ಹರಿಹರ ನಗರಸಭೆ ಪೌರಾಯುಕ್ತರ ವಿರುದ್ಧ ಅಧ್ಯಕ್ಷೆ ಗರಂ

- ಅಧ್ಯಕ್ಷೆ, 31 ಸದಸ್ಯರನ್ನೂ ನಿರ್ಲಕ್ಷ್ಯಸಿ ನಿರ್ಣಐ: ಸಭೆಯಲ್ಲಿ ಕವಿತಾ ಬೇಡರ್‌ ತರಾಟೆ- - -ಕನ್ನಡಪ್ರಭ ವಾರ್ತೆ ಹರಿಹರ ಅಧ್ಯಕ್ಷರಾಗಿ ತಿಂಗಳಾದರೂ ಪೌರಾಯುಕ್ತರು ಸೇರಿದಂತೆ ನಗರಸಭೆ ಅಧಿಕಾರಿಗಳು ತಮಗೆ ಕನಿಷ್ಠ ಗೌರವವನ್ನೇ ಕೊಡುತ್ತಿಲ್ಲ. ಯಾವುದೇ ನಿರ್ಣಯ ಕೈಗೊಳ್ಳುವಲ್ಲಿ ವಿಶ್ವಾಸಕ್ಕೆ ಪಡೆಯದೇ ನಿರ್ಲಕ್ಷಿಸುತ್ತಿದ್ದಾರೆ ಎಂದು ಅಧ್ಯಕ್ಷೆ ಕವಿತಾ ಮಾರುತಿ ಬೇಡರ್ ಕಿಡಿಕಾರಿದರು.

ಪೌರಾಯುಕ್ತರು ಮತ್ತು ಅಧಿಕಾರಿಗಳು ನಗರಸಭೆ 31 ಸದಸ್ಯರನ್ನೂ ಗಣನೆಗೆ ತೆಗೆದುಕೊಳ್ಳದೇ ಮನಬಂದಂತೆ ವರ್ತಿಸುತ್ತಿದ್ದಾರೆ. ಕಾನೂನಿನಲ್ಲಿ ಕೌನ್ಸಿಲ್‍ಗೆ ಇರುವ ಮಹತ್ವವನ್ನೇ ಮರೆತಿದ್ದಾರೆ. ಕೌನ್ಸಿಲ್ ಮತ್ತು ಅಧಿಕಾರಿ ವರ್ಗ ಒಟ್ಟಾಗಿ ಕೆಲಸ ಮಾಡಿದರೆ ಮಾತ್ರ ನಗರ ಅಭಿವೃದ್ಧಿ ಸಾಧ್ಯ. ಜನಹಿತ ಕಾಯಲು ಸಾಧ್ಯ. ಅಧಿಕಾರಿಗಳು ಇದೆ ವರ್ತನೆ ಮುಂದುವರಿಸಿದರೆ ಸಹಿಸುವುದಿಲ್ಲ ಎಂದು ಎಚ್ಚರಿಸಿದರು.

ಸಚಿವ ಎಸ್.ಎಸ್. ಮಲ್ಲಿಕಾರ್ಜುನ ಅವರನ್ನು ವಿಶ್ವಾಸಕ್ಕೆ ಪಡೆದು ರಾಜನಹಳ್ಳಿ ಬಳಿಯಿರುವ ದಾವಣಗೆರೆ ನೀರು ಸರಬರಾಜಿಗೆ ತುಂಗಭದ್ರಾ ನದಿಗೆ ಅಡ್ಡಲಾಗಿ ಕಟ್ಟಿರುವ ಬ್ಯಾರೇಜ್‌ನಿಂದಲೇ ನಮ್ಮ ನಗರಕ್ಕೂ ನೀರು ಒದಗಿಸುವಂತೆ ಸದಸ್ಯರೆಲ್ಲರೂ ಮನವಿ ಮಾಡಿಕೊಂಡಾಗ ಮಾತ್ರ ಸಮಸ್ಯೆ ನಿವಾರಣೆಯಾಗುತ್ತದೆ. ಜಲಸಿರಿ ಯೋಜನೆ ಪ್ರಗತಿ ಸಂದರ್ಭದಲ್ಲಿ ಹೊಸ ನೀರೆತ್ತುವ ಪಂಪುಗಳನ್ನು ಅಳವಡಿಸಬೇಕಿತ್ತು ಎಂದರು.

ಸದಸ್ಯ ಸೈಯದ್ ಅಲೀಂ ಮಾತನಾಡಿ, ನಗರದಲ್ಲಿನ ಸಣ್ಣಪುಟ್ಟ ಹೋಟೆಲ್, ಬೀಡಾ ಅಂಗಡಿ, ಕಟಿಂಗ್ ಶಾಪ್ ಲೈಸೆನ್ಸ್ ನವೀಕರಣಕ್ಕೆ ₹3 ಸಾವಿರದಿಂದ ₹5000 ತೆಗೆದುಕೊಳ್ಳುತ್ತಿದ್ದಾರೆ. ಇದು ಸಣ್ಣ ವ್ಯಾಪಾರಿಗಳಿಗೆ ಹೊರೆಯಾಗುತ್ತಿದೆ ಪ್ರತಿನಿತ್ಯ ಅವರು ಮಾಡುವ ವ್ಯಾಪಾರದಲ್ಲಿ 400-500 ಉಳಿಯುವುದೇ ಹೆಚ್ಚು. ವಾಡುಗಳಲ್ಲಿ ಸಣ್ಣಪುಟ್ಟ ವ್ಯಾಪಾರಿಗಳು ನಮಗೆ ಬೈಯುತ್ತಿದ್ದಾರೆ, ಲೈಸೆನ್ಸ್ ದರ ಕಡಿಮೆ ಮಾಡಬೇಕೆಂದು ಒತ್ತಾಯಿಸಿದರು.

ಉಪಾಧ್ಯಕ್ಷ ಎಂ ಜಂಬಣ್ಣ ಮಾತನಾಡಿ, ಅಧ್ಯಕ್ಷರು ಮತ್ತು ನಾನು ಪ್ರತಿದಿನ ವಾರ್ಡುಗಳಿಗೆ ತೆರಳಿ ಸ್ವಚ್ಛತೆ ಬಗ್ಗೆ ಗಮನಿಸುತ್ತೇವೆ. ಕೆಲಸ ಮಾಡುವವರಿಗೆ ಸಹಕಾರ ನೀಡಿ, ನಗರದಲ್ಲಿರುವ ತಗ್ಗು ಗುಂಡಿಗಳ ಮುಚ್ಚಿಸಲು ಕ್ರಮ ಕೈಗೊಳ್ಳಿ ಎಂದು ಪೌರಾಯುಕ್ತರಿಗೆ ಸೊಚನೆ ನೀಡಿದರು.

ಹರಿಹರದ ನಗರಸಭೆ ಸಭಾಭವನದಲ್ಲಿ ಗುರುವಾರ ಸಂಜೆ ಸಾಮಾನ್ಯ ಸಭೆ ನಡೆಯಿತು. ಕವಿತಾ ಬೇಡರ್ ಅಧ್ಯಕ್ಷತೆ ವಹಿಸಿದ್ದರು. ಸದಸ್ಯರು ಭಾಗವಹಿಸಿದ್ದರು.