ರಾಷ್ಟ್ರದ ಬೆಳವಣಿಗೆಗೆ ಜಾತಿ ಪದ್ಧತಿಯಿಂದ ಅಡ್ಡಗಾಲು: ಅಂಜಿನಪ್ಪ

ಕನ್ನಡಪ್ರಭ ವಾರ್ತೆ ಚಿಕ್ಕಬಳ್ಳಾಪುರ

ನಗರದ ವಾಪಸಂದ್ರ ಬಡಾವಣೆಯ ಜಗದ್ಗುರು ಚನ್ನಮಲ್ಲಿಕಾರ್ಜುನ ನಿಡುಮಾಮಿಡಿ ವಿದ್ಯಾಸಂಸ್ಥೆಯಲ್ಲಿ ರಾಷ್ಟ್ರೀಯ ಅಹಿಂದ ಸಂಘಟನೆ ಮತ್ತು ಸಿದ್ದರಾಮಯ್ಯ ಕಾನೂನು ಕಾಲೇಜಿನ ವತಿಯಿಂದ 75 ನೇ ಸಂವಿಧಾನ ದಿನ ಆಚರಣೆ ಮತ್ತು 50ನೇ ಕರ್ನಾಟಕ ಸುವರ್ಣ ಸಂಭ್ರಮ ಕಾರ್ಯಕ್ರಮದಲ್ಲಿ ಮಾತನಾಡಿ, ಭಾರತ ರತ್ನ ಬಿ,ಆರ್. ಅಂಬೇಡ್ಕರ್ ನೇತೃತ್ವದಲ್ಲಿ ರಚಿಸಿದ ಭಾರತದ ಸಂವಿಧಾನ ಅಂಗೀಕಾರವಾಗಿದ್ದು 1949 ರ ನವೆಂಬರ್ 26 ರಂದೇ, ಆದರೂ ಅನುಷ್ಠಾನಕ್ಕೆ ಬಂದಿದ್ದು 1950 ರ ಜನವರಿ 26 ರಂದು. ಈ ದಿನವನ್ನು ಗಣರಾಜ್ಯೋತ್ಸವ ದಿನವಾಗಿ ಆಚರಣೆ ಮಾಡಲಾಗುತ್ತದೆ. ದೇಶದ ಜನರನ್ನು ಸಶಕ್ತಗೊಳಿಸಬೇಕು. ಸರ್ವರಿಗೂ ಸಮಾನತೆಯೊದಗಿಸಬೇಕು ಎಂದು ಮೂಲಭೂತ ಹಕ್ಕುಗಳು, ಕರ್ತವ್ಯಗಳನ್ನು ಸಂವಿಧಾನವು ನೀಡಿದೆ. ಭಾರತಕ್ಕೆ ಸಂವಿಧಾನವೇ ದೊಡ್ಡ ಬಲ. ನಮ್ಮ ಸಂವಿಧಾನವು ನಮ್ಮೆಲ್ಲರನ್ನು ರಕ್ಷಿಸುವ ಬಹುದೊಡ್ಡ ಕಾನೂನು. ನಮ್ಮ ದೇಶದಲ್ಲಿ ಹೊಸ ಶಕೆ ಆರಂಭವಾಗಿದ್ದು ಸಂವಿಧಾನ ಜಾರಿಗೆ ಬಂದಾಗಿನಿಂದಲೇ. ಸಂವಿಧಾನದ ಮಹತ್ವದ ಬಗ್ಗೆ ಎಲ್ಲರಿಗೂ ಅರಿವು ಮೂಡಿಸುವುದು, ಸಂವಿಧಾನ ಶಿಲ್ಪಿ ಡಾ. ಬಿ.ಆರ್. ಅಂಬೇಡ್ಕರ್ ಅವರಿಗೆ ಗೌರವ ಸಲ್ಲಿಸುವದರ ಜತೆಗೆ ಅವರ ಸಾಧನೆಯ ಬಗ್ಗೆ ತಿಳಿಸಿ ಕೊಡುವುದು ಈ ದಿನದ ವಿಶೇಷತೆ. ಭಾರತದ ಸಂವಿಧಾನಕ್ಕೆ ವಿಶ್ವದಲ್ಲೇ ದೊಡ್ಡ ಸಂವಿಧಾನ ಎಂಬ ಹಿರಿಮೆ ಇದೆ ಎಂದು ತಿಳಿಸಿದರು.

ಹಾಗೆಯೇ ಬಾರತದಲ್ಲಿ ಜಾತಿ ಪದ್ಧತಿಯು ತೊಲಗಿ ಜಾತ್ಯಾತೀತತೆ ನೆಲಸಲಿ ಎಂಬ ಆಶಯದಿಂದಲೇ ಜಾತ್ಯಾತೀತ ರಾಷ್ಟ್ರವೆಂದು ಘೋಷಿಸಿದ್ದರು. ಭಾರತವು ಜಾತಿ, ಧರ್ಮಗಳ ಸಮನ್ವಯ ರಾಷ್ಟ್ರವಾಗಿ ಹೊರ ಹೊಮ್ಮಿದೆಯೇ ? ಅಕ್ಷರಶ: ಜಾತ್ಯಾತೀತ ರಾಷ್ಟ್ರವಲ್ಲ ಎಂದು ಹೇಳಬಹುದು. ಶತ ಶತಮಾನಗಳಿಂದ ಭಾರತವನ್ನು ಬೆಂಬಿಡದೆ ಕಾಡುತ್ತಿದ್ದ ಅದೆಷ್ಟೋ ಮೌಢ್ಯಗಳು, ಆಚರಣೆ, ಅನಿಷ್ಟ ಪದ್ಧತಿಗಳು ಇತಿಹಾಸದೊಂದಿಗೆ ಅಂತ್ಯಗೊಂಡಿದ್ದರೂ, ಇಂದಿಗೂ ಜನ ಮಾನಸದಲ್ಲಿ ಅವುಗಳ ಛಾಪು ಮಾತ್ರ ಅಚ್ಚಳಿದಿಲ್ಲ, ಇದಕ್ಕೆ ಒಂದು ಪ್ರಚಲಿತ ಉದಾಹರಣೆಯೇ ಜಾತೀಯತೆ. ಜಾತಿ ಪದ್ಧತಿಯು ಒಂದು ಸಾಮಾನ್ಯ ಪಿಡುಗಾಗಿರದೆ ಈ ಸರ್ವತಂತ್ರ ಸ್ವತಂತ್ರ ರಾಷ್ಟ್ರದ ಸರ್ವತೋಮುಖ ಬೆಳವಣಿಗೆಗೆ ಅಡ್ಡಗಾಲು ಹಾಕುತ್ತಲೇ ಇದೆ. ಹಾಗೂ ಜಾತೀಯತೆಯು ರಾಜಕೀಯ ಕಾರಣಗಳಿಗಾಗಿಯೇ ಪ್ರಸಿದ್ಧಿಯಾಗಿದೆ. ಪ್ರಸ್ತುತ ರಾಜ್ಯ ರಾಜಕೀಯ ವಿದ್ಯಮಾನಗಳು ಇದಕ್ಕೆ ಪುಷ್ಟಿ ನೀಡುತ್ತಿವೆ. ನಾವು ಮಾತ್ರ ಇಂದೂ ಸಹಾ ಜಾತೀಯತೆಯನ್ನು ಬಿಟ್ಟಿಲ್ಲ ಎಂದು ವಿಷಾಧ ವ್ಯಕ್ತಪಡಿಸಿದರು.

ರಾಷ್ಟ್ರೀಯ ಅಹಿಂದ ಸಂಘಟನೆಯ ಕಾರ್ಯಾಧ್ಯಕ್ಷ ಕಳವಾರ ಶ್ರೀಧರ್, ಮಾಜಿ ಶಾಸಕ ಕೆ.ಪಿ.ಬಚ್ಚೇಗೌಡ, ಮಾಜಿ ಜಿಪಂ ಸದಸ್ಯ ಮುನೇಗೌಡ, ಜಚನಿ ವಿದ್ಯಾಸಂಸ್ಥೆಗಳ ಆಡಳಿತಾಧಿಕಾರಿ ಶಿವಜ್ಯೋತಿ, ಪ್ರಾಂಶುಪಾಲ ರವಿ. ಬಾಗೇಪಲ್ಲಿ ನ್ಯಾಷನಲ್ ಕಾಲೇಜಿನ ನಿವೃತ್ತ ಪ್ರಾಂಶುಪಾಲ ರಾಮಯ್ಯ,ಮಾಜಿ ಸಮಾಜ ಸೇವಕ ನಂದಿ ಎಂ.ಎಂ.ಬಾಷ ಮತ್ತಿತರರು ಇದ್ದರು.