ನೇರ ಹಣಾಹಣಿಗೆ ಸಿದ್ಧವಾಗ್ತಿದೆ ಬೀದರ್ ಲೋಕಸಭಾ ಕ್ಷೇತ್ರ

ಬೀದರ್: ಈಗಾಗಲೇ ಬಿಜೆಪಿ ತನ್ನ ಅಭ್ಯರ್ಥಿಯನ್ನಾಗಿ ಕೇಂದ್ರ ಸಚಿವ ಹಾಲಿ ಸಂಸದ ಭಗವಂತ ಖೂಬಾ ಅವರಿಗೆ ಟಿಕೆಟ್‌ ನೀಡುತ್ತಿದ್ದಂತೆ ಕಾಂಗ್ರೆಸ್‌ನಲ್ಲಿ ಸಂಚಲನ ಮೂಡಿಸಿದ್ದು, ಕ್ಷೇತ್ರದಿಂದ ಕಾಂಗ್ರೆಸ್‌ ಸದ್ಯಕ್ಕಂತೂ ಮಾಜಿ ಸಚಿವ ರಾಜಶೇಖರ ಪಾಟೀಲ್‌ ಅಥವಾ ಹಾಲಿ ಸಚಿವ ಈಶ್ವರ ಖಂಡ್ರೆ ಅವರ ಪುತ್ರ ಸಾಗರ ಖಂಡ್ರೆ ಟಿಕೆಟ್‌ ಗಿಟ್ಟಿಸಿಕೊಳ್ಳುವ ಫೇವರೇಟ್‌ ಆಗಿದ್ದು, ಬೀದರ್‌ ಲೋಕಸಭಾ ಕ್ಷೇತ್ರ ಎಂದಿನಂತೆ ನೇರ ಸ್ಪರ್ಧೆಗೆ ತಯಾರಾಗುವತ್ತ ಸಾಗಿದೆ.

ಕಮಲ, ಕೈ ಪಾಳಯದಲ್ಲಿ ಇರುಸುಮುರುಸು: ಬೀದರ್ ಲೋಕಸಭಾ ಕ್ಷೇತ್ರದಿಂದ ಹ್ಯಾಟ್ರಿಕ್ ಬಾರಿಸಲು ಭಗವಂತ ಖೂಬಾ ಕಣಕ್ಕೆ ಇಳಿದಿದ್ದಾರಾದರೂ ಕ್ಷೇತ್ರದಲ್ಲಿನ ಕಮಲ ಪಾಳಯದಲ್ಲಿನ ಭಾರಿ ವಿರೋಧ ಅವರನ್ನು ಇರುಸುಮುರಿಸಿಗೆ ನೂಕಿದರೂ ಅಚ್ಚರಿಯಿಲ್ಲ. ಹಾಗಂತ ಬಿಜೆಪಿಯಲ್ಲಿ ಖೂಬಾಗೆ ಭಾರಿ ವಿರೋಧದ ಸಮಸ್ಯೆ ಇದ್ದರೆ ಕಾಂಗ್ರೆಸ್‌ನಲ್ಲಿ ಎಲ್ಲವೂ ಚೆನ್ನಾಗಿದೆ ಎಂದೇನಿಲ್ಲ.

ಕಳೆದ ಕೆಲ ವರ್ಷಗಳಿಂದ ಈಶ್ವರ ಖಂಡ್ರೆ ಅವರ ಪುತ್ರ ಸಾಗರ ಖಂಡ್ರೆ ಲೋಕಸಭಾ ಚುನಾವಣಾ ತಯಾರಿ ನಡೆಸಿದ್ದು, ಲೋಕಸಭಾ ಕ್ಷೇತ್ರದ ಪ್ರತಿಯೊಂದು ಗ್ರಾಮಕ್ಕೆ ಹೆಸರು ಪ್ರಚಾರಕ್ಕೆ ಆದ್ಯತೆ, ಭೇಟಿಯಂತಹ ಕಾರ್ಯಕ್ರಮಗಳನ್ನು ಹಾಕಿಕೊಂಡು ಸಾಗಿರುವ ಇವರಿಗೆ ಕೊನೆ ಕ್ಷಣದಲ್ಲಿ ಟಿಕೆಟ್‌ ಕೈತಪ್ಪಿದ್ದೆಯಾದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವರಾಗಿ ಗೆಲುವಿನ ಶ್ರಮದ ಹೊಣೆ ಹೊರಬೇಕಾದ ಈಶ್ವರ ಖಂಡ್ರೆ ಅವರ ಮನವಿಯನ್ನು ಲೆಕ್ಕಿಸದೇ ಬೆಂಬಲಿಗರ ಮುನಿಸು ಸ್ವಪಕ್ಷ ಕಾಂಗ್ರೆಸ್‌ಗೆ ಪೆಟ್ಟು ನೀಡುವ ಸಾಧ್ಯತೆಗಳಂತೂ ಖಂಡಿತ ಇವೆ.

ಹೀಗಾಗಿ ಖೂಬಾಗೆ ಟಿಕೆಟ್‌ ಕಮಲ ಪಾಳಯದಲ್ಲಿ ಬಿರುಕು ಮೂಡಿಸಿದರೆ ಕಾಂಗ್ರೆಸ್‌ನಲ್ಲಿ ಟಿಕೆಟ್‌ ಹಂಚಿಕೆ ಪಾಟೀಲ್‌ ಹಾಗೂ ಖಂಡ್ರೆ ಬೆಂಬಲಿಗರ ಮಧ್ಯದಲ್ಲಿ ವಿರಸ ಮೂಡಿಸುವದರಲ್ಲಿ ಸಂದೇಹವಿಲ್ಲ.