ಅಧಿಕಾರಕ್ಕಾಗಿ ಇಬ್ಬರೂ ತಹಸೀಲ್ದಾರ್‌ರಲ್ಲಿ ಪೈಪೋಟಿ

ಕನ್ನಡಪ್ರಭ ವಾರ್ತೆ ಬಂಗಾರಪೇಟೆ

ಕಳೆದ ಸೋಮವಾರ ತಹಸೀಲ್ದಾರ್ ವೆಂಕಟೇಶಪ್ಪ ಕಚೇರಿಗೆ ಬಂದು ಅಧಿಕಾರ ಚಲಾಯಿಸಿ ಹೋಗಿದ್ದರು. ಮಂಗಳವಾರ ಸರ್ಕಾರಿ ರಜೆಯಿದ್ದು ಬುಧವಾರ ಕಚೇರಿಗೆ ಬಂದರಾದರೂ ಕಚೇರಿಯ ಎಲ್ಲಾ ಬಾಗಿಲುಗಳನ್ನು ತೆರೆಯಲಾಗಿತ್ತು. ಆದರೆ ತಹಸೀಲ್ದಾರ್ ಕೊಠಡಿಯ ಬಾಗಿಲನ್ನು ತೆಗೆಯದೆ ಬೀಗ ಹಾಕಿದ್ದರು. ಇದರಿಂದ ಕೆರಳಿದ ತಹಸೀಲ್ದಾರ್ ವೆಂಕಟೇಶಪ್ಪ ಡಿ ಗ್ರೂಪ್ ನೌಕರ ಗೌತಮ್‌ರನ್ನು ಕರೆಸಿ ಬೀಗ ತೆಗಿಸಲು ಸೂಚಿಸಿದರು. ಆದರೆ ಡಿ ಗ್ರೂಪ್ ನೌಕರ ಗೌತಮ್ ನಾಪತ್ತೆಯಾಗಿದ್ದ. ಬಳಿಕ ಪ್ಯಾಂಟ್ರಿ ಕೊಠಡಿಗೆ ತೆರಳಿ ತಮ್ಮ ಕೈಕೆಳಗೆ ಕೆಲಸ ಮಾಡುವ ನೌಕರರನ್ನು ಕರೆಸಿ ನಾನು ತಹಸೀಲ್ದಾರ್ ನನ್ನ ಸೂಚನೆಯಂತೆ ಎಲ್ಲರೂ ನಡೆದುಕೊಳ್ಳಬೇಕೆಂದು ಸೂಚನೆ ನೀಡಿದರು ಎನ್ನಲಾಗಿದೆ.

ಕಳೆದ ೧೧ರಂದು ಸರ್ಕಾರಿ ರಜೆ ದಿನ ಭೂ ಸುರಕ್ಷೆ ಯೋಜನೆ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ತಹಸೀಲ್ದಾರ್ ಸುಜಾತ, ಮತ್ತೆ ಮಂಗಳವಾರ ಸರ್ಕಾರಿ ರಜೆ ದಿನ ಹಾಜರಾಗಿ ಸಿದ್ಧರಾಮೇಶ್ವರ ಜಯಂತಿಯ ಅಧ್ಯಕ್ಷತೆ ವಹಿಸಿದ್ದರಿಂದ ಅಸಲಿ ತಹಸೀಲ್ದಾರ್ ಯಾರೆಂಬುದು ತಿಳಿಯದೆ ಅಧಿಕಾರಿಗಳು ಜೊತೆ ಸಾರ್ವಜನಿಕರೂ ಗೊಂದಲಕ್ಕೀಡಾದರು. ಸೋಮವಾರ ಬಂದಿದ್ದ ವೆಂಕಟೇಶಪ್ಪ ಬುಧವಾರ ಹಾಜರಾಗಿದ್ದರಾದರೂ ಕೊಠಡಿ ದೊರೆಯದೆ ಅಸಮಾಧಾನಗೊಂಡರು.