ಕೂಡ್ಲಿಗಿ, ಕೊಟ್ಟೂರಿಗೆ ಕೇಂದ್ರ ಅಧ್ಯಯನ ತಂಡ ಭೇಟಿ ಇಲ್ಲ

ಜಿ. ಸೋಮಶೇಖರ ಕೊಟ್ಟೂರು

ಭಾರಿ ಪ್ರಮಾಣದ ಬೆಳೆ ಹಾನಿಯಿಂದ ಸಂಕಷ್ಟಕ್ಕೆ ಸಿಲುಕಿರುವ ಕೂಡ್ಲಿಗಿ, ಕೊಟ್ಟೂರ ತಾಲೂಕನ್ನು ಬರಪೀಡಿತ ಎಂದು ಮೊದಲ ಪಟ್ಟಿಯಲ್ಲಿ ಘೋಷಣೆ ಮಾಡಿರಲಿಲ್ಲ. ಕೂಡ್ಲಿಗಿ ಶಾಸಕ ಡಾ. ಎನ್.ಟಿ. ಶ್ರೀನಿವಾಸ ಮತ್ತು ಹಗರಿಬೊಮ್ಮನಹಳ್ಳಿ ಶಾಸಕ ಕೆ. ನೇಮರಾಜ್ ನಾಯ್ಕ ಬರ ಪಟ್ಟಿಯಲ್ಲಿ ಸೇರಿಸುವಂತೆ ನಿರಂತರವಾಗಿ ಸರ್ಕಾರದ ಮೇಲೆ ಒತ್ತಡ ತಂದಿದ್ದರಿಂದ ರಾಜ್ಯ ಸರ್ಕಾರ ಕೆಲವು ದಿನಗಳ ಹಿಂದೆ ಕೊಟ್ಟೂರು, ಕೂಡ್ಲಿಗಿ ತಾಲೂಕುಗಳನ್ನು ಬರಪಟ್ಟಿಗೆ ಸೇರಿಸಿ ಆದೇಶ ಹೊರಡಿಸಿದೆ.

ಆತಂಕ: ಕೇಂದ್ರ ಬರ ಅಧ್ಯಯನ ತಂಡ ತನ್ನ ಪ್ರವಾಸದಲ್ಲಿ ಕೈಗೊಂಡ ಅಧ್ಯಯನದ ವರದಿ ಸಲ್ಲಿಸಿದ ನಂತರ ರಾಜ್ಯ ಸರ್ಕಾರಕ್ಕೆ ಬರ ಪರಿಹಾರ ಮಂಜೂರಾಗುವ ಸಾಧ್ಯತೆಗಳಿವೆ. ಇದೀಗ ಪಟ್ಟಿಯಲ್ಲಿನ ತಾಲೂಕುಗಳಲ್ಲಿ ಅಧ್ಯಯನ ನಡೆಸದೇ ಇರುವುದು ಅಪಾರ ನಷ್ಟ ಅನುಭವಿಸಿರುವ ರೈತರಿಗೆ ಸಿಗಬೇಕಾದ ಬರ ಪರಿಹಾರ ಮತ್ತಷ್ಟು ತಡವಾಗುವ ಸಾಧ್ಯತೆಗಳು ದಟ್ಟವಾಗಿವೆ.

ಮುಂಗಾರು ಬೆಳೆ ಹಾಳಾಗಿದ್ದರಿಂದ ರೈತರು ಅವುಗಳನ್ನು ನಿರ್ಮೂಲನೆ ಮಾಡಿ ಹಿಂಗಾರು ಮಳೆಯಲ್ಲಿಯಾದರೂ ಬಿತ್ತನೆ ಮಾಡುವ ಆಶಯ ಹೊಂದಿದ್ದರು. ಈಗ ಆ ಆಶಾಭಾವನೆ ಸಹ ರೈತರಲ್ಲಿ ಕಮರಿದೆ. ಬಿತ್ತನೆಯಾಗಿದ್ದ 28,000 ಹೆಕ್ಟೇರ್‌ ಪ್ರದೇಶಗಳಲ್ಲಿ ತೇವಾಂಶದ ಕೊರತೆಯಿಂದ ಬೆಳೆಗಳು ಬಾಡಿ ಹೋಗಿವೆ. ಆಗಾಗ ಬೀಳುವ ಅಲ್ಪ ಮಳೆಗೆ ರೈತರು ಕೃಷಿ ಚಟುವಟಿಕೆ ಕೈಗೊಳ್ಳುವ ಪ್ರಯತ್ನ ಸಾಗಿಸಿದ್ದಾರೆ. ಅಲ್ಲದೇ ಮತ್ತೆ ಕೆಲವರು ಹೊಲಗಳಲ್ಲಿನ ಹಾಳಾದ ಬೆಳೆ ತಿನ್ನಲು ಕುರಿಗಳನ್ನು ಬಿಡ ತೊಡಗಿದ್ದಾರೆ.

ಕೊಟ್ಟೂರು-ಕೂಡ್ಲಿಗಿ ತಾಲೂಕು ಎರಡನೇ ಹಂತದ ಬರ ಘೋಷಣೆಯಾದ ಹಿನ್ನೆಲೆ ಕೇಂದ್ರ ಅಧ್ಯಯನ ತಂಡ ಸೋಮವಾರ ಕೈಗೊಳ್ಳುವ ಪ್ರವಾಸ ಪಟ್ಟಿಯಲ್ಲಿ ಸೇರಿಕೊಂಡಿಲ್ಲ. ಇದರ ಬದಲಾಗಿ ಕೂಡ್ಲಿಗಿಯಲ್ಲಿ ಕೇಂದ್ರ ತಂಡ ಅಧಿಕಾರಿಗಳೊಂದಿಗೆ ಸಭೆ ನಡೆಸುವುದು ನಿಗದಿಯಾಗಿದೆ ಎಂದು ಹೆಸರು ಹೇಳಲು ಇಚ್ಛಿಸದ ಕೃಷಿಯಾಧಿಕಾರಿ ತಿಳಿಸಿದ್ದಾರೆ.