ ಕೃತಿಯನ್ನು ಪ್ರಕಟಿಸಲು ಅವರು ತುಂಬಾ ಶ್ರಮಿಸಿದರು. ಶರಣರ ವಚನಗಳು ನಮಗೆ ದಾರಿದೀಪ ಎಂದರು. ಪ್ರಭುಸ್ವಾಮೀಜಿ ಸಾನ್ನಿಧ್ಯ ವಹಿಸಿದ್ದರು. ಅಕ್ಕನ ಬಳಗದವರು ಪ್ರಾರ್ಥಿಸಿದರು. ಎಂ. ಚರಂತಯ್ಯನವರು ಸ್ವಾಗತಿಸಿದರು. ಡಾ. ತಿಪ್ಪೇರುದ್ರ ಕೊಟಿಗಿ ನಿರೂಪಿಸಿದರು. ನಿರ್ಮಲಾ ವಂದಿಸಿದರು. ಹಲವು ಸಾಹಿತ್ಯಾಸಕ್ತರು ಹಾಗೂ ಶ್ರೀಮಠದ ಭಕ್ತರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.