ಕಲಬುರ್ಗಿ ಮಠಕ್ಕೆ ಚರಲಿಂಗ ಸ್ವಾಮೀಜಿ

ಹುಬ್ಬಳ್ಳಿ: ಇಲ್ಲಿನ ಮಂಟೂರು ರಸ್ತೆಯಲ್ಲಿನ ಕಲಬುರ್ಗಿ ಮಠದ ನೂತನ ಪೀಠಾಧಿಪತಿ ಚರಲಿಂಗ ಸ್ವಾಮೀಜಿ ಇದೇ ಮೊದಲ ಬಾರಿಗೆ ಪುರ ಪ್ರವೇಶ ಮಾಡಿದರು.

ಕಲಬುರಗಿಯಲ್ಲಿರುವ ಗದ್ದಿಗೆ ಮಠದ ಶಾಖಾ ಮಠ ಇದು. ಅಲ್ಲಿನ ಸ್ವಾಮೀಜಿಯೇ ಈ ಮಠವನ್ನೂ ನೋಡಿಕೊಂಡು ಹೋಗುವುದು ವಾಡಿಕೆ. ಹಿಂದಿನ ರೇವಣಸಿದ್ದೇಶ್ವರ ಸ್ವಾಮೀಜಿ 5 ವರ್ಷಗಳ ಹಿಂದೆ ಲಿಂಗೈಕ್ಯರಾಗಿದ್ದರು. ಅನಿವಾರ್ಯ ಕಾರಣಗಳಿಂದ ಆಗ ಸ್ವಾಮೀಜಿಗಳ ನೇಮಕವಾಗಿರಲಿಲ್ಲ. ಇದೀಗ ಕಲಬುರಗಿಯಲ್ಲಿನ ಮಠಕ್ಕೆ ಇತ್ತೀಚಿಗೆ ಚರಲಿಂಗ ಸ್ವಾಮೀಜಿ ಅವರನ್ನು ಮೂರುಸಾವಿರ ಮಠದ ಜ. ಗುರುಸಿದ್ಧರಾಜ ಯೋಗೀಂದ್ರ ಶ್ರೀಗಳು ನೇಮಕ ಮಾಡಿ ಪಟ್ಟಾಭಿಷೇಕ ಮಾಡಿದ್ದರು.

ಕಾರ್ಯಕ್ರಮದಲ್ಲಿ ಮಾತನಾಡಿದ ಮೂರುಸಾವಿರ ಮಠದ ಗುರುಸಿದ್ಧರಾಜ ಯೋಗೀಂದ್ರ ಶ್ರೀಗಳು, ಚರಲಿಂಗ ಶ್ರೀಗಳ ನೇತೃತ್ವದಲ್ಲಿ ಮಠದ ಅಭಿವೃದ್ಧಿ ಕಾರ್ಯಗಳು ನಡೆಯಲಿ. ಮಠದ ವೈಭವ ಮೊದಲಿನಂತೆ ಬೆಳೆಗಲಿ. ಈಗಿರುವ ಸ್ವಾಮೀಜಿ ಇಲ್ಲಿನ ಮಠದಲ್ಲಿ ಹೆಚ್ಚಿಗೆ ಇದ್ದು, ಧಾರ್ಮಿಕ, ಆಧ್ಯಾತ್ಮಿಕ ಹಾಗೂ ಪೂಜಾ ಕಾರ್ಯಗಳನ್ನು ಮಾಡುತ್ತಾ ಮಠವನ್ನು ಬೆಳೆಸಬೇಕು ಎಂದರು.

ನೂತನ ಶ್ರೀಗಳಾದ ಚರಲಿಂಗ ಸ್ವಾಮಿಗಳನ್ನು ಮಠಕ್ಕೆ ಭಕ್ತಿ ಪೂರ್ವಕವಾಗಿ ಸ್ವಾಗತಿಸಿದರು. ಅಲ್ಲದೇ, ಮಠದ ಸದ್ಭಕ್ತರಿಂದ ಗುರುವಂದನ ಕಾರ್ಯಕ್ರಮ ನೆರವೇರಿತು. ಗುರುವಂದನೆ ಸ್ವೀಕರಿಸಿದ ಚರಲಿಂಗ ಶ್ರೀಗಳು, ನಾನು ಮಠದಲ್ಲಿ ಇದ್ದು ಮಠವನ್ನು ಬೆಳೆಸುತ್ತೇನೆ ಎಂದರು.

ಧೋಟಿಯಾಳದ ಚಂದ್ರಶೇಖರ ದೇವರು ಕಾರ್ಯಕ್ರಮ ನಡೆಸಿಕೊಟ್ಟರು. ಜಿಲ್ಲಾ ಸಾಹಿತ್ಯ ಪರಿಷತ್ ಅಧ್ಯಕ್ಷ ಲಿಂಗರಾಜ್ ಅಂಗಡಿ ಸ್ವಾಗತಿಸಿದರು. ಡಾ. ಜ್ಯೋತಿ ಲಕ್ಷ್ಮಿ ಸಂಗೀತ ಕಾರ್ಯಕ್ರಮ ನಡೆಸಿಕೊಟ್ಟರು. ಸಂತೋಷ ಲೂತಿಮಠ್ ವಂದಿಸಿದರು.