ಸಮುದಾಯಗಳ ಮಧ್ಯೆ ಸೇತುವೆ ಕಟ್ಟುತ್ತಿದ್ದೇನೆ

ಕನ್ನಡಪ್ರಭ ವಾರ್ತೆ ಹಾಸನ

ಒಂದು ಸಂದರ್ಭದಲ್ಲಿ ‘ಮುಸ್ಲಿಂ ಮಹಿಳೆಯರಿಗೂ ಕೂಡ ಮಸೀದಿಯಲ್ಲಿ ಪ್ರವೇಶವಿಲ್ಲ ಇದಕ್ಕೆ ಪ್ರತಿಭಟಿಸುತ್ತೀರಾ’ ಎಂದು ಕೆಲವರು ನನ್ನನ್ನು ಕೇಳಿದ್ದರು. ಅದಕ್ಕೆ ನಾನು ಮಹಿಳೆಯರು ಮಸೀದಿಗೆ ಬರಬಾರದು ಎಂದೇನಿಲ್ಲ. ದಕ್ಷಿಣ ಏಷ್ಯಾ ಮುಸ್ಲಿಂ ಪುರುಷರು ಇದನ್ನು ಸಂಪ್ರದಾಯ ಮಾಡಿಕೊಂಡಿದ್ದು, ಇದರ ವಿರುದ್ಧ ಪ್ರತಿಭಟನೆ ಮಾಡುವ ಅಗತ್ಯವಿಲ್ಲ ಎಂದು ಹೇಳಿದ್ದೆ. ಆದರೆ, ಕೆಲವರು ಇದನ್ನು ರಾಜಕೀಯ ಮಾಡಿ, ಫತ್ವಾ ಹೊರಡಿಸಲು ಕಾರಣವಾಯಿತು. ಆ ಸಂದರ್ಭದಲ್ಲಿ ಅದನ್ನು ಸಹಿಸಲು ಕಷ್ಟವಾಯಿತು. ನಂತರ ಅವರಿಗೆ ನೈಜತೆಯ ಅರಿವಾಯಿತು. ನಂತರ ಸಮಾಜದ ಮುಖಂಡರು ಬಂದು ಇದನ್ನು ಸೌಹಾರ್ದವಾಗಿ ಬಗೆಹರಿಸಲಾಯಿತು. ನಂತರವೂ ಮುಸ್ಲಿಮರು ಬಾನು ಮುಷ್ತಾಕ್ ಅವರನ್ನು ಒಪ್ಪುವುದಿಲ್ಲ ಎಂದು ಹಲವರು ಹೇಳುತ್ತಿದ್ದರು ಎಂದರು. ನನ್ನ ಅಜ್ಜ ಖಾಜಿಯಾಗಿದ್ದರು. ಅವರು ಉರ್ದು ಶಿಕ್ಷಕರಾಗಿದ್ದರು. ನನ್ನ ಪತಿ ಮುಷ್ತಾಕ್ ಅವರ ತಂದೆ ಮುತುವಲ್ಲಿ ಆಗಿದ್ದವರು. ಎರಡೂ ಕುಟುಂಬದಲ್ಲಿ ಧಾರ್ಮಿಕ ಹಿನ್ನೆಲೆ ಇದ್ದರೂ, ಆ ಮನೆಯ ಮಗಳು, ಸಾರ್ವಜನಿಕರ ಸಮಸ್ಯೆಗಳಿಗೆ ಎಗ್ಗಿಲ್ಲದೇ ಹೋಗುತ್ತಾಳೆ ಎಂದು ಸಮುದಾಯದ ಬಹುತೇಕರು ಆಕ್ಷೇಪ ವ್ಯಕ್ತಪಡಿಸಿದ್ದರು. ಸಾಮಾಜಿಕವಾಗಿ ಕೆಲಸ ಮಾಡುತ್ತಿದ್ದುದನ್ನು ನನ್ನ ಸಮುದಾಯದ ಜನ ಬಹಳ ಆತಂಕದಿಂದ ನೋಡಿದರು. ಆಗ ವಿವರಣೆ ಕೊಟ್ಟಿದ್ದರೆ, ಅದು ಅವರಿಗೆ ತಿಳಿಯುತ್ತಿರಲಿಲ್ಲ ಎಂದು ಹೇಳಿದರು. ಇದೇ ವೇಳೆ ಕಸಾಪ ಜಿಲ್ಲಾ ಘಟಕದ ಅಧ್ಯಕ್ಷ ಡಾ.ಎಚ್.ಎಲ್. ಮಲ್ಲೇಶ ಗೌಡ, ಡಿವೈಎಸ್ಪಿ ಶಾಲು, ನಿವೃತ್ತ ಐಎಎಸ್ ಅಧಿಕಾರಿ ಅಶ್ರಫುಲ್ ಹಸನ್, ರೆಡ್‌ಕ್ರಾಸ್ ಸಂಸ್ಥೆ ನಿರ್ದೇಶಕ ಎಸ್.ಎಸ್. ಪಾಷಾ ಮಾತನಾಡಿದರು. ಈ ಸಂದರ್ಭದಲ್ಲಿ ಸಮಾಜ ಸೇವಕ ಸೈಯದ್ ತಾಜ್, ಖುಬಾ ಮಸೀದಿ ಅಧ್ಯಕ್ಷ ಬಶೀರ್ ಅಹಮದ್, ಮುಸ್ಲಿಂ ಸಂಘಟನೆಗಳ ಮುಖಂಡರಾದ ಹಸೈನಾರ್, ಇಲಿಯಾಸ್ ಬೇಗ್, ಅಮ್ಜದ್ ಖಾನ್, ಶಬ್ಬೀರ್ ಅಹ್ಮದ್, ಅವೇಜ್ ಪಾಷಾ ಇತರರು ಉಪಸ್ಥಿತರಿದ್ದರು.