ಕೈ ನಾಯಕರ ದಾದಾಗಿರಿ - ಪೊಲೀಸ್ ಗಿರಿಗೆ ಹೆದರಬೇಡಿ

ರಾಮನಗರ: ಮಾಜಿ ಪ್ರಧಾನಿ ದೇವೇಗೌಡ ಮತ್ತು ಕೇಂದ್ರ ಸಚಿವ ಕುಮಾರಸ್ವಾಮಿಯವರ ಮೈಯಲ್ಲಿ ಬಡವರು ಮತ್ತು ರೈತರ ರಕ್ತ ಹರಿಯುತ್ತಿದೆ. ಅವರಿಬ್ಬರು ಬದುಕಿರುವರೆಗೂ ಬಿಡದಿ ಟೌನ್‌ಶಿಪ್ ಯೋಜನೆಗೆ ರೈತರ ಭೂಮಿ ಕಸಿದುಕೊಳ್ಳಲು ಬಿಡುವುದಿಲ್ಲ ಎಂದು ಮಾಜಿ ಶಾಸಕ ಎ.ಮಂಜುನಾಥ್ ಹೇಳಿದರು.

ಬಿಡದಿ ಟೌನ್‌ಶಿಪ್ ಯೋಜನೆ ಕುಮಾರಸ್ವಾಮಿ ಕನಸಿನ ಕೂಸು ಅನ್ನುತ್ತಾರೆ. ಆದರೆ, ರೈತರು ಮನವಿ ಮಾಡಿದಾಗ ಅವರು ನಿಮ್ಮ ಬದುಕಿನ ಮೇಲೆ ಕಲ್ಲು ಹಾಕುವುದಿಲ್ಲವೆಂದು ಹೇಳಿ ಈ ಯೋಜನೆ ಕೈಬಿಟ್ಟಿದ್ದರು. ಆಗ ನೀವೆಲ್ಲರು ಸಂಭ್ರಮಾಚರಣೆ ಮಾಡಿದ್ರಿ. ಈಗ ಅದನ್ನು ನೀವೇಕೆ ಮುಂದುವರಿಸಿದ್ದೀರಿ. ನೀವು ಯೋಜನೆ ಬಗ್ಗೆ ಪ್ರಾಮಾಣಿಕವಾಗಿ ಕೆಲಸ ಮಾಡುತ್ತಿದ್ದೇವೆ. ರೈತರಿಗೆ ಮೋಸ ಮಾಡುತ್ತಿಲ್ಲವೆಂದು ಆತ್ಮಸ್ಥೈರ್ಯವಿದ್ದರೆ ಇಲ್ಲಿಗೆ ಬಂದು ಉತ್ತರ ಕೊಡಿ ನೋಡೋಣ ಎಂದು ಸವಾಲು ಹಾಕಿದರು.

ದೇವೇಗೌಡ ಮತ್ತು ಕುಮಾರಸ್ವಾಮಿ ನಿಮ್ಮಂತೆ ಅಧಿಕಾರಿಗಳ ಸಮೇತ ಸಿಂಡಿಕೇಟ್ ಮಾಡಿಕೊಂಡು ಜಮೀನು ಲೂಟಿ ಮಾಡಲು ಬಂದಿಲ್ಲ. ಇಲ್ಲಿ ಬೇನಾಮಿ ಹೆಸರಲ್ಲಿ ಸಾವಿರಾರು ಎಕರೆ ಜಮೀನು ಖರೀದಿಸಿದ್ದಾರೆ. ಅಂಚಿಪುರದಲ್ಲಿ ಜಮೀನೆ ಇಲ್ಲದ ಜಾಗದಲ್ಲಿ 18 ಎಕರೆ ಜಮೀನು ಪಹಣಿ ಕೂರಿಸಿದ್ದಾರೆ. ಈ ಯೋಜನೆಗೆ ಗುರುತಿಸಿರುವ 9600 ಎಕರೆ ಪೈಕಿ 2750 ಎಕರೆ ಇದ್ದ ಸರ್ಕಾರಿ ಜಮೀನು ಈಗ 750 ಎಕರೆಗೆ ಬಂದು ನಿಂತಿದೆ. ಉಳಿದ ಸರ್ಕಾರಿ ಜಮೀನು ಏನಾಯಿತು ಎಂದು ಪ್ರಶ್ನಿಸಿದರು.

ಜಿಲ್ಲೆಯನ್ನು ಕುಮಾರಸ್ವಾಮಿ ಅಸ್ತಿತ್ವಕ್ಕೆ ತಂದರು. ಅದಕ್ಕೂ ಮೊದಲು ಆಡಳಿತ ನಡೆಸುತ್ತಿದ್ದ ನಿಮ್ಮಗಳ ಕೊಡುಗೆ ಏನಿದೆ?ಇಲ್ಲಿರುವ ಪ್ರತಿಯೊಂದು ಸರ್ಕಾರಿ ಕಚೇರಿಗಳ ಕಿಟಕಿಗಳು ಕುಮಾರಸ್ವಾಮಿ ಹೆಸರು ಹೇಳುತ್ತವೆ. ನೀರಾವರಿ ಯೋಜನೆಗಳೂ ಕುಮಾರಸ್ವಾಮಿ ಕೊಡುಗೆ. ಈ ಬಗ್ಗೆ ಬಹಿರಂಗ ಚರ್ಚೆಗೆ ಸಿದ್ಧನಿದ್ದೇನೆ. ಧೈರ್ಯವಿದ್ದರೆ ಬರಲಿ ಎಂದು ಎ.ಮಂಜುನಾಥ್ ಸವಾಲು ಹಾಕಿದರು.

ಬಿಡದಿ ಹೋಬಳಿಯ ಬೈರಮಂಗಲ ಗ್ರಾಮದ ಶ್ರೀ ಭಕ್ತಾಂಜನೇಯ ದೇವಾಲಯದ ಆವರಣದಲ್ಲಿ ಬಿಡದಿ ಟೌನ್ ಶಿಪ್ ಯೋಜನೆಗೆ ಭೂ ಸ್ವಾಧೀನ ವಿರೋಧಿಸಿ ರೈತರು ನಡೆಸುತ್ತಿರುವ ಅನಿರ್ದಿಷ್ಟಾವಧಿ ಧರಣಿಯಲ್ಲಿ ಮಾಜಿ ಶಾಸಕ ಎ.ಮಂಜುನಾಥ್ ಮಾತನಾಡಿದರು.