ಭಗವದ್ಗೀತೆ ಬದುಕಿನ ಭಾಗವಾಗಬೇಕು: ಆರತಿ ಪಟ್ರಮೆ

ಗೀತಾ ಜಯಂತಿ ಕಾರ್ಯಕ್ರಮ ಉದ್ಘಾಟನೆ

ಇಂದಿನ ದಿನಗಳಲ್ಲಿ ಮನುಷ್ಯನ ಮನಸ್ಸು ಸಾತ್ವಿಕತೆಯಿಂದ ದೂರವಾಗುತ್ತಿದೆ. ಸಮಾಜದಲ್ಲಿ ಹಿಂಸೆ, ಶೋಷಣೆ, ಜಾತಿ ವಿವಾದ, ಸಂಸ್ಕಾರ ರಹಿತ ಚಟುವಟಿಕೆಗಳು ಜಾಸ್ತಿಯಾಗುತ್ತಿವೆ ಎಂದು ಲೇಖಕಿ, ಯಕ್ಷಗಾನ ಕಲಾವಿದೆ ಆರತಿ ಪಟ್ರಮೆ ಅಭಿಪ್ರಾಯಪಟ್ಟರು.

ಇಂದು ವಿದ್ಯಾರ್ಥಿಗಳಲ್ಲಿ ಗುರು-ಹಿರಿಯರಿಗೆ ಗೌರವ ನೀಡುವುದಾಗಲಿ, ನಗುಮುಖವಾಗಲಿ ಕಣ್ಮರೆಯಾಗುತ್ತಿದೆ. ಬದುಕಿನಲ್ಲಿ ಅನೇಕ ಏರು-ಪೇರುಗಳನ್ನು, ಸಂಸಾರದಲ್ಲಿ ಮತ್ತು ಸಾಮಾಜಿಕ ರಂಗದಲ್ಲಿ ಕಾಣುತ್ತಿದ್ದೇವೆ. ಬದುಕಿನ ಜಂಜಾಟ, ಗೊಂದಲ, ನೆಮ್ಮದಿ ಇಲ್ಲದ ಬದುಕು ಇವೆಲ್ಲ ನಮ್ಮಿಂದ ದೂರವಾಗಬೇಕಾದರೆ, ಶ್ರೀ ಕೃಷ್ಣ ಯುದ್ಧರಂಗದಲ್ಲಿ ಅರ್ಜುನನಿಗೆ ಬೋಧಿಸಿದ ಗೀತೆಯ ಸಾರವನ್ನು ನಾವೂ ಜೀವನದಲ್ಲಿ ಅಳವಡಿಸಿಕೊಂಡರೆ ಬದುಕು ನೆಮ್ಮದಿಯಿಂದಿರುತ್ತದೆ ಎಂದರು.

ಕಾರ್ಯದರ್ಶಿ ನಾ. ವೆಂಕಟೇಶ ಜೋಯಿಸರು ತಮ್ಮ ಪ್ರಾಸ್ತಾವಿಕವಾಗಿ ಮಾತನಾಡಿ, ಇಂದು ಸಮಾಜದಲ್ಲಿ ಅವ್ಯಾಹತವಾಗಿ ನಡೆಯುತ್ತಿರುವ ಭ್ರೂಣಹತ್ಯೆ, ಕಳ್ಳತನ, ದರೋಡೆ, ಗಲಭೆ, ಪ್ರಾಕೃತಿಕ ನಾಶ ಸಂಸ್ಕಾರಹೀನ ಬದುಕು ಈ ತರಹದ ಅಸುರಿ ಗುಣಗಳು ನಾಶವಾಗಿ ಸ್ವಸ್ಥ ಸಮಾಜ ನಿರ್ಮಾಣವಾಗಬೇಕಾದರೆ ಗೀತೆ ಇದಕ್ಕೆ ಸಹಾಯಕವಾಗಬಲ್ಲದು. ಭಾರತೀಯ ಭಾಷೆಯನ್ನು ಹೊರತುಪಡಿಸಿ ವಿಶ್ವದ ೮೪ ಭಾಷೆಗಳಲ್ಲಿ ಭಗವದ್ಗೀತೆ ಮುದ್ರಿತವಾಗಿದೆ. ಇದು ಒಂದು ರಾಷ್ಟ್ರೀಯ ಗ್ರಂಥ. ಪಂಚಮವೇದ ಎಂದು ಕರೆಯುತ್ತಾರೆ. ಸುಮಾರು ೫ ಸಾವಿರ ವರ್ಷಗಳ ನಂತರವೂ ಭಗವದ್ಗೀತೆ ಹೆಚ್ಚು ಹೆಚ್ಚು ಪ್ರಚಾರಗೊಳ್ಳುತ್ತಿರುವುದರ ಕಾರಣ ಅದರಲ್ಲಿರುವ ತಾತ್ವಿಕ ಸತ್ವವೇ ಕಾರಣ. ಈ ಹಿನ್ನೆಲೆಯಲ್ಲಿ ಶ್ರೀ ಸೋಂದ ಸ್ವರ್ಣವಲ್ಲಿ ಶ್ರೀಗಳಾದ ಶ್ರೀಮದ್ ಶಂಕರಾಚಾರ್ಯ ಶ್ರೀ ಪರಮಪೂಜ್ಯ ಗಂಗಾಧರೇಂದ್ರ ಸರಸ್ವತಿ ಮಹಾಸ್ವಾಮಿ ಅವರ ಗೀತಾ ಪ್ರಚಾರ ಕಾರ್ಯ ಶ್ಲಾಘನೀಯವಾದದ್ದು ಎಂದರು.

ಸಭೆಯಲ್ಲಿ ಪ್ರಮುಖರಾದ ಎಚ್.ಎಸ್. ರಾಘವೇಂದ್ರ, ಶಶಿಧರ ಮೂರ್ತಿ, ಶ್ರೀಕಾಂತ್, ಗುರುಮೂರ್ತಿ ಅಡಿಗ, ಕ್ಯಾಪ್ಟನ್ ಸತ್ಯನಾರಾಯಣ, ಡಾ. ಸಿಬಂತಿ ಪದ್ಮನಾಭ, ಡಿ.ವಿ. ಪೂರ್ಣಿಮಾ ಮುಂತಾದವರು ಉಪಸ್ಥಿತರಿದ್ದರು. ಶ್ರೀಕಾಂತ್ ನಿರೂಪಿಸಿದರು.ಫೊಟೊನಗರದ ಶಿವಮೂಕಾಂಬಿಕಾ ಬಡಾವಣೆಯ ತುಮಕೂರು ಭಗವದ್ಗೀತಾ ಅಭಿಯಾನ ಸಮಿತಿಯ ಜಿಲ್ಲಾ ಕಾರ್ಯದರ್ಶಿ ನಾ. ವೆಂಕಟೇಶ ಜೋಯಿಸ್‌ ಅವರ ಗೃಹ ಸಭಾಂಗಣದಲ್ಲಿ ಗೀತಾ ಜಯಂತಿ ಕಾರ್ಯಕ್ರಮವನ್ನು ಆರತಿ ಪಟ್ರಮೆ ಉದ್ಘಾಟಿಸಿದರು.