ನಾಟ್ಯೋತ್ಸವದಿಂದ ಸಮಾಜದ ಮೇಲೆ ಸಾಂಸ್ಕೃತಿಕ ನೆರಳು

ಹೊನ್ನಾವರ: ತಾಲೂಕಿನ ಗುಣವಂತೆಯ ಯಕ್ಷಾಂಗಣದಲ್ಲಿ ಕೆರೆಮನೆ ಶಂಭು ಹೆಗಡೆ ರಾಷ್ಟ್ರೀಯ ನಾಟ್ಯೋತ್ಸವದ ದ್ವಿತೀಯ ದಿನದ ಸಭಾ ಕಾರ್ಯಕ್ರಮವನ್ನು ಭಾನುವಾರ ಸಾಂಪ್ರದಾಯಿಕ ಯಕ್ಷಗಾನ ಪದ್ಯದೊಂದಿಗೆ ದೀಪ ಬೆಳಗಿಸಿ ಉದ್ಘಾಟಿಸಲಾಯಿತು.

ಕೆರೆಮನೆ ಗಜಾನನ ಹೆಗಡೆ ಪ್ರಶಸ್ತಿಯನ್ನು ಖ್ಯಾತ ಭಾಗವತರಾದ ವಿದ್ವಾನ್ ಗಣಪತಿ ಭಟ್ಟರಿಗೆ ನೀಡಿ ಪುರಸ್ಕರಿಸಲಾಯಿತು. ಪ್ರಶಸ್ತಿ ಸ್ವೀಕರಿಸಿದ ಗಣಪತಿ ಭಟ್ಟರು ಮಾತನಾಡಿ, ಶ್ರೇಷ್ಠ ಕಲಾವಿದರ ಹೆಸರಿನಲ್ಲಿ ಕೊಡಮಾಡಿದ ಪ್ರಶಸ್ತಿ ಶ್ರೇಷ್ಠವಾದದ್ದು ಮತ್ತು ಮೌಲ್ಯವನ್ನು ಹೊಂದಿರುವಂಥದ್ದು ಎಂದರು.

ಅಖಿಲ ಹವ್ಯಕ ಮಹಾಸಭಾ ಬೆಂಗಳೂರು ಅಧ್ಯಕ್ಷ ಡಾ.ಗಿರಿಧರ್ ಕಜೆ ಕಲಾಪೋಷಕ ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿ, ಧರ್ಮದ ಕಾರ್ಯವನ್ನು ಮಾಡಿದ ಪ್ರತಿ ಕುಟುಂಬವು ನಿರಂತರವಾಗಿ ಮುಂದುವರೆಯುತ್ತದೆ‌. ಈ ಮೇಳ ಸಮಾಜಕ್ಕೆ ಸಂಸ್ಕೃತಿ, ಸಂಸ್ಕಾರದ ಪಾಠ ನೀಡಿದೆ. ನೂರಾರು ಕಲಾವಿದರಿಗೆ ಆಶ್ರಯ ನೀಡಿದ ಹೆಮ್ಮೆ ಈ ಮೇಳಕ್ಕಿದೆ ಎಂದರು.

ರಾಷ್ಟ್ರೀಯ ನಾಟ್ಯೋತ್ಸವ ಸಮಾನ ಸ್ವೀಕರಿಸಿ ಮಾತನಾಡಿದ ಲೇಖಕಿ ಭುವನೇಶ್ವರಿ ಹೆಗಡೆ ಮಾತನಾಡಿ, ಸ್ತ್ರೀವೇಷದ ರೀತಿ, ನೀತಿಯನ್ನು ಗಜಾನನ ಹೆಗಡೆಯವರ ಸಂಪರ್ಕದಿಂದ, ಮಾತಿನಲ್ಲಿ ಧೈರ್ಯ ತುಂಬುಕೊಳ್ಳುವ ಸಾಹಸವನ್ನು ಮಹಾಬಲ ಹೆಗಡೆಯವರಿಂದಲೂ, ಆತ್ಮೀಯತೆಯ ಭಾವವನ್ನು ಶಂಭು ಹೆಗಡೆಯವರಿಂದಲೂ ಕಲಿತು ನಾನು ಈ ಸ್ಥಾನಕ್ಕೆ ಬಂದಿದ್ದೇನೆ ಎಂದರು.