ಭಟ್ಕಳ ಹವ್ಯಕ ವಲಯದ ಪ್ರಥಮ ವಲಯೋತ್ಸವ

ಭಟ್ಕಳ: ರಾಘವೇಶ್ವರ ಭಾರತೀ ಸ್ವಾಮೀಜಿಯವರು ಸ್ವರ್ಣ ಪಾದುಕಾ ಪೂಜೆಯ ಮೂಲಕ ಭಕ್ತರಿಗೆ ಶ್ರೀಮಠದ ಪರಂಪರೆಯನ್ನು ಆರಾಧಿಸುವ ಅವಕಾಶವನ್ನು ಮಾಡಿಕೊಟ್ಟಿದ್ದಾರೆ ಎಂದು ಶ್ರೀಮಠದ ಆಚಾರ- ವಿಚಾರ ಪ್ರಮುಖ ಗಜಾನನ ಭಟ್ಟ ತಿಳಿಸಿದರು.ಕಡವಿನಕಟ್ಟೆ ದುರ್ಗಾಪರಮೇಶ್ವರಿ ದೇವಿಯ ಸನ್ನಿಧಿಯಲ್ಲಿ ಭಟ್ಕಳ ಹವ್ಯಕ ವಲಯದ ಪ್ರಥಮ ವಲಯೋತ್ಸವ ಕಾರ್ಯಕ್ರಮದ ಸಭಾ ಕಾರ್ಯಕ್ರಮದಲ್ಲಿ ಧಾರ್ಮಿಕ ಉಪನ್ಯಾಸ ನೀಡಿದರು.ಯಾವುದೇ ಕಾರ್ಯವನ್ನು ಮಾಡುವಾಗಲೂ ಶ್ರದ್ಧೆ, ಭಕ್ತಿ ಮುಖ್ಯ. ನಮ್ಮ ನಡುವೆಯೂ ಅನೇಕರು ಕ್ಷುಲ್ಲಕವಾಗಿ ಮಾತನಾಡುವವರಿದ್ದಾರೆ. ಆದರೆ ನಮ್ಮ ಶ್ರದ್ಧೆ, ಭಕ್ತಿ ಅಚಲವಾಗಿದ್ದಲ್ಲಿ ಬೇಡಿದ್ದನ್ನು ಪಡೆಯುವಲ್ಲಿ ಸಫಲರಾಗಬಹುದು. ಶ್ರೀಮಠದ ಪರಂಪರೆಯಲ್ಲಿ ಅನೇಕ ದೃಷ್ಟಾಂತಗಳಿವೆ ಎಂದು ಉದಾಹರಿಸಿದರು. ಪ್ರತಿ ಶ್ರೀಮಠದ ಭಕ್ತರೂ ಅಚಲವಾದ ನಂಬಿಕೆ, ಭಕ್ತಿಯಿಂದ ನಡೆದುಕೊಂಡು ಬರುವಂತೆ ಕೋರಿದರು.

ಸಭಾ ಕಾರ್ಯಕ್ರಮಕ್ಕೂ ಪೂರ್ವದಲ್ಲಿ ದುರ್ಗಾಪರಮೇಶ್ವರಿ ಸನ್ನಿಧಿಯಲ್ಲಿ ಪ್ರಾರ್ಥನೆ ಸಲ್ಲಿಸಿದ ನಂತರ ಮಹಿಳೆಯರಿಂದ ಕುಂಕುಮಾರ್ಚನೆ ನಂತರ ರುದ್ರಪಠಣ ನಡೆಯಿತು.

ಯಲ್ಲಾಪುರ: ಭಗವದ್ಗೀತೆಯ ಒಂದೊಂದು ಶಬ್ದಗಳಿಗೂ ಅನೇಕ ಅರ್ಥಗಳಿದ್ದು, ಭಗವದ್ಗೀತೆಯನ್ನು ವೈಜ್ಞಾನಿಕವಾಗಿಯೂ ನೋಡಬಹುದು. ಭಗವದ್ಗೀತೆಯಲ್ಲಿ ವೇದ ಪುರಾಣಗಳ ತತ್ವವೇ ಅಡಗಿದೆ ಎಂದು ಕನೇನಳ್ಳಿ ಶ್ರೀ ಗೋಪಾಲಕೃಷ್ಣ ದೇವಸ್ಥಾನ ಆಡಳಿತ ಸಮಿತಿ ಅಧ್ಯಕ್ಷ ಜಿ.ಜಿ. ಹೆಗಡೆ ಕನೇನಳ್ಳಿ ತಿಳಿಸಿದರು.ತಾಲೂಕಿನ ಉಮ್ಮಚಗಿ ಗ್ರಾಪಂ ವ್ಯಾಪ್ತಿಯ ಕನೇನಳ್ಳಿ ಗೋಪಾಲಕೃಷ್ಣ ದೇವಸ್ಥಾನದಲ್ಲಿ ನಡೆದ ಭಗವದ್ಗೀತಾ ಅಭಿಯಾನದ ಸಮಾರೋಪದಲ್ಲಿ ಮಾತನಾಡಿ, ಈ ಭಗವದ್ಗೀತಾ ಅಭಿಯಾನಕ್ಕೆ ಸ್ವರ್ಣವಲ್ಲಿಯ ಶ್ರೀಗಳು ಹೆಚ್ಚು ಮಹತ್ವ ನೀಡಿರುವುದರಿಂದ ನಾವೆಲ್ಲರೂ ಪ್ರತಿ ವರ್ಷವೂ ಗೀತಾಭಿಯಾನವನ್ನು ನಡೆಸುತ್ತಿದ್ದೇವೆ. ಭಗವದ್ಗೀತೆಗೆ ಜಾತಿ, ಧರ್ಮಗಳ ಹಂಗಿಲ್ಲ. ಇಂತಹ ಭಗವದ್ಗೀತೆಯ ಸಾರವನ್ನು ಅರಿತು ಅಳವಡಿಸಿಕೊಳ್ಳೋಣ ಎಂದರು.