ಕಡಲೆ ಬೆಳೆಗಾರರಿಗೆ ₹2.70 ಕೋಟಿ ವಂಚಿಸಿದ 3 ಅಧಿಕಾರಿಗಳ ವಿರುದ್ಧ ದೂರು

ಶಿವಕುಮಾರ ಕುಷ್ಟಗಿ ಗದಗ

ರೈತರಿಗೆ ಆಗಿರುವ ಈ ಬೃಹತ್ ವಂಚನೆ ಪ್ರಕರಣದಲ್ಲಿ ಮೊದಲ ಆರೋಪಿ ಕಡಲೆ ಖರೀದಿ ಮಾಡಿದ ದಾವಣಗೆರೆ ಜಿಲ್ಲೆಯ ಮಾರುತಿಗೌಡ. ಜಿಪಂ ಕಾರ್ಯಾಲಯ ಜಿಲ್ಲಾ ಕಾರ್ಯಕ್ರಮ ವ್ಯವಸ್ಥಾಪಕ ಚಂದ್ರಶೇಖರ ಎಲಿಗಾರ, ತಾಪಂ ಕಾರ್ಯಾಲಯದ ಕಾರ್ಯಕ್ರಮ ವ್ಯವಸ್ಥಾಪಕ ಆನಂದ ಬೆಳವಣಕಿ, ತಾಪಂ ಕಾರ್ಯಾಲಯದ ತಾಲೂಕು ತಾಂತ್ರಿಕ ಸಂಯೋಜಕ ಜಗದೀಶ ಕಂಬಾಳಿಮಠ ಪ್ರಮುಖ ಆರೋಪಿಗಳು.

₹2.70 ಕೋಟಿ ವಂಚನೆ: 8-1-2024 ರಿಂದ 6-2-2024 ರ ಅವಧಿಯಲ್ಲಿ ಅಂತೂರು, ಬೆಂತೂರು ಗ್ರಾಮದಲ್ಲಿನ 168 ರೈತರಿಂದ ಕಡಲೆಯನ್ನು ದಾವಣಗೆರೆ ಜಿಲ್ಲೆ, ಹರಿಹರ ತಾಲೂಕು ಬನ್ನಿಕೋಡ ಗ್ರಾಮದ ನಿವಾಸಿ ಈ ಪ್ರಕರಣದ ಮೊದಲ ಆರೋಪಿಯಾಗಿರುವ ಮಾರುತಿಗೌಡ ತಂದೆ ಸಂಗನಗೌಡ ಅವರಿಗೆ ಈ ಸರ್ಕಾರಿ ಅಧಿಕಾರಿಗಳೇ ಮುಂದೆ ನಿಂತು ಮಾರಾಟ ಮಾಡಿಸಿದ್ದಾರೆ. ಅದಕ್ಕಾಗಿ 168 ಜನ ರೈತರ ಒಟ್ಟು ₹2,70,12,929 (₹2.70 ಕೋಟಿ) ಹಣವನ್ನು ಆರೋಪಿತರು ಕೊಡದೇ ನಂಬಿಸಿ ರೈತರಿಗೆ ಮೋಸ ಮಾಡಿದ್ದಾರೆ. ಈ ಬಗ್ಗೆ ನ್ಯಾಯ ಕೊಡಿಸುವಂತೆ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.

ರೈತರು ಏನಂತಾರೆ?: ಈ ವಿಷಯವಾಗಿ ಹಲವಾರು ರೈತರನ್ನು ಕನ್ನಡಪ್ರಭ ಸಂಪರ್ಕಿಸಿದಾಗ, ಕೆಲವು ಸರ್ಕಾರಿ ಅಧಿಕಾರಿಗಳು ಗ್ರಾಮಕ್ಕೆ ಬಂದು ಮೌಖಿಕವಾಗಿ ಹಾಗೂ ಅಂತೂರ-ಬೆಂತರ ಗ್ರಾಮಗಳಲ್ಲಿ ಸಭೆಗಳ ಮೂಲಕ ಒಕ್ಕೂಟದ ಆಫೀಸಗಳಲ್ಲಿ ಕೃಷಿ ವಹಿವಾಟುಗಳ ಬಗ್ಗೆ ಮಾಹಿತಿ ಕೊಟ್ಟಿದ್ದಾರೆ. ರೈತರು ಬೆಳೆದ ಬೆಳೆಗಳನ್ನು ನೇರವಾಗಿ ದಲ್ಲಾಳಿಗಳು ಇಲ್ಲದೇ ಖರೀದಿ ಮಾಡಿಸುತ್ತೇವೆ. ಇದರಿಂದ ರೈತರಿಗೆ ಅನುಕೂಲವಾಗಲಿದೆ. ಮಾರುಕಟ್ಟೆಗಿಂತ ಉತ್ತಮ ಬೆಲೆ ಸಿಗುತ್ತದೆ. ಇತರೇ ಖರ್ಚುಗಳು ಕಡಿಮೆಯಾಗುತ್ತವೆ ಎಂದಿದ್ದರಿಂದ ನಾವು ಇವರಿಗೆ ಕಡಲೆ ಮಾರಾಟ ಮಾಡಿದ್ದೇವೆ. ಮಾರಾಟ ಮಾಡಿ ವರ್ಷವೇ ಗತಿಸಿದೆ ನಮಗೆ ಬರಬೇಕಾದ ಹಣ ಬಂದಿಲ್ಲ ಎನ್ನುತ್ತಾರೆ.